ஐக்கிய அரபு அமீரகத்தில் 180 க்கும் மேலான நாடுகளிலிருந்து பலதரப்பட்ட மக்கள் தங்களின் வேலைக்கு ஏற்ப பல்வேறு ஊதியங்களுடன் பணிபுரிந்து வருகின்றனர். அவ்வாறு அமீரகத்தில் வசிக்கும் வெளிநாட்டவர்கள் மற்றும் குடிமக்கள் என சுமார் 50.46 சதவீதம் பேர் கடந்த ஆண்டில் தாங்கள் சம்பாதித்ததை விட அதிகமாக செலவழித்துள்ளதாக நாட்டின் நிதியியல் தொழில்நுட்ப தளம் நடத்திய கணக்கெடுப்பு ஒன்றில் கண்டுபிடிக்கப்பட்டுள்ளது.
Yabi’s Financial Health Report 2024 அறிக்கையின் படி, இந்த அதிகப்படியான செலவினங்கள் குறித்து கருத்து தெரிவித்தவர்களில், ஓய்வு பெறுவதற்குப் போதுமான நிதியை வைத்திருப்பதாக சுமார் 33.53 சதவீதம் பேர் மட்டுமே தெரிவித்ததாகவும், இது நிதிப் பாதுகாப்பு மற்றும் தயார்நிலையின் பற்றாக்குறையை அடிக்கோடிட்டுக் காட்டுவதுடன், இது பிற்காலத்தில் குடியிருப்பாளர்கள் பலரை பாதிக்கலாம் என்று தெரியவந்துள்ளது.
அதேசமயம், சுமார் 41 சதவீத அமீரகக் குடியிருப்பாளர்கள் அவர்களின் நீண்ட கால நிதி இலக்கை அடைவது பற்றி எந்த நம்பிக்கையும் இல்லை என்று தெரிவித்துள்ளனர். இது நிதி திட்டமிடல் மற்றும் எதிர்காலத்திற்கான ஸ்திரத்தன்மையைச் சுற்றியுள்ள பரவலான நிச்சயமற்ற தன்மையை அடிக்கோடிட்டுக் காட்டுவதாகவும் அந்த அறிக்கையில் கூறப்பட்டுள்ளது.
சேமிப்பு மற்றும் முதலீட்டின் முக்கியத்துவத்தைப் புரிந்துகொள்வதை அடிப்படையாக கொண்டு நடத்தப்பட்ட இந்த கணக்கெடுப்பில் பதிலளித்தவர்களில் 63 சதவீதத்திற்கும் அதிகமானோர் தங்கள் பில்களை சரியான நேரத்தில் செலுத்த முடிந்தாலும், பாதி பேர் மட்டுமே வருமானம் இல்லாமல் இரண்டு வாரங்கள் அல்லது அதற்கும் குறைவாக தங்கள் செலவுகளைத் தக்க வைத்துக் கொள்ள முடியும் என்று தெரிவித்துள்ளனர்.
இந்த ஆய்வில் வெளியான முடிவுகள் அமீரக குடியிருப்பாளர்களின் நிதிப் பாதுகாப்பில் ஒரு பாதிப்பை எடுத்துக்காட்டுவதுடன் மக்கள் மத்தியில் சிறந்த நிதிக் கல்வி மற்றும் பட்ஜெட் மேலாண்மை திறன்களுக்கான அவசரத் தேவையை அடிக்கோடிட்டுக் காட்டுவதாகவும் நிபுணர்கள் கூறுகின்றனர்.
அதிகமாக செலவழிப்பதற்கான காரணம்
நிபுணர்களின் கூற்றுப்படி, குடியிருப்பாளர்கள் சம்பாதிப்பதை விட அதிகமாக செலவழிப்பதற்கு மூன்று பெரிய காரணங்கள் உள்ளன. முதலாவதாக, துபாய் போன்ற ஒரு நகரத்தில், கிளப்புகள், ஈர்ப்புகள் மற்றும் பலவற்றில் எப்போதும் விளையாட ஏதாவது இருக்கும்.
இரண்டாவதாக, மற்றவர்கள் முன்பு தோற்றத்தைப் பராமரிக்க நிறைய அழுத்தம் உள்ளது, எனவே மக்கள் தங்களால் எளிதாக வாங்க முடியாத சொகுசு கார்கள் மற்றும் டிசைனர் கைப்பொருட்கள் போன்றவற்றை வாங்குவதில் தங்களது சம்பளத்தை செலவழிக்கின்றனர்.
கடைசியாக, கிரெடிட் கார்டுகள் மற்றும் ‘buy-now-pay-later’ விருப்பங்கள் அநாவசியமாக குடயிருப்பாளர்களை செலவழிக்கத் தூண்டுகின்றன. இதனால், மக்கள் முன்பணம் செலுத்த முடியாவிட்டாலும், கடனில் பொருட்களை வாங்கி குவிக்கின்றனர். இது அவர்களுக்கு கூடுதல் சுமையாக அமைந்து விடுகிறது.
எனவே, குடியிருப்பாளர்கள் தங்கள் செலவுப் பழக்கத்தை மறுபரிசீலனை செய்ய வேண்டும் மற்றும் பிறருக்காக அல்லாமல் அவரவர் வழிகளில் வாழ்வதில் கவனம் செலுத்த வேண்டும் என்று நிபுணர்கள் வலியுறுத்துகின்றனர். சேமிப்பு மற்றும் முதலீட்டின் முக்கியத்துவத்தை பலர் இப்போது புரிந்து கொண்டாலும், துரதிர்ஷ்டவசமாக, ஒவ்வொரு மாதமும் தங்கள் வருமானம் எங்கு செல்கிறது என்பதைத் தெளிவாகத் தெரியாத பலர் இன்னும் உள்ளதாகவும் நிபுணர்கள் கருதுகின்றனர்.
நிதி ஆலோசகர்களின் கூற்றுப்படி, மக்கள் மாதச் சம்பளத்தில் குறைந்தது 20 சதவீதத்தையாவது சேமிக்க வேண்டும். இது எதிர்காலத்தில் நிதிச் சிக்கல்களை எதிர்கொண்டால், இது ஒரு உயிர்காக்கும் கருவியாக் இருக்கும். சேமித்து வைக்கும் அவசரகால நிதியானது மூன்று முதல் ஆறு மாதங்கள் வரை நிலையான செலவுகளை ஈடுகட்டும் அளவில் இருக்க வேண்டும்.
50/30/20 பட்ஜெட் விதி
துபாய் போன்ற பரபரப்பான நகரத்தில் வாழும் போது குறிப்பாக பணப்புழக்கம் கணிக்க முடியாத மாதங்களில், நிதி ரீதியாக ஒழுங்கமைக்கப்படுவது மிகவும் முக்கியமானது என்று நிதி ஆலோசகர்கள் வலியுறுத்துகின்றனர். அவ்வாறு நிதியை சிறப்பாகத் திட்டமிட ‘பட்ஜெட்டின் 50/30/20 விதி’ ஆனது உதவும். இதில் பின்வரும் உதவிக்குறிப்புகள் கூறப்பட்டுள்ளது:
- வாடகை அல்லது அடமானக் கொடுப்பனவுகள், பயன்பாட்டு பில்கள், எரிபொருள் மற்றும் கல்வி போன்ற நிலையான செலவுகள் அல்லது தேவைகளுக்கு மாத வருமானத்தில் 50 சதவீதத்தை ஒதுக்கவும்.
- தனிப்பட்ட விருப்பங்களுக்கு 30 சதவீதத்தை எடுத்து வைக்கலாம், இதில் உணவு, ஷாப்பிங், சுய பாதுகாப்பு மற்றும் பிற விருப்பப்படி செலவுகள் ஆகியவை அடங்கும்.
- மீதமுள்ள 20 சதவீதத்தை சேமிக்கவும் அல்லது முதலீடு செய்யவும், இதை நிதி இலக்குகள் மற்றும் எதிர்கால திட்டங்களுடன் சீரமைக்க வேண்டும்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
