கிறிஸ்துமஸ் பண்டிகை, புத்தாண்டு விடுமுறை என அடுத்தடுத்து விடுமுறைகள் வருவதால், துபாய் சர்வதேச விமான நிலையத்தில் (DXB) பயணிகள் போக்குவரத்து அதிகரிக்கும் என்று எதிர்பார்க்கப்படுகிறது.
இது தொடர்பாக DXB முன்னதாக வெளியிட்ட அறிக்கையில், டிசம்பர் 13 முதல் 31 வரை 5.2 மில்லியனுக்கும் அதிகமான பயணிகள் வருவார்கள் எனவும், தினசரி சராசரியாக 274,000 பயணிகள் போக்குவரத்து இருக்கும் எனவும் எதிர்பார்ப்பதாக கணித்துள்ளது. அதேபோல், டிசம்பர் 20 முதல் 22 வரையிலான வார இறுதியில் 880,000 பயணிகள் வருவார்கள் என மதிப்பிடப்பட்டுள்ளதாகத் தெரிவித்தது.
இந்நிலையில், பயணிகள் எண்ணிக்கையை கருத்தில்கொண்டு அடுத்த இரண்டு வாரங்களுக்கு பிஸியான விடுமுறை காலத்தில் கூட்டத்தை சமாளிக்க DXBயில் அதன் ஆய்வாளர்கள் குழுவை விரிவுபடுத்தியுள்ளதாக துபாய் கஸ்டம்ஸ் அறிவித்துள்ளது.
மேலும், ஆய்வு நடவடிக்கைகளுக்கான பெரிய லக்கேஜ்களுக்கு 58 மற்றும் ஹேன்ட் லக்கேஜ்களுக்கு 19 என மொத்தம் 77 ஆய்வு சாதனங்களையும் இவற்றுடன் கூடுதல் கருவிகளையும் பயன்படுத்துவதாக ஆணையம் கூறியுள்ளது. கூடுதலாக, உச்ச விடுமுறை பயண காலங்களில் பயணிகள் போக்குவரத்தை எதிர்கொள்ள மேம்பட்ட டிஜிட்டல் தீர்வுகளையும் வரிசைப்படுத்தியுள்ளதாகக் கூறப்பட்டுள்ளது.
மேலும், துபாய் கஸ்டம்ஸ் iDeclare அப்ளிகேஷனை சமீபத்தில் அறிமுகப்படுத்தியுள்ளது. இந்த ஸ்மார்ட் ஆப், பயணிகள் தங்கள் பொருட்கள், தனிப்பட்ட உடமைகள், பரிசுகள், நாணயங்கள் மற்றும் பணத்தை முன்கூட்டியே அறிவிக்க அனுமதிக்கிறது. இந்த அமைப்பு விமான நிலையத்தின் வருகைக்கு முந்தைய பரிவர்த்தனைகளை செயலாக்க உதவுவதன் மூலம் சுங்க அனுமதி (customs clearance) நேரத்தை நான்கு நிமிடங்களுக்குள் குறைக்கும் என்று கூறப்படுகிறது.
மேலும், துபாய் சுங்கம் அதன் இணையதளமான dubaicustoms.gov.ae மூலம் பயணிகளுக்கு அத்தியாவசியத் தகவல்களை வழங்குகிறது, இதில் பயணிகள் என்ன அறிவிக்கலாம், தடைசெய்யப்பட்ட பொருட்கள் மற்றும் அதிகப்படியான லக்கேஜ் கொள்கைகள் போன்றவற்றை கோடிட்டுக் காட்டும் சுங்க வழிகாட்டி போன்றவை அடங்கும்.
இது குறித்து துபாய் சுங்கத்துறையில் பயணிகள் நடவடிக்கை இயக்குனராக உள்ள கலீத் அஹ்மத் கௌரி அவர்கள் பேசுகையில், DXBயின் தொடர்ச்சியான வெற்றியானது, துபாய் சுங்கம் உட்பட பல நிறுவனங்களின் கூட்டு முயற்சிகளை பிரதிபலிப்பதாகவும், இது பயணிகளை திறமையாக வரவேற்பதற்கும், சேவைகளை மேம்படுத்துவதற்கும், அவர்களின் திருப்தியை உறுதி செய்வதற்கும் உறுதிபூண்டுள்ளது என்றும் குறிப்பிட்டுள்ளார்.
விடுமுறைகள் மற்றும் கொண்டாட்டங்கள் போன்ற உச்ச பயண காலங்களில், துபாய் சுங்கம் ஒரு நெறிப்படுத்தப்பட்ட அணுகுமுறையை செயல்படுத்துகிறது, இது மிக உயர்ந்த அளவிலான பாதுகாப்பு மற்றும் செயல்திறனைப் பராமரிக்கும் அதே வேளையில் சுமூகமான செயல்பாடுகளை உறுதி செய்கிறது” என்று அவர் மேலும் கூறியுள்ளார்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
