ரயில்வே, போக்குவரத்து மற்றும் உள்கட்டமைப்பு குறித்த ‘Global Rail 2025’ என்ற கண்காட்சி மற்றும் மாநாட்டின் இரண்டாவது பதிப்பு அபுதாபி நேஷனல் எக்ஸிபிஷன் சென்டரில் (Abu Dhabi National Exhibition Centre -ADNEC) செவ்வாய்க்கிழமை தொடங்கியது, இந்நிகழ்வு “போக்குவரத்தின் எதிர்காலத்தை வடிவமைத்தல் மற்றும் உலகளாவிய இணைப்பை வலுப்படுத்துதல்” என்ற கருப்பொருளின் கீழ் அக்டோபர் 2 வரை நடைபெறும் என்று அறிவிக்கப்பட்டுள்ளது.
இந்த நிகழ்வு ஐக்கிய அரபு அமீரகத்தின் துணைத் தலைவரும், துணைப் பிரதமரும், ஜனாதிபதி நீதிமன்றத்தின் தலைவருமான மாண்புமிகு ஷேக் மன்சூர் பின் சையத் அல் நஹ்யான் அவர்களின் ஆதரவிலும், மேம்பாடு மற்றும் தியாகிகள் விவகாரங்களுக்கான ஜனாதிபதி நீதிமன்றத்தின் துணைத் தலைவரும், எதிஹாட் ரயில் தலைவருமான மாண்புமிகு ஷேக் தியாப் பின் முகமது பின் சையத் அல் நஹ்யான் அவர்களின் மேற்பார்வையிலும் நடைபெறுகிறது.
வலுவான சர்வதேச பங்கேற்பு
இந்த ஆண்டு பதிப்பில் உலகெங்கிலும் இருந்து 24 அமைச்சர்கள் மற்றும் அதிகாரப்பூர்வ பிரதிநிதிகள் கலந்து கொள்வதாகவும், மேலும் இது 14 துறைகளில் 200க்கும் மேற்பட்ட கண்காட்சியாளர்கள், 70 முதல் முறை பங்கேற்பாளர்கள் மற்றும் 60க்கும் மேற்பட்ட முன்னணி நிறுவனங்கள் மற்றும் நிறுவனங்களின் தலைமை நிர்வாக அதிகாரிகள் ஆகியோரை ஒன்றிணைக்கும் என்றும் ஏற்பாட்டாளர்கள் தெரிவித்துள்ளனர். ஒட்டுமொத்தமாக, இந்த நிறுவனங்கள் 140 பில்லியன் அமெரிக்க டாலர்களை தாண்டி ஆண்டு வருவாயை ஈட்டுகின்றன, இது நிகழ்வின் வளர்ந்து வரும் உலகளாவிய நிலையை வலுப்படுத்துகிறது.
மூன்று நாட்கள் நடைபெறும் இந்நிழ்கழ்வில் 100 நாடுகளைச் சேர்ந்த 20,000 சர்வதேச பார்வையாளர்களை ஏற்பாட்டாளர்கள் எதிர்பார்ப்பதாகக் கூறப்படுகிறது, அவர்கள் பல பில்லியன் டாலர் திட்டங்கள், முதலீட்டு வாய்ப்புகள் மற்றும் ரயில் மற்றும் போக்குவரத்தில் சமீபத்திய கண்டுபிடிப்புகளை ஆராய்வார்கள் என்றும் தெரிவிக்கப்பட்டுள்ளது.
2026 இல் எதிஹாட் ரயில் பயணிகள் சேவைகள்
இந்த நிகழ்வின் ஒரு பகுதியாக, எதிஹாட் ரயில் அதன் பயணிகள் சேவைகள் 2026 இல் தொடங்கப்படும் பாதையில் இருப்பதாக உறுதிப்படுத்தியது, இது ஐக்கிய அரபு அமீரகத்தின் பாதுகாப்பான, திறமையான மற்றும் முழுமையாக ஒருங்கிணைக்கப்பட்ட ரயில் வலையமைப்பின் தொலைநோக்கு பார்வையை ஆதரிக்கிறது.
குளோபல் ரயில் 2025 தொடக்க விழாவில் பேசிய எதிஹாட் ரயில் பயணிகள் சேவைகளின் துணை தலைமை நிர்வாக அதிகாரி அஸ்ஸா அல் சுவைதி, உள்ளூர் போக்குவரத்து வழங்குநர்கள், நகராட்சிகள் மற்றும் தொழில்நுட்ப தளங்களுடன் முதல் மற்றும் கடைசி மைல் இணைப்புகள் உட்பட தடையற்ற பயணத்தை உறுதி செய்வதற்காக நிறுவனம் மூலோபாய கூட்டாண்மைகளை உருவாக்கி வருவதாகத் தெரிவித்துள்ளார்.
எமிரேட்ஸ் இடையே குறுகிய பயண நேரங்கள்
புதிய அதிவேக ரயில் முயற்சி அபுதாபி மற்றும் துபாயை மணிக்கு 350 கிமீ வேகத்தில் இணைக்கும் என்றும், இரு நகரங்களுக்கிடையேயான பயண நேரத்தை வெகுவாக குறைக்கும் என்றும் அல் சுவைதி தெரிவித்தார். இந்தத் திட்டம் அடுத்த 50 ஆண்டுகளில் ஐக்கிய அரபு அமீரகத்தின் மொத்த உள்நாட்டு உற்பத்தியில் தோராயமாக திர்ஹம் 145 பில்லியன் பங்களிக்கும் என்றும், அடுத்த தலைமுறை ரயில் போக்குவரத்தில் நாட்டை ஒரு முன்னோடியாக நிலைநிறுத்தும் என்றும் எதிர்பார்க்கப்படுகிறது.
- அபுதாபியிலிருந்து துபாய்க்கு 57 நிமிடங்களில் பயணிக்கலாம்.
- அபுதாபியிலிருந்து புஜைராவுக்கு 105 நிமிடங்களில் பயணிக்கலாம்
- அபுதாபியிலிருந்து ருவைசிற்கு 70 நிமிடங்களில் பயணிக்கலாம்
அவர் வெளியிட்டுள்ள விபரங்களின் படி, ஒவ்வொரு ரயிலும் 400 பயணிகளை ஏற்றிச் செல்லும், பல தினசரி பயணங்களுடன், வேலை, வாசிப்பு அல்லது ஓய்வெடுப்பதற்கான இடங்களை வழங்குகிறது.
இந்த சேவை நாடு முழுவதும் 11 நகரங்கள் மற்றும் பிராந்தியங்களை இணைக்கும் என்று ஏற்கனவே அறிவிக்கப்பட்டது. இந்நிலையில், 2026 வெளியீடு திட்டமிடப்பட்ட நிலையில் உள்ளது என்பதை அல் சுவைதி மீண்டும் உறுதிப்படுத்தியுள்ளார். ரயில் பயணத்தின் எதிர்காலத்தை வடிவமைப்பதில் ஸ்மார்ட் மொபிலிட்டி தீர்வுகளின் பங்கை பிரதிபலிக்கும் வகையில், டிக்கெட்டிங் அமைப்பு முழுமையாக டிஜிட்டல் மயமாக்கப்படும் என்றும் அவர் மேலும் கூறியுள்ளார்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
