அமீரகத்தில் விதிக்கப்படும் பயணத்தடையை ஆன்லைனில் ரத்து செய்வது எப்படி?? படிப்படியான விளக்கம் உள்ளே..!!

ஐக்கிய அரபு அமீரகத்தில் வசிக்கும் வெளிநாட்டவர்கள் தங்களின் அலுவலகங்களில் அல்லது குடியிருப்புகளில் அல்லது பொது வெளிகளில் ஏதேனும் விதிமீறல் அல்லது குற்றத்தில் ஈடுபட்டால், அந்த குற்றத்தை பொருத்து அபராதம் அல்லது சிறைத்தண்டனை விதிக்கப்படும். அதுவே, பெரிய குற்றங்களில் ஈடுபட்டால் சிறைத்தண்டனை முடிவடைந்ததும் பயணத் தடையும் விதிக்கப்பட்டு நாடு கடத்தப்படுவார்கள் என்பது அமீரகத்தில் நடைபெறும் வழக்கமான நடைமுறையாகும்.

அதேபோன்று, சில நேரங்களில் குடியிருப்பு விசா தொடர்பான சிக்கல்கள் இருந்தால், அவர்களுக்கு எதிராகவும் பயணத் தடை அமீரகத்தில் விதிக்கப்படலாம். அதுமட்டுமல்லாமல் ஒருவர் கடன் அல்லது கிரெடிட் கார்டு மூலம் பெறப்பட்ட கடன் தொகையை ஒழுங்காக செலுத்தத் தவறினாலும் அல்லது வேறு ஏதேனும் நிதி தொடர்பான குற்றங்கள் புரிந்திருந்தாலும் பயணத்தடை விதிக்கப்படலாம் என்பது குறிப்பிடத்தக்கது.

இவ்வாறு பயணத்தடை உங்களுக்கு விதிக்கப்பட்டிருந்தால் அதனை நீங்கள் முறையான வழிமுறைகளைப் பின்பற்றி ஆன்லைன் மூலமாகவே பயணத்தடையை ரத்து செய்ய முடியும். இது போன்று அமீரகத்தில் பயணத்தடை விதிக்கப்பட்டுள்ள நபர் அதனை ஆன்லைன் வழியாக எப்படி எளிதாக ரத்து செய்யலாம் என்பதை பற்றி இங்கே பார்க்கலாம்.

படி 1:

முதலில் நீதி அமைச்சகத்தின் (Ministry of Justice) இணையதளத்திற்குச் சென்று உங்கள் UAE PASS-ஐ பயன்படுத்தி உள்நுழையவும். நீங்கள் முன்பு இணையதளத்தில் பதிவு செய்யவில்லை என்றால் நீங்கள் தனியாக பதிவு செய்ய வேண்டியிருக்கும்.

படி 2:

நீங்கள் உள்நுழைந்ததும், ‘Cancellation Request of Travel Ban Order’ என்பதை கிளிக் செய்யவும். அங்கு, ‘Case Management’ என்ற விருப்பத்தை கிளிக் செய்து உள்நுழையவும்.

படி 3:

அதன் உள்ளே நுழைந்த பிறகு, உங்களுக்கு எதிரான வழக்குகளைப் பற்றி தெரிந்து கொள்ள ‘My Cases’ எனும் விருப்பத்தை கிளிக் செய்து மீண்டும் உள்நுழையவும்.

படி 4:

இப்போது நீங்கள் திரையில் ஒவ்வொரு வழக்கின் விவரங்களையும் பார்க்கலாம் மற்றும் ஒவ்வொரு வழக்கையும் ரத்து செய்வதற்கான ‘கோரிக்கை (request)’ செய்யலாம். இதில் காண்பிக்கப்படும் படிவத்தில் உங்கள் விவரங்களை நிரப்ப வேண்டும்.

படி 5:

இறுதியாக, உங்கள் வழக்கின் அடிப்படையில் விதிக்கப்பட்ட பயணத் தடையை ரத்து செய்ய ஆன்லைன் மூலமாக நீங்கள் பணம் செலுத்த வேண்டியிருக்கலாம்.

கூடுதல் தகவல்

குறிப்பாக, உங்கள் விண்ணப்பத்தை தாக்கல் செய்யும் போது, ​​பயணத் தடையை ரத்து செய்வதற்கான உங்கள் வழக்கை ஆதரிக்கும் ஆவணங்களை நீங்கள் வழங்க வேண்டும். நீதி அமைச்சகத்தின் கூற்றுப்படி, இந்த சேவையை செயல்படுத்த ஐந்து வேலை நாட்கள் வரை ஆகலாம்.

புதிய அமைப்பு

ஐக்கிய அரபு அமீரகம் மற்றும் பிராந்தியத்தில் உள்ள ஒரு முதல் வகையான இந்த அமைப்பு, அனைத்து நீதித்துறை அமலாக்க முடிவுகளையும் உடனடியாகக் கண்காணித்து, தேவையான நிலுவைத் தொகையை செலுத்திய பிறகு அவற்றை ரத்து செய்கிறது.

சமீபத்தில், அபுதாபி நீதித்துறையானது, பணம் செலுத்தும் நிலையைக் கண்காணிக்கும் ஒரு புதிய அமைப்பை ஏற்றுக்கொண்டது, மேலும் அபராதம் செலுத்த வேண்டிய நபர் பணம் செலுத்தி முடித்தவுடன், அவரின் அசல் முடிவை இது ரத்து செய்கிறது. டிஜிட்டல் ஒப்புதலுக்குப் பிறகு, இது சம்பந்தப்பட்ட அதிகாரிகளுக்கு அனுப்பப்படும் என்று கூறப்படுகிறது.

மேலும் பணம் செலுத்தாததால் ஒருவருக்கு பயணத் தடை விதிக்கப்பட்டால், அதற்குரிய பணம் செலுத்தியவர்கள் ஸ்மார்ட் ஆப் மூலம் ரத்துசெய்தல் முடிவின் நகலை பதிவிறக்கம் செய்து கொள்ளலாம். அதன்பின் அவர்கள் பயண நடைமுறைகளைத் தொடரலாம் மற்றும் தேவைப்பட்டால் இந்த நகலை ஆதாரமாக அதகாரிகளிடம் காட்டலாம் என்றும் கூறப்படுகின்றது.

இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel