சமீபத்தில் நடைபெற்ற பிக் டிக்கெட்டின் வாராந்திர இ-டிராவில் இந்தியாவை சேர்ந்த டாக்ஸி ஓட்டுநர் ஒருவருக்கு 250 கிராம் எடையுள்ள 24 காரட் தங்கக் கட்டி பரிசாக அறிவிக்கப்பட்டுள்ளது. இதன் மதிப்பு 120,000 திர்ஹம்ஸ் ஆகும். கிட்டத்தட்ட 15 வருடங்களாக அபுதாபியில் வசித்து வரும் பிரமோத் என்பவர் தான் அந்த அதிர்ஷ்டசாலி வெற்றியாளர். கேரளாவைப் பூர்விகமாகக் கொண்ட 43 வயதான இவர், ‘Buy One, Get One Free’ சலுகையின் கீழ் பெற்ற இலவச டிக்கெட் மூலம் அதிர்ஷ்ட நுழைவைப் பெற்றார் என்பது குறிப்பிடத்தக்கது.
நேரலை டிராவின் போது அவரது 372378 என்ற டிக்கெட் எண் அறிவிக்கப்பட்டது. மேலும், தொகுப்பாளர் ரிச்சர்ட் அழைத்தபோது, பிரமோத் உடனடியாக அவரது குரலை அடையாளம் கண்டு, “பிக் டிக்கெட்டா? நான் இப்போது நேரலையில் இருக்கிறேனா?” என்று உற்சாகமாகக் கேட்டிருக்கிறார்.
அந்த நேரத்தில், அவர் பயணிகளை இறக்கிவிடுவதில் மும்முரமாக இருந்ததால், மேலும் செய்தியை உறுதிப்படுத்த யூடியூப்பைத் திறக்க முயன்றதாகவும், சில நிமிடங்கள் கழித்து, அவர் 120,000 திர்ஹம் மதிப்புள்ள தங்கத்தை வென்றதாக ரிச்சர்டிடமிருந்து உறுதிப்படுத்தல் வந்ததாகவும் பிரமோத் நினைவு கூர்ந்தார். மேலும், கேரளாவில் உள்ள அவரது குடும்பத்தினர் இந்த செய்தியால் மகிழ்ச்சியடைந்ததாகவும் அவர் தெரிவித்துள்ளார்.
கடந்த ஏழு ஆண்டுகளாக, பிரமோத்தும் அவரது பத்து நண்பர்களும் பிக் டிக்கெட்டை வாங்க ஒவ்வொரு மாதமும் பணத்தை சேகரித்து வருகின்றனர். இதற்கு முன்பு ஒருபோதும் வெற்றி பெறாத போதிலும், அவர்கள் நம்பிக்கையுடன் முயற்சி செய்திருக்கின்றனர், இறுதியாக போனஸ் டிக்கெட் மூலம் அதிர்ஷ்டம் கிடைத்துள்ளது.
இது குறித்து பிரமோத் பேசுகையில், “நாங்கள் வெற்றி பெற்றதை உணர்ந்தபோது, என்னால் அதை நம்ப முடியவில்லை. நான் ஏழு ஆண்டுகளாக முயற்சி செய்து வருகிறேன், இது எனது முதல் வெற்றி” என்று உற்சாகத்தை வெளிப்படுத்தியுள்ளார். மேலும், அவர் பேசிய போது, “நானும் என் நண்பர்களும் தொடர்ந்து பங்கேற்போம்” என்றும் கூறியுள்ளார்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
