ஐக்கிய அரபு அமீரகத்தில் உள்ள அடையாளம், குடியுரிமை, சுங்கம் மற்றும் துறைமுகப் பாதுகாப்புக்கான ஃபெடரல் ஆணையம் நாட்டில் உள்ள ஓய்வுபெற்ற வெளிநாட்டு குடியிருப்பாளர்களுக்கு ஐந்தாண்டு ரெசிடென்ஸ் விசா திட்டத்தை புதிதாக அறிமுகப்படுத்தியுள்ளது. இந்த முன்முயற்சிகள் ஐக்கிய அரபு அமீரகத்தில் வசிக்க விரும்பும் ஓய்வு பெற்றவர்களுக்கு அதிக நெகிழ்வுத்தன்மையையும் பாதுகாப்பையும் வழங்குவதை நோக்கமாகக் கொண்டுள்ளதாகக் கூறப்பட்டுள்ளது.
இதனையடுத்து அமீரக அரசாங்கம் அமீரகத்தில் உள்ள ஓய்வுபெற்ற குடியிருப்பாளர்களுக்கு ரெசிடென்ஸி மற்றும் அடையாள அட்டைகளை வழங்குவதற்கான புதிய விதிமுறைகளை வெளியிட்டுள்ளது. இதனடிப்படையில், இப்போது 55 வயது அல்லது அதற்கு மேற்பட்ட வயதுடைய ஓய்வுபெற்ற வெளிநாட்டவர்கள் ஐக்கிய அரபு அமீரகத்தில் வசிப்பதற்கு 5 வருட ரெசிடென்ஸி விசாவிற்கு விண்ணப்பிக்கலாம் என்பது தெரிய வந்துள்ளது.
மேலும், இந்த விசாவிற்கு தகுதி பெற, விண்ணப்பதாரர்கள் பின்வரும் நிபந்தனைகளை பூர்த்தி செய்ய வேண்டும்:
- விண்ணப்பதாரர் ஐக்கிய அரபு அமீரகத்திற்கு உள்ளேயோ அல்லது வெளியேயோ குறைந்தபட்சம் 15 ஆண்டுகள் பணிபுரிந்திருக்க வேண்டும்.
- தனிநபர் குறைந்தபட்சம் 1 மில்லியன் திர்ஹம்ஸ் மதிப்புள்ள சொத்து வைத்திருக்க வேண்டும் அல்லது குறைந்தபட்சம் 1 மில்லியன் திர்ஹம்ஸ் சேமிப்பு வைத்திருக்க வேண்டும் அல்லது குறைந்தபட்சம் 20,000 திர்ஹம்ஸ் அல்லது துபாயில் உள்ள விதிமுறைகளின் படி, 15,000 திர்ஹம்ஸ் மாத வருமானம் பெற வேண்டும்.
- கடந்த ஆறு மாதங்களின் வங்கி அறிக்கை அவசியம்
- இந்த ரெசிடென்ஸி விசா 5 ஆண்டுகளுக்கு செல்லுபடியாகும் மற்றும் விண்ணப்பதாரர் அதே தேவைகளை தொடர்ந்து பூர்த்தி செய்தால் விசாவை புதுப்பிக்க முடியும்.
விண்ணப்ப செயல்முறை
ICP தனது அதிகாரப்பூர்வ இணையதளம் மற்றும் UAEICP ஸ்மார்ட் அப்ளிகேஷன் மூலம் ஓய்வுபெற்ற குடியிருப்பாளர்களுக்கான ரெசிடென்ட் பெர்மிட் மற்றும் UAE ஐடி கார்டுக்கு விண்ணப்பிப்பதற்கான வழிமுறைகளை அறிந்து விண்ணப்பிக்கலாம்.
பின்வரும் வழிமுறைகள் மூலம் விண்ணப்ப செயல்முறையை முடிக்கலாம்
- UAEPASS-ஐ பயன்படுத்தி உள்நுழையவும்.
- UAE ஐடி மற்றும் ரெசிடென்ஸி சேவைகளைத் தேர்ந்தெடுக்கவும்.
- மீட்டெடுக்கப்பட்ட தரவை மதிப்பாய்வு செய்து புதுப்பிக்கவும், பின்னர் தேவையான கட்டணங்களைச் செலுத்தவும்.
- பின் அங்கீகரிக்கப்பட்ட விநியோக நிறுவனங்கள் மூலம் அடையாள அட்டையைப் பெறலாம்.
ஓய்வு பெற்றவர்களுக்கான துபாயின் சிறப்பு விதிமுறைகள்
ICP அறிவித்த கூட்டாட்சி விதிமுறைகளுக்கு கூடுதலாக, துபாய் அரசும் ஓய்வு பெற்றவர்களை ஈர்க்க ஒரு சிறப்பு திட்டத்தை அறிமுகப்படுத்தியுள்ளது. இந்த திட்டம் வெளிநாட்டு குடிமக்கள், அவர்களது வாழ்க்கைத் துணைவர்கள் மற்றும் சார்ந்திருப்பவர்கள், ஓய்வு பெற்றவர் சில நிபந்தனைகளை பூர்த்தி செய்தால், புதுப்பிக்கத்தக்க 5 ஆண்டு ரெசிடென்ஸி விசாவிற்கு விண்ணப்பிக்க அனுமதிக்கிறது.
துபாய் அறிவித்துள்ள முதன்மை நிபந்தனைகள்
ஓய்வூதியம் பெறுபவர் குறைந்தபட்சம் 55 வயதாக இருக்க வேண்டும் மற்றும் பின்வரும் நிதித் தேவைகளில் ஒன்றைப் பூர்த்தி செய்ய வேண்டும்.
- விருப்பம் 1: ஆண்டு வருமானம் குறைந்தபட்சம் 180,000 திர்ஹம்ஸ் அல்லது மாத வருமானம் 15,000 திர்ஹம்ஸ் ஆக இருக்க வேண்டும்.
- விருப்பம் 2: 3 ஆண்டுகளுக்கு நிலையான வைப்புத்தொகையில் 1 மில்லியன் திர்ஹம்ஸ் நிதி சேமிப்பு இருக்க வேண்டும்.
- விருப்பம் 3: 1 மில்லியன் திர்ஹம்ஸ் மதிப்புள்ள அடமானம் இல்லாத சொத்தில் முதலீடு
- விருப்பம் 4: விருப்பத்தேர்வுகள் 2 மற்றும் 3 ஆகியவற்றை சேர்த்து, குறைந்தது 1 மில்லியன் திர்ஹம்ஸ் நிதி, அதாவது 3 வருடங்களுக்கு 500,000 திர்ஹம்ஸ் நிலையான வைப்புத்தொகை (fixed deposit) மற்றும் சொத்தில் 500,000 திர்ஹம்ஸ் ஒதுக்கப்பட்டிருக்க வேண்டும்.
இத்திட்டம் துபாயில் வசிக்க விரும்பும் ஓய்வு பெற்றவர்களுக்கு அதிக நெகிழ்வுத்தன்மையையும் பாதுகாப்பையும் வழங்குவதை நோக்கமாகக் கொண்டுள்ளதாக தெரிவிக்கப்பட்டுள்ளது குறிப்பிடத்தக்கது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
