ஐக்கிய அரபு அமீரகத்தின் தேசிய வானிலை ஆய்வு மையம் (NCM) வெளியிட்ட வானிலை அறிவிப்பின் படி, வரும் நாட்களில் மழை பெய்யும் என கூறப்பட்டிருந்த நிலையில் இன்று நாட்டின் பல பகுதிகளில் மேகமூட்டமான வானம் மற்றும் ஆங்காங்கே மழை பெய்துள்ளதாகத் தெரிவிக்கப்பட்டுள்ளது.
இதனை தொடர்ந்து இரவு 8 மணி முதல் 10 மணி வரை, பலத்த காற்று மற்றும் புழுதி காரணமாகப் பார்வைத் தெளிவு குறையக்கூடும் என்று எச்சரித்ததுடன் ஆரஞ்சு எச்சரிக்கையை வானிலை ஆய்வு மையம் வெளியிட்டுள்ளது. அபுதாபி, துபாய் மற்றும் ஷார்ஜா போன்ற நகரங்களில் வசிப்பவர்கள் ஏற்கனவே இன்று புத்துணர்ச்சியூட்டும் மழையை அனுபவித்துள்ளனர். இது குளிர்ச்சியான வானிலையையும், வளிமண்டலத்தில் குறிப்பிடத்தக்க மாற்றத்தையும் ஏற்படுத்தியுள்ளது.
மேலும், இந்த வாரம் முழுவதும் (மார்ச் 21–27) நிலையற்ற வானிலை தொடரும் என்றும், சில பகுதிகளில் மழை, இடியுடன் கூடிய மழை மற்றும் ஆலங்கட்டி மழைக்கான வாய்ப்புகள் அதிகரிக்கும் என்றும் தேசிய வானிலை ஆய்வு மையம் கணித்துள்ளது. மேற்கிலிருந்து நகர்ந்து வரும் மேகக் கூட்டங்களால் இந்த வானிலை நிலவுகிறது. இது நாடு முழுவதும் வெப்பச்சலன மேகங்கள் உருவாக வழிவகுக்கிறது.
இந்நிலையில், ஐக்கிய அரபு அமீரகம் முழுவதும் உள்ள அதிகாரிகள் முன்னெச்சரிக்கை நடவடிக்கைகளைத் தீவிரப்படுத்தியுள்ளனர். பொதுப் பாதுகாப்பையும் தடையற்ற சேவைகளையும் உறுதி செய்வதற்காக, அவசரகாலக் குழுக்கள் களமிறக்கப்பட்டு, செயல்பாட்டு மையங்கள் தீவிரமாக இயங்கி வருவதாக அதிகாரிகள் தெரிவித்துள்ளனர்.
குடியிருப்பாளர்கள், குறிப்பாக வாகனம் ஓட்டும்போது, எச்சரிக்கையுடன் இருக்குமாறு அறிவுறுத்தப்படுகிறார்கள். வாகன ஓட்டிகள் வேகத்தைக் குறைக்கவும், பாதுகாப்பான இடைவெளியைக் கடைப்பிடிக்கவும், வெள்ளம் சூழ்ந்த பகுதிகள், பள்ளத்தாக்குகள் மற்றும் வேகமாக ஓடும் நீரைத் தவிர்க்கவும் காவல்துறை மற்றும் போக்குவரத்து அதிகாரிகள் அறிவுறுத்தியுள்ளனர்.
அதுமட்டுமில்லாமல், அபுதாபியில், முன்னெச்சரிக்கை நடவடிக்கையாக வேகக் குறைப்பு அமைப்பு செயல்படுத்தப்பட்டுள்ளது.
தற்போது வானிலை நிலவரங்கள் தொடர்ந்து மாறிவருவதால், பாதுகாப்பு வழிகாட்டுதல்களைப் பின்பற்றுவதன் முக்கியத்துவத்தையும், அதிகாரப்பூர்வ வழிகள் மூலம் தகவல்களைப் புதுப்பித்துக்கொள்வதன் அவசியத்தையும் அதிகாரிகள் வலியுறுத்தியுள்ளனர்.
NCM வெளியிட்டுள்ள முன்னறிவிப்பின் படி, இதேபோன்ற வானிலை ஞாயிற்றுக்கிழமை வரையிலும் நீடிக்கும் என எதிர்பார்க்கப்படுகிறது. குறிப்பாக அல் அய்ன் உட்பட வடக்கு மற்றும் கிழக்கு பிராந்தியங்களில் அதிக மழைப்பொழிவு ஏற்பட வாய்ப்புள்ளதாகத் தெரிவிக்கப்பட்டுள்ளது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
