சர்வதேச சுற்றுலாப் பயணிகளுக்காக சவுதி அரேபியா ஒரு புதிய VAT எனும் மதிப்பு கூட்டப்பட்ட வரியை திரும்பப் பெறும் திட்டத்தை சமீபத்தில் அறிமுகப்படுத்தியுள்ளது, இது தகுதியான கொள்முதல்களில் 15% மதிப்பு கூட்டப்பட்ட வரியை (VAT) திரும்பப் பெற அனுமதிக்கிறது. சவூதியின் ஜகாத், வரி மற்றும் சுங்க ஆணையத்தால் (Zakat, Tax and Customs Authority- ZATCA) தொடங்கப்பட்ட இந்த முயற்சி ஏப்ரல் 18, 2025 அன்று நடைமுறைக்கு வந்தது. இது சுற்றுலா மற்றும் ஷாப்பிங் இரண்டிற்கும் சவுதி அரேபியாவை மிகவும் கவர்ச்சிகரமான இடமாக மாற்றுவதற்கான நாட்டின் முயற்சிகளின் ஒரு பகுதியாகும்.
முதல் கட்டத்தில், இந்த சேவை மூன்று முக்கிய சர்வதேச விமான நிலையங்களில் கிடைக்கிறது. அவை ரியாத்தில் உள்ள கிங் காலித் சர்வதேச விமான நிலையம், ஜித்தாவில் உள்ள கிங் அப்துல்அஜிஸ் சர்வதேச விமான நிலையம் மற்றும் தம்மமில் உள்ள கிங் ஃபஹத் சர்வதேச விமான நிலையம் ஆகியவை அடங்கும். அத்துடன் VAT திரும்பப் பெறும் செயல்முறையை சவுதி அரசாங்கத்தால் அங்கீகரிக்கப்பட்ட சர்வதேச சேவை வழங்குநரான குளோபல் ப்ளூ நிர்வகிக்கிறது என்று தெரிவிக்கப்பட்டுள்ளது.
எவ்வாறாயினும், பணத்தைத் திரும்பப் பெற, சுற்றுலாப் பயணிகள் சில நிபந்தனைகளை பூர்த்தி செய்ய வேண்டும். அவர்கள் 18 வயது அல்லது அதற்கு மேற்பட்டவர்களாக இருக்க வேண்டும், சவுதி குடிமகனாகவோ அல்லது குடியிருப்பாளராகவோ (residents) இருக்கக்கூடாது, மேலும் வரி பணத்தைத் திரும்பப் பெறுவதைத் தகுதியற்றவர்களாகக் கருதும் எந்த அரசாங்கப் பட்டியலிலும் இருக்கக்கூடாது.
அதேபோல், VAT பணத்தைத் திரும்பப் பெற, சுற்றுலாப் பயணிகள் குளோபல் ப்ளூவால் சான்றளிக்கப்பட்ட கடைகளில் ஷாப்பிங் செய்ய வேண்டும். இந்தக் கடைகள் தங்கள் சான்றிதழைக் குறிக்கும் ஒரு அடையாளத்தைக் காட்டுகின்றன என கூறப்பட்டுள்ளது. மேலும் பொருட்கள் வாங்கும் நேரத்தில், சுற்றுலாப் பயணி தங்கள் பாஸ்போர்ட் அல்லது GCC ஐடியை வழங்க வேண்டும், இதனால் பரிவர்த்தனையை அவர்களின் அதிகாரப்பூர்வ ஆவணங்களுடன் இணைக்க முடியும் என்றும் இதனையடுத்து ஒரு சிறப்பு ‘Tourist Tax Refund Invoice’ கடையால் வழங்கப்படும் என்றும் கூறப்பட்டுள்ளது. வரி திரும்பப்பெறும் படிவத்தை ஆரம்பத்தில் கோராமல் ஒரே கடையில் இருந்து பொருட்கள் வழங்கப்பட்டால், சுற்றுலாப் பயணிகள் ஒரே நாளில் செய்யப்பட்ட மூன்று இன்வாய்ஸ்களை இணைத்து குறைந்தபட்ச தகுதித் தொகையைப் பெறலாம், அதாவது நீங்கள் SAR500 (489 திர்ஹம்ஸ்) க்கு மேல் ஷாப்பிங் செய்தால் உங்கள் பணத்தைத் திரும்பப் பெறலாம்.
மேலும் நாட்டை விட்டு வெளியேறுவதற்கு முன், சுற்றுலாப் பயணிகள் விமான நிலையத்தில் உள்ள குளோபல் ப்ளூ சுய சரிபார்ப்பு கியோஸ்க்கிற்கு (Global Blue self-verification kiosk) செல்ல வேண்டும். அங்கு, அவர்கள் தங்கள் வரி திரும்பப்பெறும் கோரிக்கையைச் சமர்ப்பித்து, தங்கள் ஷாப்பிங் இன்வாய்ஸ்களை சரிபார்க்கலாம். கடிகாரங்கள் அல்லது நகைகள் போன்ற அதிக மதிப்புள்ள பொருட்களின் விஷயத்தில், சுங்க ஒப்புதல் (manual custom approval) தேவைப்படலாம் என்றும் கூறப்பட்டுள்ளது.
செக்-இன் செயல்பாட்டின் போது அவை பரிசோதிக்கப்பட வேண்டியிருக்கலாம் என்பதால், தகுதியான அனைத்து பொருட்களும் செக்-இன் லக்கேஜ்களில் வைக்காமல், ஹேண்ட் லக்கேஜில் எடுத்துச் செல்லப்பட வேண்டும் என்பதை கவனத்தில் கொள்ள வேண்டும். சுற்றுலாப் பயணிகள் அசல் விலைப்பட்டியல்கள், பாஸ்போர்ட் மற்றும் போர்டிங் பாஸ் அல்லது டிக்கெட் போன்ற விமானம் தொடர்பான ஆவணங்களையும் எடுத்துச் செல்ல வேண்டும்.
சரிபார்ப்புச் செயல்பாட்டின் போது, பயணிகள் பணத்தைத் திரும்பப் பெற விரும்பும் முறையைத் தேர்வு செய்யலாம். பணத்தைத் திரும்பப் பெறும் தொகை SAR 5,000 க்கும் குறைவாக இருந்தால், அதை ரொக்கமாகவும் வழங்கலாம். இந்த வரம்பிற்கு மேல் பணத்தைத் திரும்பப் பெறுவதற்கு, தொகை சவுதி அரேபியாவிற்கு வெளியே வழங்கப்படும் கிரெடிட் அல்லது டிஜிட்டல் அட்டைக்கு மாற்றப்படும். அட்டை விமான நிலைய கியோஸ்கில் சமர்ப்பிக்கப்பட வேண்டும், மேலும் பணத்தைத் திரும்பப் பெறுவது பொதுவாக மூன்று வணிக நாட்களுக்குள் செயல்படுத்தப்படும்.
தனிப்பட்ட பயன்பாட்டிற்காக வாங்கப்பட்ட மற்றும் சவுதி அரேபியாவிற்குள் பயன்படுத்தப்படாத பொருட்கள் மட்டுமே VAT பணத்தைத் திரும்பப் பெற தகுதியுடையவை. இந்தப் பொருட்கள் அவற்றின் அசல் பேக்கேஜிங்கில் இருக்க வேண்டும் மற்றும் வாங்கிய தேதியிலிருந்து 90 நாட்களுக்குள் நாட்டிற்கு வெளியே கொண்டு செல்லப்பட வேண்டும் என்றும் குறிப்பிடப்பட்டுள்ளது. இந்தப் புதிய VAT பணத்தைத் திரும்பப் பெறும் முறை சுற்றுலாப் பயணிகளிடையே அதிக ஷாப்பிங்கை ஊக்குவிக்கும் மற்றும் சவுதி அரேபியாவில் ஒட்டுமொத்த பார்வையாளர் அனுபவத்தை மேம்படுத்தும் என்று எதிர்பார்க்கப்படுகிறது.
இது போன்ற வளைகுடா நாடுகளின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
