ராஸ் அல் கோர் சாலையிலிருந்து அல் வர்கா 1 ஸ்ட்ரீட்டுக்கான நுழைவாயில் டிசம்பர் 28, ஞாயிற்றுக்கிழமை அன்று தற்காலிகமாக மூடப்படவுள்ளதால், துபாய் வாகன ஓட்டிகள் மாற்றுப் பாதைகளைப் பயன்படுத்துமாறு சாலைகள் மற்றும் போக்குவரத்து ஆணையம் (RTA) அறிவுறுத்தியுள்ளது.
அல் வர்கா பகுதி அணுகல் மற்றும் வெளியேறும் மேம்பாட்டுத் திட்டத்தின் கீழ் நடைபெற்று வரும் சாலைப் பணிகள் காரணமாக, இந்த மூடல் ஞாயிற்றுக்கிழமை அதிகாலை 1 மணிக்குத் தொடங்கி, டிசம்பர் 29, திங்கட்கிழமை அதிகாலை 1 மணி வரை 24 மணி நேரம் நீடிக்கும் என்று அறிவிக்கப்பட்டுள்ளது.
எனவே, இந்த மூடல் காலத்தில், அல் வர்கா 1 பகுதிக்குச் செல்லும் வாகன ஓட்டிகள் ஷேக் முகமது பின் சையத் சாலை, அல்ஜீரியா ஸ்ட்ரீட் மற்றும் டிரிப்போலி ஸ்ட்ரீட் வழியாக செல்லுமாறு கேட்டுக்கொள்ளப்படுகிறார்கள். அல் வர்காவில் நடைபெறும் பரந்த உள்கட்டமைப்பு மேம்படுத்தல் பணிகளின் ஒரு பகுதியே இந்த பணிகள் என்று RTA தெரிவித்துள்ளது. இந்த பணிகள் இந்த ஆண்டின் இறுதிக்குள் நிறைவடையும் என்று எதிர்பார்க்கப்படுகிறது.
இந்தத் திட்டத்தில் ஷேக் முகமது பின் சையத் சாலையிலிருந்து அல் வர்காவிற்கு ஒரு புதிய நேரடி நுழைவு மற்றும் வெளியேறும் பாதை, அல் வர்கா 1 தெருவின் மேம்படுத்தல் மற்றும் போக்குவரத்து நெரிசலைக் குறைக்கும் வகையில் வடிவமைக்கப்பட்ட சிக்னல் சந்திப்புகளுடன் தற்போதுள்ள ரவுண்டானாகளுக்குப் பதிலாக புதிய சந்திப்புகளை அமைத்தல் ஆகியவை அடங்கும். கூடுதலாக, தெரு விளக்குகள் மற்றும் பார்க்கிங் வசதிகளிலும் மேம்பாடுகள் செய்யப்படுகின்றன.
இந்தத் திட்டம் நிறைவடைந்ததும், 350,000-க்கும் மேற்பட்ட குடியிருப்பாளர்கள் பயனடைவார்கள் என்றும், அல் வர்கா 1 ஸ்ட்ரீட்டின் போக்குவரத்து திறன் 30 சதவீதம் அதிகரிக்கும் என்றும், போக்குவரத்து நெரிசல் கணிசமாகக் குறையும் என்றும் எதிர்பார்க்கப்படுகிறது. அதுமட்டுமல்லாமல், பயண நேரம் சுமார் 20 நிமிடங்களிலிருந்து 3.5 நிமிடங்களாக, அதாவது 80 சதவீதம் குறையும் என்றும், பயண தூரம் 5.7 கிலோமீட்டரிலிருந்து 1.5 கிலோமீட்டராகக் குறைக்கப்படும் என்றும் கணிக்கப்பட்டுள்ளது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
