ஐக்கிய அரபு அமீரகம் முழுவதும் சமீபத்தில் பெய்த கனமழை பெரும்பாலான பகுதிகளில் வெள்ளப்பெருக்கையும் இடையூறுகளையும் ஏற்படுத்தியிருந்தாலும், அதன் தீவிரம் மற்றும் தாக்கம் ஆகிய இரண்டிலும் 2024-ஆம் ஆண்டின் சாதனை அளவிலான பெருமழையுடன் இது ஒப்பிடத்தக்கது அல்ல என்று வானிலை ஆய்வாளர்கள் கூறுகின்றனர்.
இது தொடர்பாக தேசிய வானிலை ஆய்வு மையத்தின் (NCM) ஆய்வாளர் டாக்டர் அஹ்மத் ஹபீப் பேசுகையில், மழையின் அளவு மற்றும் அது எவ்வளவு விரைவாக பெய்தது என்பதில்தான் முக்கிய வேறுபாடு உள்ளது என்று தெரிவித்துள்ளார்.
“2024-ஆம் ஆண்டில், சில பகுதிகளில் ஒரு நாளுக்கும் குறைவான நேரத்தில் 200 மி.மீ-க்கும் அதிகமான மழை பதிவானது, நாம் இப்போது காண்பதிலிருந்து அது மிகவும் வேறுபட்டது.” என்று அவர் விளக்கமளித்துள்ளார்.
இதற்கு மாறாக, சமீபத்திய வானிலை அமைப்பானது சில பகுதிகளில் சுமார் 80 மி.மீ மழையைக் கொண்டுவந்தது. மேலும், இந்த மழைப்பொழிவு ஒரே நாளில் கொட்டித் தீர்க்காமல், பல நாட்கள் பரவிப் பெய்தது என கூறப்படுகின்றது.
சமீபத்திய மழைப்பொழிவு புள்ளிவிவரங்கள்
மார்ச் 26 ஆம் தேதிக்கான தேசிய வானிலை ஆய்வு மையத்தின் தரவுகள் பின்வருமாறு காட்டுகின்றன:
- ஷௌகா: 77.5 மி.மீ
- கல்பா: 65.8 மி.மீ
- உம் அல் காஃப்: 60.6 மி.மீ
- வாடி அல் துவா: 57.2 மி.மீ
- அல் தைத்: 53.9 மி.மீ
“இவை குறிப்பிடத்தக்க அளவுகள்தான், ஆனால் ஒரே நாளில் 200 மி.மீ-க்கு மேல் பெய்யும் ஒரு நிகழ்வுடன் இவற்றை ஒப்பிட முடியாது,” என்று டாக்டர் ஹபீப் சுட்டிக்காட்டியுள்ளார்.
நிபுணர்களின் கூற்றுப்படி, வெள்ள அபாயம் என்பது மழைப்பொழிவின் மொத்த அளவை மட்டும் சார்ந்தது அல்ல, மாறாக மழை எவ்வளவு விரைவாகப் பெய்கிறது என்பதையும் சார்ந்துள்ளது என்பது குறிப்பிடத்தக்கது.
அதாவது, ஒரே நாளில் பெய்யும் 200 மி.மீ மழைக்கும், ஐந்து அல்லது ஆறு நாட்களில் பெய்யும் அதே அளவிலான மழைக்கும் இடையே பெரிய வித்தியாசம் உள்ளதாக அவர்கள் குறிப்பிடுகின்றனர். விரைவான மழைப்பொழிவு வடிகால் அமைப்புகளைச் செயலிழக்கச் செய்து, கடுமையான வெள்ளப்பெருக்கிற்கு வழிவகுக்கிறது, அதேசமயம், மெதுவாகவும் பரவலாகவும் பெய்யும் மழையைச் சமாளிப்பது எளிது ஹபீப் கூறுகிறார்.
அதேபோல், வானிலை அமைப்புகளின் கட்டமைப்பும் வேறுபடுகிறது என்று அவர் குறிப்பிட்டுள்ளார். அவரது கூற்றுப்படி, 2024-ஆம் ஆண்டு நிகழ்வானது, மிகவும் தீவிரமான ஒற்றை அமைப்பால் உந்தப்பட்டது. ஆனால், தற்போதைய நிலைமைகள், இப்பகுதியைப் பாதிக்கும் ஒரு பரந்த குறைந்த காற்றழுத்த அமைப்பிற்குள் உள்ள பல அலைகளின் விளைவாகும்.
இது புயல் அல்ல
சமீபத்திய கனமழையை ஒரு சூறாவளி அல்லது புயல் என்று விவரிக்கும் வைரல் கூற்றுகளையும் டாக்டர் ஹபீப் நிராகரித்துள்ளார்.
பொதுவாக சூறாவளி போன்ற நிகழ்வுகளில் நீடித்த, அழிவுகரமான காற்றும், பரவலான கட்டமைப்புச் சேதமும் அடங்கும் என்றும், ஐக்கிய அரபு அமீரகத்தின் தற்போதைய வானிலை அமைப்பில் இத்தகைய நிலைமைகள் இல்லை என்றும் அவர் விளக்கியுள்ளார்.
மேலும், எந்தவொரு நிபுணரும் இதுபோன்ற தவறான தகவல்களை வெளியிடுவதில்லை என்று அதிகாரிகள் எச்சரித்ததோடு, அதிகாரிகளிடமிருந்து வரும் சரிபார்க்கப்பட்ட அறிவிப்புகளையே பொதுமக்கள் நம்ப வேண்டும் என்றும் வலியுறுத்தியுள்ளனர்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link:Khaleej Tamil WhatsApp Channel
