புர்ஜ் கலீஃபா பகுதியில் குவியும் மக்கள் கூட்டம்..!! பாதுகாப்பு நடவடிக்கைகள் தீவிரம்..!!

இன்று இரவு துபாய் முழுவதும் 36 இடங்களில் கண்கவர் வானவேடிக்கைக் காட்சிகளுடன் 2025 ஆம் ஆண்டை வரவேற்க அனைவரும் தயாராகி வரும் வேளையில், ஒரே இடத்தில் அதிகம் பேர் கூடுவார்கள் என்பதால் பொதுப் பாதுகாப்பு தற்போது காவல்துறை மற்றும் துபாய் அரசாங்க துறை அதிகாரிகளின் முன்னுரிமையாக உள்ளது.

டவுன்டவுன் துபாய் போன்ற முக்கிய நிகழ்வு பகுதிகளை மையமாகக் கொண்டு புத்தாண்டுக் கொண்டாட்டத்தின் போது, போக்குவரத்து ஓட்டத்தை நிர்வகிப்பது முதல் பாதுகாப்பான படகு கொண்டாட்டங்கள் வரை பார்வையாளர்கள் மற்றும் பொது மக்களின் பாதுகாப்பை உறுதி செய்வதற்காக துபாய் நிகழ்வுகள் பாதுகாப்புக் குழுவால் (Dubai Events Security Committee) எமிரேட் முழுவதும் பாதுகாப்பு நடவடிக்கைகள் செயல்படுத்தப்பட்டுள்ளன.

எனவே புத்தாண்டு தினத்தன்று பொதுமக்களின் பாதுகாப்பை கருத்தில்கொண்டு துபாய் முழுவதும் மேற்கொள்ளப்பட்டுள்ள பாதுகாப்பு நடவடிக்கைகள் என்ன என்பதைப் பின்வருமாறு பார்க்கலாம்.

முதலுதவி, இழந்தது மற்றும் கண்டுபிடிக்கப்பட்டது

புத்தாண்டுக் கொண்டாட்டங்களில் கலந்துகொள்ளும் பார்வையாளர்களுக்கு அவசரச் சூழ்நிலையில் உதவ, நகரின் முக்கிய நிகழ்வு பகுதிகளில் 33 ஆதரவு கூடாரங்கள் துபாய் காவல்துறையால் அமைகப்பட்டுள்ளன, இதில் 19 டவுன்டவுன் துபாயில் உள்ளது. இந்த கூடாரங்கள் “லாஸ்ட் அண்ட் ஃபவுண்ட்” சேவைகளை வழங்கும் என்றும், பாதிக்கப்பட்ட பார்வையாளர்கள் துபாய் போலீஸ் இணையதளம் வழியாக ஆன்லைனில் இந்த சேவையை அணுகலாம் என்றும் அதிகாரிகள் தெரிவித்துள்ளனர்.

கூடுதலாக, கூடாரங்களில் முதலுதவி, பொது விசாரணைகள் மற்றும் தேவைப்பட்டால் குற்றவியல் அறிக்கைகளை தாக்கல் செய்யும் சேவையும் வழங்கப்படும் என்று அதிகாரம் கூறியுள்ளது. எனவே, பார்வையாளர்கள் அவசரமற்ற தேவைகளுக்கு 901 என்ற எண்ணையும், அவசர தேவைகளுக்கு 999 என்ற எண்ணையும் தொடர்பு கொள்ளலாம்.

கள மருத்துவமனை, மற்றும் முழு திறன் செயல்பாடுகள்

வெளியான செய்திகளின் படி, புர்ஜ் கலிஃபாவிற்கு அருகில் ஒரு கள மருத்துவமனை நிறுவப்படும், இதில் எட்டு சிகிச்சை அறைகள் மற்றும் அவசர மருத்துவம், உள் மருத்துவம், அறுவை சிகிச்சை மற்றும் குழந்தை மருத்துவம் ஆகியவற்றில் நிபுணத்துவம் பெற்ற சிறப்புக் குழுக்கள் உள்ளன. கூடுதலாக, துபாய் முழுவதும் மூலோபாயமாக அமைந்துள்ள ஏழு மருத்துவ இடங்களில், அவசரகால நிபுணர்களால் பணியாற்றுவார்கள் என்பதால், உடனடியாக முதலுதவி அளிக்கப்படும் என்று தெரிவிக்கப்பட்டுள்ளது.

மேலும், புத்தாண்டு கொண்டாட்டங்களின் போது, உயர்தர சுகாதார சேவைகளை தடையின்றி அணுகுவதை உறுதி செய்யும் நோக்கில்  எமிரேட்டில் உள்ள ஆறு மருத்துவமனைகள் மற்றும் நான்கு கிளினிக்குகளில் 1,800 மருத்துவ மற்றும் நிர்வாகப் பணியாளர்களை பணியமர்த்துவதாக துபாய் ஹெல்த் அறிவித்துள்ளது.

அதனடிப்படையில், துபாயில் உள்ள ரஷித் மருத்துவமனை, துபாய் மருத்துவமனை, அல் ஜலீலா குழந்தைகள், லத்தீஃபா மருத்துவமனை, ஜெபல் அலி மருத்துவமனை மற்றும் ஹத்தா மருத்துவமனை உள்ளிட்ட வசதிகளும், நாத் அல் ஹமர், அல் பர்ஷா, துபாய் சர்வதேச விமான நிலையம் மற்றும் அல் மக்தூம் சர்வதேச விமான நிலையம் ஆகியவற்றில் உள்ள கிளினிக்குகளும் முழு திறனுடன் செயல்படும் என்று கூறப்படுகிறது.

கூடுதல் வசதிக்காக, துபாய் ஹெல்த் அதன் ஹோம்கேர் மற்றும் டெலிமெடிசின் சேவைகளையும் விரிவுபடுத்தியுள்ளது, எனவே, குடியிருப்பாளர்கள் தங்கள் வீட்டிலிருந்த படியே 80060 என்ற கால் சென்டர் மூலம் மருத்துவ உதவியை அணுகலாம்.

சாலை நிலைமைகள் குறித்த நேரடி அறிவிப்புகள்

துபாயின் பிரதான சாலையான ஷேக் சையத் சாலை உட்பட பல முக்கிய வழிகள் வெவ்வேறு நேரங்களில் கொண்டாட்டங்களுக்காக மூடப்படும் என்று RTA தரப்பில் அறிவிக்கப்பட்டுள்ளது. இவை தவிர, புத்தாண்டு கொண்டாட்டங்களின் போது, போக்குவரத்து நெரிசலை நிர்வகிப்பதற்கும், பாதசாரிகளின் பாதுகாப்பை உறுதி செய்வதற்கும், நெரிசலான நேரங்களில் சாலையை மூடுவதைச் செயல்படுத்துவதற்கும் கூடுதல் காவல்துறை  அதிகாரிகள் நியமிக்கப்படுவார்கள்.

இத்தகைய நேரத்தில், வாகன ஓட்டிகளின் சிரமத்தைத் தவிர்ப்பதற்கு துபாய் காவல்துறை மற்றும் RTA அதிகாரப்பூர்வ தகவல் தொடர்பு சேனல்கள் சாலை நிலைமைகள் குறித்த நேரடி அறிவிப்புகளை வழங்கும். ஆகவே, பொதுமக்கள் முன்கூட்டியே திட்டமிட்டு முன்கூட்டியே வர வேண்டும், மேலும் மெட்ரோ மற்றும் ஷட்டில் பேருந்துகள் போன்ற பொது போக்குவரத்து விருப்பங்களைப் பயன்படுத்த வேண்டும் என்று குழு வலியுறுத்தியுள்ளது.

தடையற்ற கொண்டாட்டங்களுக்காக துபாய் மெட்ரோ 43 மணி நேரம் இடைவிடாது இயங்கும், அதே நேரத்தில் துபாய் டிராம் நேரமும் நீட்டிக்கப்பட்டுள்ளது, மேலும் 1,400 பேருந்துகள் பொதுமக்களுக்கு இலவசமாகக் கிடைக்கும் என்று RTA அதிகாரிகள் முன்னதாக அறிவித்தனர்.

துபாய் நீர்ப்பரப்பில் கொண்டாட்டம்

2025 ஆம் ஆண்டை எமிரேட்டின் கடற்பரப்பில் மிதந்தவாறு கொண்டாட விரும்பும் பார்வையாளர்கள் துபாய் படகு, அப்ரா மற்றும் வாட்டர் டாக்ஸி உள்ளிட்டவற்றில் புத்தாண்டைக் கொண்டாட துபாய் சிறப்புச் சலுகைகளை முன்னதாக அறிவித்தது. இத்தகைய தனித்துவமான கொண்டாட்டத்தில் நிகழும் எந்தவித அசம்பாவிதங்களில் இருந்தும் பாதுகாத்துக்  கொள்ள துபாய் போலீஸ் செயலி மூலம் “Sail Safely” சேவையில் பதிவு செய்ய துபாய் காவல்துறை ஊக்குவித்துள்ளது.

இந்தச் சேவை பயனர்கள் தங்கள் பயணத் திட்டங்களைச் சமர்ப்பிக்க அனுமதிப்பதுடன் SOS அம்சத்தின் மூலம் அவசர உதவியை வழங்குகிறது மற்றும் துன்பம் ஏற்பட்டால் விரைவான பதிலளிப்பு நேரத்தை உறுதி செய்கிறது.

இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel