ஐக்கிய அரபு அமீரகத்தின் காலநிலை மாற்றம் மற்றும் சுற்றுச்சூழல் அமைச்சகம் (MoCCAE), ‘Uranus Star’ என்ற பாட்டில் குடிநீர் பிராண்டை நாட்டிற்குள் இறக்குமதி, விற்பனை அல்லது விநியோகம் செய்ய அங்கீகரிக்கப்படவில்லை என்று அறிவித்துள்ளது.
இது தொடர்பாக அக்டோபர் 10 அன்று வெளியிடப்பட்ட ஒரு அறிக்கையில், இந்த குறிப்பிட்ட பிராண்டையோ அல்லது அதன் எந்தவொரு தயாரிப்புகளையோ வர்த்தகம் செய்வதற்கு அல்லது இறக்குமதி செய்வதற்கு எந்த அதிகாரப்பூர்வ அனுமதியும் வழங்கப்படவில்லை என்பதை அமைச்சகம் உறுதிப்படுத்தியுள்ளது. மேலும், நாடு முழுவதும் உள்ள முக்கிய சில்லறை விற்பனை நிலையங்களில் இந்த பிராண்ட் பாட்டில் தண்ணீர் விற்கப்படவில்லை என்றும் அது குறிப்பிட்டது.
சமீபத்தில், அண்டை நாடான ஓமானில் இந்த பிராண்டின் கீழ் விற்கப்படும் பாட்டில் தண்ணீரை உட்கொண்டதால் இரண்டு பேர் இறந்ததாக செய்திகள் வெளியாகின. பின்னர், தண்ணீர் பாட்டிலை ஆய்வு செய்த சுகாதார அதிகாரிகள் பாட்டில் மாசுபட்டிருப்பதாகத் தெரிவித்தனர். இதைத் தொடர்ந்து இந்த தெளிவுபடுத்தலை அமைச்சகம் வெளியிட்டுள்ளது. இதற்கு பதிலளிக்கும் விதமாக, அமைச்சகம் உடனடி முன்னெச்சரிக்கை நடவடிக்கைகளை எடுத்து, நிலைமையைச் சரிபார்த்து கண்காணிக்க அனைத்து எமிரேட்களிலும் உள்ளூர் உணவு பாதுகாப்பு அதிகாரிகளுடன் நெருக்கமாகப் பணியாற்றியதாகவும் கூறப்படுகிறது.
யுரேனஸ் ஸ்டார் பிராண்டின் ஏற்றுமதிகளுக்கு எந்த அனுமதிகளும் அல்லது அங்கீகாரங்களும் வழங்கப்படவில்லை என்பதை உறுதி செய்ய ஆய்வு மற்றும் கண்காணிப்பு நடைமுறைகளை கடுமையாக்கியுள்ளதாக MoCCAE மேலும் கூறியுள்ளது. மேலும், அந்த பிராண்டிலிருந்து ஏதேனும் பொருட்கள் கண்டுபிடிக்கப்பட்டால் அவற்றை அப்புறப்படுத்துமாறு அதிகாரிகள் பொதுமக்களை வலியுறுத்தியுள்ளனர்.
இந்த அதிரடி நடவடிக்கையின் மூலம், நுகர்வோர் சுகாதாரம் மற்றும் பாதுகாப்புக்கான தனது உறுதிப்பாட்டை அமைச்சகம் மீண்டும் உறுதிப்படுத்தியது, ஐக்கிய அரபு அமீரகத்தில் உணவு மற்றும் பானப் பொருட்களின் தரம் மற்றும் பாதுகாப்பைப் பாதுகாக்க அதன் ஒருங்கிணைந்த உணவு ஒழுங்குமுறை அமைப்பு ஆண்டு முழுவதும் செயல்படுகிறது என்பதை வலியுறுத்தியுள்ளது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
