புர்ஜ் கலிஃபாவைச் சுற்றியுள்ள கொண்டாட்டங்களில் கலந்துகொள்ள 27 லட்சத்திற்கும் மேற்பட்ட மக்கள் பொதுப் போக்குவரத்தைப் பயன்படுத்துவார்கள் என எதிர்பார்க்கப்படுவதால், துபாய் தனது பரபரப்பான புத்தாண்டு கொண்டாட்ட நிகழ்வுகளில் ஒன்றுக்குத் தயாராகி வருகிறது.
வாணவேடிக்கைகளுக்கு முன்னும் பின்னும் போக்குவரத்து சீராக இருப்பதை உறுதி செய்வதற்காக, பொதுப் பேருந்துகள், டாக்ஸிகள், பார்க்கிங் இடங்கள் மற்றும் சாலை மூடல்கள் ஆகியவற்றை உள்ளடக்கிய ஒரு விரிவான போக்குவரத்துத் திட்டத்தை சாலைகள் மற்றும் போக்குவரத்து ஆணையம் (RTA) அறிவித்துள்ளது.
இலவச பேருந்துகள் மற்றும் டாக்ஸி வசதி
டவுன்டவுன் துபாய்க்குச் செல்லும் பார்வையாளர்கள், அல் வாஸ்ல் கிளப் மற்றும் அல் கிஃபாஃப் போன்ற நியமிக்கப்பட்ட பார்க்கிங் இடங்களை புர்ஜ் கலிஃபா பகுதியுடன் இணைக்கும் இலவச ஷட்டில் பேருந்துகளை பார்வையாளர்கள் பயன்படுத்தலாம். இந்த இடங்களில் டாக்ஸிகளும் கிடைக்கும். கொண்டாட்டங்களுக்குப் பிறகு, பார்வையாளர்களை மீண்டும் பார்க்கிங் இடங்களுக்கும் அருகிலுள்ள மெட்ரோ நிலையங்களுக்கும் அழைத்துச் செல்ல இலவச ஷட்டில் பஸ் சேவைகள் உடனடியாக இயக்கப்படும் என்று அதிகாரிகள் தெரிவித்துள்ளனர்.
மேலும், வானவேடிக்கை நிகழ்ச்சியில் கலந்துகொள்ளாத குடியிருப்பாளர்களுக்காக, அப்பகுதியில் போக்குவரத்து நெரிசலைக் குறைக்கும் வகையில், ஸ்விஸ்ஹோட்டல் அல் முரூஜ் துபாயிலிருந்து அல் வஸ்ல் கிளப் மற்றும் அல் கிஃபாஃப் பார்க்கிங் இடங்களுக்கு இலவச பேருந்துகள் இயக்கப்படும் என்றும் RTA கூறியுள்ளது.
அத்துடன் வாகன ஓட்டிகள் முன்கூட்டியே வந்து, துபாய் மால், ஜபீல்–துபாய் மால், ஃபவுண்டன் வியூ எக்ஸ்பேன்சன் மற்றும் பவுல்வர்டு லோயர் பார்க்கிங் உள்ளிட்ட Emaar பகுதிகளில் வாகனங்களை நிறுத்த அறிவுறுத்தப்படுகிறார்கள். அதேசமயம், ஷேக் சையத் சாலை, அல் கைல் சாலை, துபாய்–அல் அய்ன் சாலை, ஓத் மேத்தா சாலை மற்றும் டவுன்டவுன் துபாயைச் சுற்றியுள்ள சாலைகள் போன்ற முக்கிய சாலைகளில் பார்க்கிங் தடைசெய்யப்படும் என்றும் கூறப்பட்டுள்ளது.
கூடுதலாக, மத்தியப் பகுதிகளுக்கு வெளியே இருந்து வரும் பார்வையாளர்களுக்காக சுமார் 20,000 இடங்களைக் கொண்ட ‘பார்க்-அண்ட்-ரைடு’ இடங்களும் கிடைக்கும் என்று அதிகாரிகள் கூறியுள்ளனர்.
பொதுப் போக்குவரத்திற்கு முக்கியத்துவம்
இத்தனை வசதிகளுக்கு மத்தியில், 1,300 பேருந்துகள், 14,000 டாக்சிகள், 18,000 லிமோசின் வாகனங்கள் மற்றும் 64 மெட்ரோ மற்றும் டிராம் நிலையங்களில் செயல்பாடுகள் என பொதுப் போக்குவரத்து பெரும்பாலான கூட்டத்தைக் கையாளும் என்று RTA தெரிவித்துள்ளது. ஆகவே, ஒரு சுமூகமான பயண அனுபவத்திற்கு மெட்ரோ, டிராம் மற்றும் பேருந்து நெட்வொர்க்கை நம்பியிருக்குமாறு அதிகாரிகள் குடியிருப்பாளர்களையும் பார்வையாளர்களையும் கடுமையாக ஊக்குவித்துள்ளனர்.
சாலை மூடல்கள் மற்றும் மாற்று வழிகள்
இதற்கிடையில், ஷேக் சையத் சாலை, ஃபைனான்சியல் சென்டர் சாலை மற்றும் புர்ஜ் கலிஃபா ஸ்ட்ரீட் உள்ளிட்ட பல முக்கிய சாலைகள் பகுதி நேரமாகவோ அல்லது முழுமையாகவோ மூடப்படும் என்றும் அறிவிக்கப்பட்டுள்ளது. வாகன ஓட்டிகள் அல் கைல் சாலை, ஷேக் முகமது பின் சையத் சாலை, துபாய்–ஹத்தா சாலை மற்றும் அல் அய்ன் சாலை போன்ற மாற்று வழிகளைப் பயன்படுத்த அறிவுறுத்தப்படுகிறார்கள். அதேபோல், பொதுப் போக்குவரத்தைப் பயன்படுத்தும் ஓட்டுநர்கள், சென்டர்பாயிண்ட், எடிசலாட் பை இ&, ஜுமைரா கோல்ஃப் எஸ்டேட்ஸ் மற்றும் நேஷனல் பெயிண்ட்ஸ் உள்ளிட்ட பார்க்கிங் வசதிகளுடன் கூடிய மெட்ரோ நிலையங்களில் தங்கள் வாகனங்களை நிறுத்த ஊக்குவிக்கப்படுகிறார்கள்.
நிகழ்ச்சிக்குப் பிந்தைய போக்குவரத்து ஏற்பாடுகள்
கொண்டாட்டங்களுக்குப் பிறகு, விரைவான மற்றும் பாதுகாப்பான பயணத்தை உறுதி செய்வதற்காக, ஷட்டில் பேருந்துகளும் டாக்சிகளும் விரிவாக இயக்கப்படும். குறிப்பாக, அந்த இரவில் எதிர்பார்க்கப்படும் பெரும் கூட்டத்தை நிர்வகிக்கும் வகையில், நிகழ்வு நடைபெறும் பகுதியிலிருந்து மெட்ரோ நிலையங்கள் மற்றும் டாக்சி மண்டலங்களுக்குப் பார்வையாளர்களை ஏற்றிச் செல்ல இலவச RTA பேருந்துகள் இயக்கப்படும் என்பதையும் RTA உறுதிப்படுத்தியுள்ளது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
