அமெரிக்காவை தளமாகக் கொண்ட ஜோபி ஏவியேஷன் (Joby Aviation) நிறுவனத்தின் முதல் ஏர் டாக்ஸியின் வெற்றிகரமான சோதனை ஓட்டத்தின் மூலம், எதிர்கால நகர்ப்புற போக்குவரத்தை நோக்கி துபாய் ஒரு பெரிய அடியை எடுத்து வைத்துள்ளது. சாலைகள் மற்றும் போக்குவரத்து ஆணையத்துடன் (RTA) இணைந்து முடிக்கப்பட்ட இந்த சோதனை ஓட்டம், 2026 ஆம் ஆண்டுக்குள் கமெர்ஷியல் ஏர் டாக்ஸி சேவைகளைத் தொடங்குவதற்கு முக்கிய படியாகப் பார்க்கப்படுகிறது.
துபாய்-அல் அய்ன் சாலையில், மார்காமில் உள்ள துபாய் ஜெட்மேன் ஹெலிபேடில் (Dubai Jetman Helipad) உள்ள ஜோபியின் சோதனை மையத்தில் ஊடகங்கள் மற்றும் ஜோபியின் குழுவின் மூத்த உறுப்பினர்கள் மத்தியில் இந்த சோதனை நடத்தப்பட்டுள்ளது. இந்நிகழ்வின் போது eVTOL விமானம் அந்த இடம் மற்றும் அதனை சுற்றியுள்ள பாலைவனத்தின் மீது பல சுழல்களை நிறைவு செய்ததாகக் கூறப்படுகின்றது.
இது தொடர்பாக X தளத்தில் பதிவிட்ட துபாய் இளவரசர் ஷேக் ஹம்தான் பின் முகமது பின் ரஷீத் அல் மக்தூம் அவர்கள், இந்த சோதனைப் பயணம் 2026 ஆம் ஆண்டில் முழு அளவிலான விமான டாக்ஸி சேவைகளைத் தொடங்குவதற்கான பரந்த தயாரிப்புகளின் ஒரு பகுதியாகும், இது புதுமை மற்றும் எதிர்காலத்திற்குத் தயாராக உள்ள உள்கட்டமைப்பிற்கான உலகளாவிய மையமாக துபாயின் தொடர்ச்சியான உந்துதலைப் பிரதிபலிக்கிறது என்று கூறியுள்ளார். மேலும் “இந்த சாதனை தூரங்களைக் குறைக்கிறது, வாழ்க்கைத் தரத்தை மேம்படுத்துகிறது மற்றும் நிலையான நகர்ப்புற இயக்கத்தை மறுவரையறை செய்கிறது” என்றும் அவரது பதிவில் குறிப்பிட்டுள்ளார்.
RTAவின் இயக்குநர் ஜெனரல் மட்டார் அல் தாயர் கருத்துப்படி, ஏர் டாக்ஸி பயண நேரத்தை வெகுவாகக் குறைக்கும் பிரீமியம் சேவையை வழங்கும் என்று எதிர்பார்க்கப்படுகிறது. எடுத்துக்காட்டாக, துபாய் சர்வதேச விமான நிலையத்திலிருந்து பாம் ஜுமேரா வரை பயணம் செய்ய 12 நிமிடங்கள் மட்டுமே ஆகலாம், இந்த தூரத்தைக் கடக்க பொதுவாக காரில் சுமார் 45 நிமிடங்கள் ஆகும் என்பது குறிப்பிடத்தக்கது.
ஏர் டாக்ஸியின் சிறப்பம்சங்கள்:
- 320 கிமீ/மணி வேகத்தில் பறக்கும் மற்றும் 450 கிலோகிராம் வரை எடையைக் கையாளும் திறன் கொண்டது
- ஒரு பைலட் மற்றும் நான்கு பயணிகளை ஏற்றிச் செல்லும் திறன் கொண்டது
- ஹெலிகாப்டரை விட 100 மடங்கு அமைதியான வகையில் வடிவமைக்கப்பட்டுள்ளது.
- பூஜ்ஜிய உமிழ்வு மின்சார உந்துவிசையால் (VTOL-Verticle take-off and landing) இயக்கப்படுகிறது
முன்பதிவு, வழித்தடங்கள் மற்றும் விலை நிர்ணயம்
துபாய் சர்வதேச விமான நிலையம் மற்றும் துபாய் மெரினா இடையே திட்டமிடப்பட்ட முதல் பாதையுடன், பயணிகள் ஜோபி ஆப் வழியாக விமானங்களை முன்பதிவு செய்ய முடியும். எதிர்கால விரிவாக்கங்களில் டவுன்டவுன் துபாய் மற்றும் பாம் ஜுமேரா ஆகியவற்றில் நிறுத்தங்கள் அடங்கும்.
இது குறித்து ஜோபி ஏவியேஷனில் விமான OEM இன் தலைவர் டிடியர் பபடோபௌலோஸ் பேசுகையில், கட்டணங்கள் உயர்நிலை ரைடு-ஹெய்லிங் பயன்பாடுகளைப் போலவே இருக்கும் என்றும், விலைகள் காலப்போக்கில் குறையும் என்றும் தெரிவித்துள்ளார். மேலும், நிறுவனம் பல விமானங்களுடன் பிற எமிரேட்களுக்கு சேவைகளை விரிவுபடுத்த திட்டமிட்டுள்ளதாகவும் கூறியுள்ளார்.
இதற்கிடையில், அபுதாபியில், ஆர்ச்சர் ஏவியேஷன் 2025 ஆம் ஆண்டின் பிற்பகுதியில் அல்லது 2026 ஆம் ஆண்டின் தொடக்கத்தில் தனது சொந்தமான பறக்கும் டாக்ஸி சேவையைத் தொடங்கவும் செயல்பட்டு வருகிறது. இந்த லட்சிய முன்னேற்றங்களுடன், ஐக்கிய அரபு அமீரகம் உலகளாவிய போக்குவரத்து கண்டுபிடிப்புகளில் முன்னணியில் தன்னை நிலைநிறுத்திக் கொள்கிறது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
