துபாயில் வரும் ஜனவரி 3, 2023 வரை கிட்டத்தட்ட இரண்டு மில்லியன் பயணிகள் துபாய் சர்வதேச விமான நிலையத்தை (DXB) கடந்து செல்வார்கள் என்று எதிர்பார்க்கப்படுவதாக தெரிவிக்கப்பட்டுள்ளது. அதிலும் ஜனவரி 2 ம் தேதி மிகவும் பரபரப்பான நாளாக இருக்கும் என்று கணிக்கப்பட்டுள்ளது. எனவே துபாய் விமான நிலையமானது இந்த பிஸியான காலங்களில் பயணிகள் பின்பற்ற வேண்டிய வழிமுறைகளை வெளியிட்டுள்ளது. இதில் பயணிகள் செய்ய வேண்டியவை மற்றும் செய்யக்கூடாதவைகளைக் கொண்ட முழு விபரங்களும் வெளியிடப்பட்டுள்ளன.
இதன்படி டிசம்பர் 27 முதல் ஜனவரி 3 வரையில் மட்டுமே தினசரி சராசரி போக்குவரத்து 245,000 பயணிகளை எட்டும் என்றும் ஜனவரி 2, 2023 அன்று போக்குவரத்து 257,000 பயணிகளை தாண்டக்கூடும் என்றும் எதிர்பார்க்கப்படுவதாக கூறப்பட்டுள்ளது.
அத்துடன் 2019ம் ஆண்டு கொரோனா பரவலுக்கு முந்தைய நிலையை விட 2022 இன் சராசரி தினசரி பயணிகளின் எண்ணிக்கையானது வலுவான மீட்சியைப் பெற்றுள்ளதாகவும் தெரிவிக்கப்பட்டுள்ளது.
அதிகரித்துள்ள சுற்றுலாவாசிகளின் வருகை, தோஹாவில் சமீபத்தில் முடிவடைந்த ஃபிஃபா உலகக் கோப்பை கால்பந்து நிகழ்வு மற்றும் உலகின் மிகவும் பிரபலமான சுற்றுலாத் தலங்களில் ஒன்றாக துபாயின் நிலைப்பாட்டின் வலிமை உள்ளிட்ட காரணிகளின் காரணமாக துபாய் விமான நிலையம் தற்பொழுது மிகவும் பிஸியாக உள்ளது.
எனவே இந்த காலகட்டத்தில் பயணத்தை எளிதாக்க பயணிகள் பின்பற்ற வேண்டிய வழிமுறைகளை விமான நிலையம் வெளியிட்டுள்ளது. அவை:
>> குடும்பத்துடன் பயணம் செய்பவர்கள், 12 வயதுக்கு மேற்பட்ட குழந்தைகள் பாஸ்போர்ட் கட்டுப்பாட்டு செயல்முறையை விரைவுபடுத்த ஸ்மார்ட் கேட்ஸைப் பயன்படுத்தலாம்.
>> விமான நிலையத்திற்குச் செல்லும் சாலைகள், அதிக நெரிசலான நேரங்களில் பரபரப்பாக இருக்கும், எனவே விமான நிலையத்திற்குச் செல்வதற்கும் அதன் வழியாகச் செல்வதற்கும் கூடுதல் நேரத்தைத் திட்டமிடுவது நல்லது.
>> நீங்கள் டெர்மினல் 1 ல் இருந்து வெளியே பயணிக்கிறீர்கள் என்றால், நீங்கள் புறப்படுவதற்கு 3 மணிநேரத்திற்கு முன்னதாக விமான நிலையத்திற்கு வந்து சேருங்கள்
>> உங்கள் பயணத்தை சுமூகமாக தொடங்குவதற்கு ஆன்லைன் மற்றும் சுய சேவை விருப்பங்களை எங்கு வேண்டுமானாலும் பயன்படுத்திக் கொள்ளலாம்
>> டெர்மினல் 3 இலிருந்து பயணிப்பவர்கள் எமிரேட்டின் வசதியான ஆரம்ப மற்றும் சுய சேவை செக்-இன் வசதிகளைப் பயன்படுத்தலாம்
>> வீட்டில் லக்கேஜ்களை எடைபோடுவது, ஆவணங்களை முன்கூட்டியே சரிபார்ப்பது மற்றும் பாதுகாப்பு சோதனைகளுக்கு தயாராக இருப்பது விமான நிலையத்தில் நிறைய நேரத்தை மிச்சப்படுத்தும்.
>> விமான நிலையத்திற்குச் செல்லவும், வரவும் துபாய் மெட்ரோவை பயன்படுத்துவது நேரத்தை மிச்சப்படுத்தும். DXB இன் டெர்மினல் 1 மற்றும் டெர்மினல் 3 இல் நிலையங்களைக் கொண்ட துபாய் மெட்ரோ, டிசம்பர் 31, 2022 முதல் ஜனவரி 1, 2023 வரை 24 மணிநேரமும் செயல்படும்.
>> இந்த கால கட்டத்தில் பொதுவாக பயணிகள் மட்டுமே டெர்மினல்களுக்குள் அனுமதிக்கப்படுவார்கள் என்பதால் வீட்டிலேயே குடும்பத்தினர் மற்றும் நண்பர்கள் விடைபெற்றுக் கொள்ளவும்
>> டெர்மினல் 1 மற்றும் டெர்மினல் 3 இல் உள்ள வருகை (arrival) முன்தளத்திற்கான அணுகல் பொது போக்குவரத்து மற்றும் பிற அங்கீகரிக்கப்பட்ட வாகனங்களுக்கு மட்டுமே என்பதால், நண்பர்களும் குடும்பத்தினரும் விமான நிலையத்தின் நியமிக்கப்பட்ட கார் பார்க்கிங் அல்லது வாலட் சேவையைப் பயன்படுத்த அறிவுறுத்தப்படுகிறார்கள்.
