அபுதாபியைத் தளமாகக் கொண்டு இயங்கிவரும் எதிஹாட் ஏர்வேஸ், கடந்த 2025-ல் சுமார் 22.4 மில்லியன் பயணிகளை ஏற்றிச் சென்றதாக அறிவிக்கப்பட்டுள்ளது. இது முந்தைய ஆண்டை விட 21 சதவீதம் அதிகரிப்பாகும், மேலும் இது அந்த விமான நிறுவனத்தின் வரலாற்றில் மிக உயர்ந்த வருடாந்திர எண்ணிக்கை எனவும் கூறப்படுகின்றது.
ஐக்கிய அரபு அமீரகத்தின் தேசிய விமான நிறுவனமான எதிஹாட் ஏர்வேஸ், அந்த ஆண்டிற்கான பயணிகள் சுமை விகிதத்தை 88.3 சதவீதமாகப் பதிவு செய்தது. இது 2024-ஐ விட 2 சதவீதப் புள்ளிகள் அதிகமாகும். இது அதன் விரிவடைந்து வரும் உலகளாவிய வலையமைப்பு முழுவதும் வலுவான தேவை மற்றும் மேம்பட்ட வணிகச் செயல்திறனைப் பிரதிபலிக்கிறது எனக் கூறப்பட்டுள்ளது.
குறிப்பாக, கடந்த ஆண்டின் இறுதியில் வளர்ச்சி வலுவாக இருந்தது என தெரிவிக்கப்பட்டுள்ளது. டிசம்பர் 2025-ல் மட்டும், எதிஹாட் 2.2 மில்லியன் பயணிகளை ஏற்றிச் சென்றது. இது டிசம்பர் 2024-ஐ விட 28 சதவீதம் அதிகமாகும். உச்ச பயணக் காலத்தின் போது இருக்கை நிரம்பல் விகிதம் 87.6 சதவீதத்தை எட்டியதாகக் கூறப்பட்டுள்ளது.
அதுமட்டுமல்லாமல், 2025-ல் ஐக்கிய அரபு அமீரகத்தின் மொத்த பயணிகள் போக்குவரத்து அதிகரிப்பில் சுமார் பாதியளவு எதிஹாட்டின் பங்களிப்பாக இருந்தது என்று அந்த விமான நிறுவனம் கூறியுள்ளது. இது அபுதாபியின் சுற்றுலா மற்றும் பொருளாதார இலக்குகளை ஆதரிப்பதில் அந்த விமான நிறுவனத்தின் முக்கியப் பங்கை அடிக்கோடிட்டுக் காட்டுகிறது.
ஐக்கிய அரபு அமீரக விமான நிறுவனங்கள் கடந்த நான்கு ஆண்டுகளில் தங்கள் வழித்தடங்கள், விமானக் குழுக்கள் மற்றும் பணியாளர்களை வேகமாக விரிவுபடுத்தி வருகின்றன.
வருங்காலத் திட்டங்களைப் பற்றிப் பேசிய தலைமைச் செயல் அதிகாரி அன்டோனோல்டோ நெவ்ஸ், எதிஹாட் அடுத்த ஐந்து ஆண்டுகளில் புதிய விமானங்களுக்காக 10 பில்லியன் டாலர் (36.7 பில்லியன் திர்ஹம்) முதலீடு செய்யத் திட்டமிட்டுள்ளதாகவும், ஆண்டுதோறும் சுமார் 2,500 ஊழியர்களை தொடர்ந்து பணியமர்த்தும் என்றும் கூறியுள்ளார்.
2025-ஆம் ஆண்டின் இறுதியில், எதிஹாட்டின் இயக்கத்தில் உள்ள விமானங்களின் எண்ணிக்கை 127-ஐ எட்டியது. மேலும் இந்த ஆண்டில் 29 புதிய விமானங்கள் வழங்கப்பட்டதைத் தொடர்ந்து இந்த எண்ணிக்கை எட்டப்பட்டது. இது அந்த விமான நிறுவனத்தின் வரலாற்றில் மிகப்பெரிய விமானக் குழு விரிவாக்கமாகும். இதில் ஏர்பஸ் A321LR அறிமுகமும் அடங்கும்.
கூடுதலாக, எதிஹாட் கடந்த ஆண்டில் 16 புதிய வழித்தடங்களையும் சேர்த்தது. இதன் மூலம் அதன் மொத்த வலையமைப்பு 110 இடங்களாக விரிவடைந்துள்ளது. இது 2026-ஆம் ஆண்டிலும் தனது நிலையான வளர்ச்சி உத்தியைத் தொடர்கிறது என்பது சிறப்பிற்குரியது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
