ஐக்கிய அரபு அமீரகத்தில் கடந்த சில நாட்களாகவே கொரோனா பாதிப்பு தொடர்ந்து அதிகரித்து வருகின்றது. சமீபத்தில் 500 க்கும் மேலாக தினசரி கொரோனா தொற்று பதிவாகி வந்த நிலையில் நேற்று சுகாதார அமைச்சகம் ஒரு நாளில் 800 க்கும் மேல் நோய்த்தொற்று பதிவானதாக தெரிவித்தது. தற்பொழுது அதற்கும் மேலாக கடந்த நான்கு மாதங்களில் இல்லாத அளவிற்கு ஒரே நாளில் 1,000 க்கும் மேற்பட்ட கொரோனா பாதிப்புகள் பதிவு செய்யப்பட்டு வருகின்றன.
அதன்படி அமீரகத்தில் இன்று (வியாழக்கிழமை, ஜூன் 9, 2022) வெளியிட்டுள்ள அறிவிப்பில் கடந்த ஒரு நாளில் மட்டும் 1,031 பேருக்கு கொரோனா இருப்பது உறுதி செய்யப்பட்டுள்ளதாக அமீரகத்தின் சுகாதார மற்றும் தடுப்பு அமைச்சகம் (MoHAP) சார்பாக அறிவிக்கப்பட்டுள்ளது. இதனால் அமீரகத்தில் கொரோனா பாதித்தவர்களின் மொத்த எண்ணிக்கையானது 913,984 ஆக உயர்ந்துள்ளது.
மேலும் அமீரகத்தில் இன்று கொரோனாவிற்கு எவரும் உயிரிழக்கவில்லை. இதனால் அமீரகத்தில் கொரோனாவால் உயிரிழந்தோரின் எண்ணிக்கையில் மாற்றமில்லாமல் 2,305 ஆக இருக்கின்றது.
கடந்த ஒரு நாளில் மட்டும் 712 பேர் குணமடைந்துள்ளதாகவும், இதுவரையில் 896,448 கொரோனாவால் பாதிக்கப்பட்டு முழுவதுமாக குணமடைந்துள்ளதாகவும் தெரிவிக்கப்பட்டுள்ளது.
