துபாயின் பொது பூங்காக்கள் மற்றும் பொழுதுபோக்கு இடங்கள் தொடர்ந்து மக்களிடையே நல்ல வரவேற்பை பெற்று வருகின்றது. குறிப்பாக, 2025 ஆம் ஆண்டின் முதல் பாதியில் 16.7 மில்லியனுக்கும் அதிகமான பார்வையாளர்கள் இவ்விடங்களுக்கு வருகை தந்துள்ளனர். இது கடந்த ஆண்டு இதே காலகட்டத்துடன் ஒப்பிடும்போது 250,000 க்கும் அதிகமான அதிகரிப்பைப் பதிவு செய்துள்ளது. துபாய் முனிசிபாலிட்டியால் வெளியிடப்பட்ட சமீபத்திய புள்ளிவிவரங்கள், உலகத்தரம் வாய்ந்த சமூக மற்றும் ஓய்வு உள்கட்டமைப்பை வழங்குவதற்கான நகரத்தின் தொடர்ச்சியான முயற்சிகளை பிரதிபலிக்கின்றன.
பார்வையாளர்களின் இந்த கூர்மையான அதிகரிப்பு, வாழ்க்கைத் தரம், வெளிப்புற அனுபவங்கள் மற்றும் அனைத்தையும் உள்ளடக்கிய நகர்ப்புற வாழ்க்கைக்கான உலகளாவிய இடமாக துபாயின் வளர்ந்து வரும் ஈர்ப்பை எடுத்துக்காட்டுகிறது. குறிப்பாக, ஜபீல் பார்க், முஷ்ரிஃப் தேசிய பூங்கா, அல் சஃபா பார்க், அல் மம்சார் பீச் பார்க் மற்றும் க்ரீக் பார்க் போன்ற நகரத்தின் ஐந்து முதன்மை பூங்காக்கள் ஆகியவை மொத்தமாக 3.7 மில்லியன் பார்வையாளர்களை வரவேற்றதாகக் கூறப்பட்டுள்ளது. மேலும் 11.4 மில்லியன் மக்கள் நகரத்தின் 211 சுற்றுப்புற பூங்காக்களைப் பார்வையிட்டுள்ளனர். குர்ஆனிக் பூங்கா 813,000 பார்வையாளர்களைப் பெற்றது, அதே நேரத்தில் புகழ்பெற்ற துபாய் ஃபிரேம் மற்றும் சில்ட்ரென் சிட்டி முறையே 748,000 மற்றும் 51,000 பார்வையாளர்களை ஈர்த்துள்ளன.
இது குறித்து துபாய் முனிசிபாலிட்டியின் பொது வசதிகள் நிறுவனத்தின் தலைமை நிர்வாக அதிகாரி பதேர் அன்வாஹி பேசுகையில்,“பூங்காக்கள் மற்றும் பொழுதுபோக்கு பகுதிகளை மேம்படுத்துவதில் தொடர்ந்து செய்யப்படும் முதலீடுகள், ஓய்வு, கலாச்சாரம் மற்றும் சமூக ஈடுபாட்டை இணைப்பதோடு ஆண்டு முழுவதும் துபாயில் பார்வையிடக்கூடிய முக்கிய இடங்களாக மாற்றியுள்ளன. வாழ்க்கைத் தரத்தை மேம்படுத்தும், துபாயின் லட்சியங்களுடன் ஒத்துப்போகும் மற்றும் உலகம் முழுவதிலுமிருந்து பார்வையாளர்களை ஈர்க்கும், இடங்களை உருவாக்குவதற்கான எங்கள் முயற்சிகளை இந்த வலுவான எண்ணிக்கை பிரதிபலிக்கிறது” என்று வலியுறுத்தியுள்ளார்.
அத்துடன் பூங்காக்கள் நகரத்தின் நகர்ப்புற மேம்பாட்டு மாதிரியின் ஒரு முக்கிய அங்கமாகும், புதுமை, சிந்தனைமிக்க வடிவமைப்பு மற்றும் அணுகல் மூலம் பொது மகிழ்ச்சியுடன் நிலைத்தன்மையை சமநிலைப்படுத்துகின்றன என்று அவர் மேலும் கூறியுள்ளார். சர்வதேச நகர்ப்புற திட்டமிடல் மற்றும் நிலைத்தன்மை தரநிலைகளுக்கு ஏற்ப கட்டமைக்கப்பட்ட துபாயின் பூங்காக்கள் குடியிருப்பாளர்கள் மற்றும் பார்வையாளர்களின் மன மற்றும் உடல் நலனுக்கு கணிசமாக பங்களிக்கின்றன. துபாய் நகர்ப்புற திட்டம் 2040, துபாய் வாழ்க்கைத் தர உத்தி 2033 மற்றும் ‘Dubai Walk’ திட்டம் போன்ற முக்கிய மூலோபாய முயற்சிகளையும் அவர்கள் ஆதரிக்கின்றனர்.
அதுமட்டுமின்றி, பசுமையான இடங்கள் கலாச்சார மற்றும் சமூக மையங்களாகவும் உருவாகியுள்ளன. 2025 ஆம் ஆண்டின் முதல் பாதியில் மட்டும், துபாயின் பொது பூங்காக்களில் 1,485 க்கும் மேற்பட்ட நிகழ்வுகள் நடத்தப்பட்டன, இதில் விளையாட்டு, கலாச்சார நிகழ்ச்சிகள், பொழுதுபோக்கு நிகழ்ச்சிகள் மற்றும் சமூக முயற்சிகள் அடங்கும். துபாய் முனிசிபாலிட்டி தற்போது எமிரேட் முழுவதும் 220 க்கும் மேற்பட்ட பூங்காக்கள் மற்றும் பொழுதுபோக்கு பகுதிகளை மேற்பார்வையிடுகிறது. நவீன வசதிகளுடன் பொருத்தப்பட்டு, பல்வேறு மக்கள்தொகைக்கு ஏற்றவாறு வடிவமைக்கப்பட்ட இந்த இடங்கள், நிலைத்தன்மை, சுற்றுலா, பொது சுகாதாரம் மற்றும் சிறப்பான நகர்ப்புற வாழ்க்கைக்கான நகரத்தின் இலக்குகளை ஆதரிப்பதில் முக்கிய பங்கு வகிக்கின்றன.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
