துபாய் சர்வதேச விமான நிலையத்தில் (DXB) பார்க்கிங் செய்வது இனி எளிதாகவும் வேகமாகவும் மாற உள்ளது. ஏனெனில், துபாய் ஏர்போர்ட்ஸும் சாலை சுங்கக் கட்டணச் சேவை நிறுவனமான சாலிக்கும், விமான நிலையத்தின் அனைத்து கார் பார்க்கிங் பகுதிகளிலும் தடையற்ற இ-வாலட் கட்டண முறையை அறிமுகப்படுத்துவதற்காக ஒரு நீண்ட கால ஒப்பந்தத்தில் கையெழுத்திட்டுள்ளதாக அறிவிக்கப்பட்டுள்ளது.
துபாய் ஏர்போர்ட்ஸின் தலைவர் ஷேக் அகமது பின் சயீத் அல் மக்தூம் மற்றும் சாலிக்கின் தலைவர் மத்தார் அல் தயர் ஆகியோர் முன்னிலையில் கையெழுத்தான இந்த 10 ஆண்டு ஒப்பந்தத்தின்படி, சாலிக்கின் இ-வாலட் அமைப்பு ஜனவரி 22, 2026 முதல் செயல்படுத்தப்படும் என்பது தெரிய வந்துள்ளது.
இந்த ஒப்பந்தத்தின் கீழ், டெர்மினல்கள் 1, 2, 3 மற்றும் கார்கோ மெகா டெர்மினலில் உள்ள 7,400 கட்டண பார்க்கிங் இடங்கள் முழுவதும் சாலிக்கின் இ-வாலட் கட்டண முறை கிடைக்கும். எனவே, ஓட்டுநர்கள் கார் நிறுத்துமிடங்களுக்குள் நுழைந்து வெளியேறும்போது, ரொக்கப் பணம் செலுத்த நிற்காமல், ஏற்கனவே உள்ள சாலிக் கணக்குகள் மூலம் நேரடியாக பணம் செலுத்த முடியும் என்று கூறப்படுகிறது.
மேலும், சாலிக் தனது அமைப்பை துபாய் ஏர்போர்ட்ஸின் தற்போதைய பார்க்கிங் மேலாண்மை அமைப்புடன் ஒருங்கிணைக்கும், இது சீரான போக்குவரத்து ஓட்டம், விரைவான வெளியேற்றம் மற்றும் முழுமையான டிஜிட்டல் பார்க்கிங் அனுபவத்தை வழங்கும் என்று கூறப்பட்டுள்ளது.
இது எவ்வாறு செயல்படும்?
அதிகாரிகளின் கூற்றுப்படி, இ-வாலட் அமைப்பின் ஒருங்கிணைப்பு, செயல்பாடு மற்றும் பராமரிப்பு ஆகியவற்றை சாலிக் கையாளும், அதே நேரத்தில் துபாய் ஏர்போர்ட்ஸ் சாலிக்கிற்கு இணையாக பல கட்டண விருப்பங்களையும் தொடர்ந்து வழங்கும் என்று உறுதிப்படுத்தப்பட்டுள்ளது. இந்த புதிய அமைப்பு டெர்மினல்களை சுற்றியுள்ள போக்குவரத்து நெரிசலைக் குறைத்து, உச்ச நேரங்களில் வாகனங்களின் இயக்கத்தை மேம்படுத்தும் என்று எதிர்பார்க்கப்படுகிறது.
துபாயின் ஸ்மார்ட் போக்குவரத்து இலக்குகளுக்கு ஆதரவு
இது குறித்து சாலிக்கின் தலைமைச் செயல் அதிகாரி இப்ராஹிம் சுல்தான் அல் ஹடாத் பேசுகையில், இந்த கூட்டாண்மை நிறுவனத்தின் சுங்கக் கட்டண வசூலுக்கு அப்பாற்பட்ட விரிவாக்கத்திற்கு ஆதரவளிக்கிறது என்றும், அமீரகம் முழுவதும் ஸ்மார்ட் மற்றும் நிலையான போக்குவரத்து தீர்வுகளில் அதன் பங்கை வலுப்படுத்துகிறது என்றும் கூறியுள்ளார். ஏற்கனவே 4.7 மில்லியனுக்கும் அதிகமான வாகனங்கள் சாலிக் கணக்குகளுடன் இணைக்கப்பட்டுள்ளதால், இந்த அமைப்பு பெரும்பாலான ஓட்டுநர்களுக்கு ஒரு பழக்கமான மற்றும் வசதியான விருப்பத்தை வழங்குகிறது என்பது குறிப்பிடத்தக்கது.
அவரைத் தொடர்ந்து துபாய் ஏர்போர்ட்ஸின் தலைமைச் செயல் அதிகாரி பால் கிரிஃபித்ஸ் பேசிய போது, பார்க்கிங் என்பது பயணிகளின் பயணத்தில் ஒரு முக்கிய பகுதியாகும் என்றும், இந்த நடவடிக்கை வரிசைகளைக் குறைத்து, வசதியை மேம்படுத்தி, தடையற்ற, டிஜிட்டல் பயண அனுபவங்கள் குறித்த DXB-யின் தொலைநோக்குப் பார்வைக்கு ஆதரவளிக்கும் என்றும் தெரிவித்துள்ளார்.
டிஜிட்டல் மயமாகும் ஒரு பரபரப்பான மையம்
DXB உலகின் பரபரப்பான விமான நிலையங்களில் ஒன்றாக அதன் நிலையைத் தொடர்கிறது, இது ஜூலை மற்றும் செப்டம்பர் மாதங்களுக்கு இடையில் 24.2 மில்லியன் பயணிகளையும், 2025 ஆம் ஆண்டின் முதல் ஒன்பது மாதங்களில் 70.1 மில்லியன் விருந்தினர்களையும் கையாண்டுள்ளது. தொடர்ந்து அதிக போக்குவரத்து உள்ள இந்த நேரத்தில், சாலிக் உடனான இந்த கூட்டாண்மை விமான நிலைய அணுகலை மேலும் சீரமைக்கும் என்று எதிர்பார்க்கப்படுகிறது.
மேலும், இந்த நடவடிக்கை துபாயின் பரந்த ஸ்மார்ட் சிட்டி லட்சியங்களுடன் ஒத்துப்போவதாக அதிகாரிகள் குறிப்பிடுகின்றனர்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
