இந்தியர்களுக்காக ‘விசா-ஆன்-அரைவல்’ கொள்கையை புதுப்பித்த அமீரகம்: விபரங்களும் வெளியீடு..!!

ஐக்கிய அரபு அமீரகம் அதன் விசா-ஆன்-அரைவல் கொள்கையை இந்திய பாஸ்போர்ட் வைத்திருப்பவர்கள் பயனடையும் வகையில் விரிவுபடுத்தியுள்ளது. இது தொடர்பாக அமீரகத்தின் அடையாளம், குடியுரிமை, சுங்கம் மற்றும் துறைமுக பாதுகாப்புக்கான பெடரல் ஆணையம் (ICP) அக்டோபர் 17ஆம் தேதி அன்று அறிக்கை ஒன்றை வெளியிட்டுள்ளது.

அதில், ஐரோப்பிய ஒன்றியம் (EU), யுனைடெட் ஸ்டேட்ஸ் (US) அல்லது யுனைடெட் கிங்டம் (UK) ஆகிய நாடுகளுக்கு சுற்றுலா விசாவைக் கொண்ட இந்திய குடிமக்கள் இப்போது நாட்டிற்குள் விசா இல்லாமல் நுழைவதற்கு தகுதியுடையவர்கள் என்று தெரிவித்துள்ளது.

சில இந்திய பாஸ்போர்ட் வைத்திருப்பவர்களுக்கு அமீரகத்தில் விசா-ஆன்-அரைவல் விருப்பம் சில காலமாக உள்ளது என்றாலும், இந்த சமீபத்திய புதுப்பிப்பு மூலம், UAE இன் வசதியான விசா-ஆன்-அரைவல் திட்டத்தில் இருந்து இன்னும் அதிகமான இந்தியர்கள் பயனடையலாம் என்று கூறப்படுகிறது.

திய விசா-ஆன்-அரைவல் கொள்கை கூறுவது என்ன?

2017 ஆம் ஆண்டு முதல், செல்லுபடியாகும் அமெரிக்க விசா அல்லது கிரீன் கார்டு அல்லது ஐரோப்பிய ஒன்றியம் அல்லது UKக்கான ரெசிடன்ஸி விசாக்களை வைத்திருக்கும் இந்திய குடிமக்கள், UAE க்கு வருகையின் போது விசா பெற தகுதியுடையவர்கள் என்று அறிவிக்கப்பட்டது.

இப்போது, ​​2024 ஆம் ஆண்டில், UAE இந்த திட்டத்தின் விரிவாக்கத்தை அறிவித்துள்ளது. புதிய கொள்கையின்படி, ஐரோப்பிய ஒன்றியம், அமெரிக்கா மற்றும் இங்கிலாந்து ஆகிய நாடுகளுக்கு செல்லுபடியாகும் சுற்றுலா விசாக்களை வைத்திருக்கும் இந்தியர்களும் இப்போது அமீரகத்தின் விசா-ஆன்-அரைவல் அணுகல் மூலம் பயனடையலாம்.

யார் தகுதியானவர்?

இந்திய குடிமக்கள் மற்றும் அவர்களது குடும்ப உறுப்பினர்கள், சாதாரண பாஸ்போர்ட்களை வைத்திருப்பவர்கள், பின்வருவனவற்றை கொண்டிருந்தால், அனைத்து UAE விமான நிலையங்களிலும் விசா பெற தகுதியுடையவர்கள்:

• அமெரிக்காவால் வழங்கப்பட்ட செல்லுபடியாகும் சுற்றுலா விசா, குடியிருப்பு அனுமதி அல்லது கிரீன் கார்டு, அல்லது
• ஐரோப்பிய ஒன்றிய நாடுகள் அல்லது ஐக்கிய இராச்சியம் வழங்கிய செல்லுபடியாகும் சுற்றுலா விசா அல்லது குடியிருப்பு அனுமதி.
• விசா, அனுமதி மற்றும் பாஸ்போர்ட் அனைத்தும் குறைந்தபட்சம் ஆறு மாதங்களுக்கு செல்லுபடியாக வேண்டும்.

எவ்வளவு காலம் தங்க முடியும்?

14 நாள் வருகையின்போது விசா – குறைந்தபட்சம் ஆறு மாத பாஸ்போர்ட் செல்லுபடியாகும் காலத்துடன் உங்கள் EU, US அல்லது UK விசா செல்லுபடியாகும் வரை, கூடுதலாக 14 நாட்களுக்கு (கட்டணங்கள் பொருந்தும்) நாட்டில் தங்குவதற்கு இந்த விருப்பம் அனுமதிக்கிறது. 60 நாள் வருகையின்போது விசாவை நீட்டிக்க முடியாது.

செலவுகள்

• 14 நாள் நுழைவு விசா: 100 திர்ஹம்ஸ்
• 14 நாள் நீட்டிப்பு: 250 திர்ஹம்ஸ்
• 60 நாள் விசா: 250 திர்ஹம்ஸ் (நீட்டிக்க முடியாதது)

இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel