UAE: விசாவை கேன்சல் செய்யாமல் வெளியேறினால் மீண்டும் அமீரகம் திரும்ப முடியுமா..? UAE டிஜிட்டல் அரசாங்கம் வெளியிட்ட தகவல் என்ன.?
நீங்கள் அமீரகத்திலிருந்து நிரந்தரமாக வெளியேற முடிவு செய்திருக்கிறீர்களா? அப்படியானால், உங்களின் UAE ரெசிடென்சி விசா சரியாக ரத்து செய்யப்படுவதை உறுதி செய்ய வேண்டும், ஏனெனில் ரெசிடென்ஸ் விசாவை ரத்து செய்யத் தவறினால் எதிர்காலத்தில் நீங்கள் அமீரகத்திற்கு திரும்ப திட்டமிடும் போது சில சட்ட சிக்கல்களை எதிர்கொள்ள வேண்டியிருக்கும்.
UAE டிஜிட்டல் அரசாங்கத்தின் (u.ae) இணையதளத்தில் பகிரப்பட்டுள்ள ஆலோசனையின் படி, அமீரகத்தை விட்டு வெளியேறும் வெளிநாட்டவர்கள், குடும்ப உறுப்பினர்கள் போன்ற தாங்கள் ஸ்பான்சர் செய்த குடியிருப்பாளர்களின் UAE விசாவையும் ரத்து செய்ய வேண்டும் என்பதை நினைவில் கொள்வது அவசியம்.
இது குறித்து UAE டிஜிட்டல் அரசாங்கத்தின் இணையதளத்தில், குடும்ப உறுப்பினர்களின் குடியிருப்பு விசாவை விசா ஸ்பான்சர் செய்த நபரால் மட்டுமே ரத்து செய்ய முடியும், நீங்கள் சொந்தமாக விண்ணப்பத்தைச் செயல்படுத்த முடியாது என்பதை அமீரக குடியிருப்பாளர்களுக்கு நினைவூட்டியுள்ளது.
ஊழியர்களின் விசாவை ரத்து செய்தல்:
ஒரு நிறுவனம் அதன் ஊழியரின் வேலைவாய்ப்பு விசாவை ரத்து செய்ய முடிவு செய்தால், அது முதலில் அந்த ஊழியரின் தொழிலாளர் ஒப்பந்தம் மற்றும் தொழிலாளர் அட்டையை ரத்து செய்வதற்கான விண்ணப்பத்துடன் மனித வளங்கள் மற்றும் எமிராட்டிசேஷன் அமைச்சகத்தை (MoHRE) அணுக வேண்டும். இந்த விண்ணப்பத்தில் ஊழியரும் கையெழுத்திட வேண்டும்.
பின்னர், முதலாளி ICP அடையாளம், குடியுரிமை, சுங்கம் மற்றும் துறைமுக பாதுகாப்புக்கான பெடரல் ஆணையத்திடம் விசாவை ரத்து செய்யக் கோரி விண்ணப்பிக்க வேண்டும். அதேசமயம், ஊழியரின் பணி அனுமதியை நிறுவனம் ரத்து செய்ய வேண்டும். இதற்காக, நிறுவனம் ஊழியர் ஏற்கனவே அனைத்து நிலுவைத் தொகைகள், ஊதியங்கள் மற்றும் இறுதிச் சேவைப் பலன்களை முதலாளியிடமிருந்து பெற்றுள்ளதாகக் கூறி, பணியாளரால் கையொப்பமிடப்பட்ட கடிதத்தை MoHRE க்கு சமர்ப்பிக்க வேண்டும்.
ஸ்பான்சர்களாக இருக்கும் நபர்கள் செய்ய வேண்டியவை:
அமீரகத்தில் தங்கள் மனைவி, குழந்தைகள் மற்றும் பிற சார்ந்திருப்பவர்களுக்கு ஸ்பான்சர் செய்யும் வெளிநாட்டவர்கள், தங்களுடைய சொந்த விசாவை ரத்து செய்வதற்கு முன், அவர்கள் ஸ்பான்சர் செய்த நபர்களின் விசாவை முதலில் ரத்து செய்ய வேண்டும். விசாவை ரத்து செய்ய பொதுவாக 110 திர்ஹம்கள் மட்டுமே செலவாகும்.
UAE டிஜிட்டல் அரசாங்கத்தின் நடைமுறைகளின்படி, ஸ்பான்சர் அல்லது அவர்கள் சார்பாக அவர்கள் பிரதிநிதித்துவப்படுத்தும் ஒருவர் மட்டுமே (எடுத்துக்காட்டாக, நிறுவனங்களைப் பொறுத்தவரை, PRO போன்றவை) அவர்கள் ஸ்பான்சர் செய்த ஒருவரின் ரெசிடென்சி விசாவை ரத்து செய்ய முடியும். ஆகவே, ஸ்பான்சர் செய்யப்பட்ட நபர் ஸ்பான்சரின் அனுமதி மற்றும் கையொப்பம் இல்லாமல் கோரிக்கையை செயல்படுத்த முடியாது என்பது குறிப்பிடத்தக்கது.
விசாவை ரத்து செய்யாவிட்டால் என்ன நடக்கும்?
— ICP அதிகாரியின் கூற்றுப்படி, வெளிநாட்டவர் நாட்டை விட்டு வெளியேறி ஆறு மாதங்களுக்கும் மேலாகிவிட்டால், குடியிருப்பு விசா தானாகவே ரத்து செய்யப்படும்
— அதிகாரப்பூர்வமாக குடியிருப்பு விசாவை ரத்து செய்யாத முன்னாள் வெளிநாட்டவர், இந்த காலத்திற்கு பிறகு ஐக்கிய அரபு அமீரகத்திற்குத் திரும்ப விரும்பினால், அவர் ICP இன் இணையதளம் அல்லது செயலி மூலம் அனுமதி பெற வேண்டும்.
— முன்னாள் வெளிநாட்டவர் அமீரகத்திற்கு எப்போது திரும்பலாம் மற்றும் என்ன ஆவணங்கள் மற்றும் பணம் செலுத்த வேண்டும் என்பதை ICP தீர்மானிக்கும்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
