துபாய் டியூட்டி ஃப்ரீ 2025-ஆம் ஆண்டில் 8.68 பில்லியன் திர்ஹம்ஸ் (2.38 பில்லியன் டாலர்) மொத்த விற்பனையைப் பதிவு செய்து, தனது வரலாற்றிலேயே மிகவும் வெற்றிகரமான ஆண்டை எட்டியுள்ளது. இது 2024-ஆம் ஆண்டை விட 9.85% வலுவான வளர்ச்சியைக் குறிக்கிறது, மேலும் இது துபாய் டியூட்டி ஃப்ரீயின் 42 ஆண்டுகால வரலாற்றில் மிக உயர்ந்த செயல்திறனாகும்.
இந்தச் சாதனை முடிவுகளுக்கு, பத்து மாதங்களின் சிறப்பான விற்பனையே முக்கியக் காரணம் என்றும், இதில் டிசம்பர் மாதம் முன்னணியில் இருப்பதாகவும் நிறுவனம் தெரிவித்துள்ளது. நிறுவனம் வெளியிட்டுள்ள விபரங்களின் படி, டிசம்பர் மாதத்தில் மட்டும் விற்பனை 922.77 மில்லியன் திர்ஹம்ஸ் (252.81 மில்லியன் டாலர்) ஆக இருந்தது என கூறப்பட்டுள்ளது. இது டிசம்பர் 2024-ஐ விட 12.27% அதிகம் எனவும் கூறப்படுகின்றது. டிசம்பர் 20 அன்று நடைபெற்ற துபாய் டியூட்டி ஃப்ரீயின் 42-வது ஆண்டுவிழாக் கொண்டாட்டத்தின் போது வழங்கப்பட்ட 25% தள்ளுபடி சலுகை, ஒரே நாளில் 69.1 மில்லியன் திர்ஹம்ஸ் (19 மில்லியன் டாலர்) வருவாயை ஈட்டியதாகத் தெரிவிக்கப்பட்டுள்ளது.
இது குறித்து துபாய் டியூட்டி ஃப்ரீயின் நிர்வாக இயக்குநர் ரமேஷ் சிதாம்பி கூறுகையில், இந்த வலுவான செயல்திறன், குழுவின் கடின உழைப்பு மற்றும் அர்ப்பணிப்புடன், சப்ளையர்கள் மற்றும் பிராண்ட் கூட்டாளர்களின் தொடர்ச்சியான ஆதரவையும் பிரதிபலிக்கிறது என்று குறிப்பிட்டுள்ளார். மேலும், ஆண்டு முழுவதும் வழிகாட்டிய தலைவர் ஷேக் அகமது பின் சையத் அல் மக்தூமுக்கும் அவர் நன்றி தெரிவித்துக் கொண்டார்.
பயணிகள் போக்குவரத்தை விட விற்பனை வேகமாக வளர்ந்துள்ளது
2025-ஆம் ஆண்டில், விற்பனை பயணிகளின் போக்குவரத்தை விட சுமார் 5% வேகமாக வளர்ந்திருப்பதாக மதிப்பிடப்பட்டுள்ளது. இது அதிக வாடிக்கையாளர்களை ஈர்க்கவும், ஒரு வாடிக்கையாளருக்கான செலவினத்தை அதிகரிக்கவும் துபாய் டியூட்டி ஃப்ரீ மேற்கொண்ட முயற்சிகளின் வெற்றியைக் காட்டுகிறது.
அதிகம் விற்பனையான பிரிவுகள்
வாசனை திரவியங்களே தொடர்ந்து அதிகம் விற்பனையாகும் பிரிவாக இருந்து, 1.6 பில்லியன் திர்ஹம்ஸ் வருவாய் ஈட்டி, மொத்த விற்பனையில் 18.45% பங்களித்ததாகக் கூறப்படுகிறது. மதுபானங்கள் 1.06 பில்லியன் திர்ஹம்ஸ் பங்களித்து அடுத்த இடத்தில் இருப்பதாகவும், அதே நேரத்தில் தங்க விற்பனை 896.46 மில்லியன் திர்ஹம்ஸை எட்டியது எனவும் கூறப்பட்டுள்ளது. புகையிலை பொருட்கள் மற்றும் மிட்டாய் வகைகளும் சிறப்பான விற்பனையைப் பதிவு செய்துள்ளன. பேச்சி பிஸ்தா குனாஃபா பார் மற்றும் ஹபீபே சாக்லேட் (Patchi Pistachio Kunafa Bar and Habibe Chocolate) போன்ற பிரத்யேக தயாரிப்புகள் உட்பட துபாய் சாக்லேட்டுகளால் விற்பனை அதிகரித்தது. ஆன்லைன் விற்பனை 230.06 மில்லியன் திர்ஹம்ஸை எட்டியது, இது மொத்த வருவாயில் 2.65% ஆகும்.
விமான நிலையங்கள் முழுவதும் வலுவான செயல்பாடு
2025-ஆம் ஆண்டில், துபாய் டியூட்டி ஃப்ரீ 21 மில்லியனுக்கும் அதிகமான பரிவர்த்தனைகளைப் பதிவு செய்தது, இது ஒரு நாளைக்கு சராசரியாக 58,000-க்கும் அதிகமாகும். பெரும்பாலான விற்பனை புறப்பட்டுச் செல்லும் பயணிகளிடமிருந்து வந்தாலும், வருகை தரும் பயணிகளும் கணிசமாகப் பங்களித்தனர் என கூறப்படுகின்றது. ஆண்டின் பத்து மாதங்கள் புதிய மாதாந்திர சாதனைகளைப் படைத்தன, இது துபாய் சர்வதேச விமான நிலையம் மற்றும் அல் மக்தூம் சர்வதேச விமான நிலையம் ஆகிய இரண்டிலும் சீரான தேவையையும் வலுவான செயல்திறனையும் காட்டுகிறது எனவும் கூறப்பட்டுள்ளது.
ஒட்டுமொத்தமாக, இந்த முடிவுகள் வலுவான வாடிக்கையாளர் தேவை, திறமையான உத்திகள் மற்றும் தொடர்ச்சியான வளர்ச்சி ஆகியவற்றின் ஆதரவுடன், பயண சில்லறை வர்த்தகத்தில் துபாய் டியூட்டி ஃப்ரீ ஒரு உலகளாவிய தலைவராகத் திகழும் நிலையை உறுதிப்படுத்துகின்றன.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
