பிறை நிலவு ரமலான் மாதத்தின் தொடக்கத்தைக் குறிக்கும் வேளையில், ஐக்கிய அரபு அமீரகம் முழுவதும் உள்ள வீடுகள் விளக்குகள், பண்டிகை அலங்காரங்கள் மற்றும் கொண்டாட்ட ஏற்பாடுகளால் ஒளிர்கின்றன. அதேசமயம், விற்பனையாளர்கள், ரமலான் மாதத்தில் மக்கள் கூட்டத்தை ஈர்க்க மகத்தான சலுகைகளை வழங்குகிறார்கள்.
இவ்வாறு அமீரகம் முழுவதும் பண்டிகை ஷாப்பிங் உணர்வு பரவியிருக்கும் நிலையில், மிகப்பெரிய ரமலான் ஷாப்பிங் நிகழ்வுகளில் ஒன்றான “Ramadan Nights 2026” இன் 43வது பதிப்பு மார்ச் 6 முதல் 22 வரை ஷார்ஜா எக்ஸ்போ சென்டரில் திறக்கப்பட உள்ளது, இது நூற்றுக்கணக்கான பிராண்டுகள், மெகா தள்ளுபடிகள் மற்றும் குடும்ப நட்பு இடங்களை ஒரே இடத்தில் கொண்டுவருகிறது.
ஷார்ஜா ரமலான் பண்டிகையின் (Sharjah Ramadan Festival) ஒரு பகுதியாக நடைபெறும் இந்த கண்காட்சி 18,000 சதுர மீட்டருக்கும் அதிகமான பரப்பளவில் நடைபெறும், மேலும் 150,000 க்கும் மேற்பட்ட பார்வையாளர்களை ஈர்க்கும் என்று எதிர்பார்க்கப்படுகிறது. இந்தாண்டு பதிப்பில் 700 க்கும் மேற்பட்ட உள்ளூர் மற்றும் சர்வதேச பிராண்டுகளை பிரதிநிதித்துவப்படுத்தும் 210 க்கும் மேற்பட்ட கண்காட்சியாளர்கள் பங்கேற்பார்கள், மேலும், பல்வேறு வகையான தயாரிப்புகளில் 75 சதவீதம் வரை தள்ளுபடியை வழங்குவார்கள் என்று தெரிவிக்கப்பட்டுள்ளது.
பேஷன், வாசனை திரவியங்கள், அழகுசாதனப் பொருட்கள், எலெக்ட்ரானிக்ஸ், வீட்டு அலங்காரம், விளையாட்டு உபகரணங்கள், நகைகள், உணவுப் பொருட்கள் மற்றும் குழந்தைகளுக்கான பொம்மைகள் என பல்வேறு தயாரிப்புகள் மற்றும் பொருட்களை பார்வையாளர்கள் வாங்கலாம்.
இந்த ஆண்டு கண்காட்சி உலகளாவிய கண்காட்சி தரத்திற்கு ஏற்றவாறு வடிவமைக்கப்பட்டுள்ளது என்றும், விரிவாக்கப்பட்ட சில்லறை விற்பனை பிரிவுகள் மற்றும் ஸ்டார்ட்-அப் நிறுவனங்கள் மற்றும் இளம் தொழில்முனைவோருக்காக அர்ப்பணிக்கப்பட்ட சிறப்பு அரங்குகள் உள்ளதாகவும் ஏற்பாட்டாளர்கள் தெரிவித்துள்ளனர். இந்த நடவடிக்கையின் நோக்கம் வளர்ந்து வரும் வணிகங்கள் தங்கள் புதுமையான தயாரிப்புகளை நிறுவப்பட்ட உலகளாவிய பிராண்டுகளுடன் காட்சிப்படுத்த ஒரு தளத்தை வழங்குவதாகும்.
ஷாப்பிங் மட்டுமல்லாமல் கண்காட்சி காலம் முழுவதும் இந்த நிகழ்வில் ரேஃபிள் டிரா , போட்டிகள் மற்றும் பரிசுகள் இடம்பெறும் என தெரிவிக்கப்பட்டுள்ளது.
இது குறித்து ஷார்ஜாவின் எக்ஸ்போ சென்டரின் தலைமை நிர்வாக அதிகாரி சைஃப் முகமது அல் மிட்ஃபா கூறுகையில், இந்த கண்காட்சி விற்பனை நடவடிக்கைகளை அதிகரிப்பதிலும், புனித மாதத்தில் உள்நாட்டு சுற்றுலாவை ஆதரிப்பதிலும் முக்கிய பங்கு வகிக்கிறது, அதே நேரத்தில் சிறு மற்றும் நடுத்தர வணிகங்கள் பரந்த பார்வையாளர்களை அடைய உதவுகிறது என்று குறிப்பிட்டுள்ளார்.
ஏற்பாட்டாளர்கள் வெளியிட்டுள்ள அறிவிப்பின் படி, ரமலான் நைட்ஸ் 2026 நிகழ்வானது, தினமும் மாலை 5 மணி முதல் அதிகாலை 1 மணி வரையிலும், ஈத் விடுமுறை நாட்களில் பிற்பகல் 3 மணி முதல் நள்ளிரவு 1 மணி வரையிலும் திறந்திருக்கும், இது பார்வையாளர்களுக்கு ஷாப்பிங் செய்து பண்டிகை அனுபவத்தை அனுபவிக்க சிறந்த நேரத்தை வழங்குகிறது என கூறப்படுகின்றது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
