உலக பொருளாதாரத்தில் முக்கிய பங்கு வகிக்கும் நாடுகளில் இன்றியமையாத நாடாக இருக்கின்றது ஐக்கிய அரபு அமீரகம். பல நாட்டு மக்கள் வந்து பணிபுரிவதற்கும் அவர்களின் வாழ்வாதாரத்திற்கும் அமீரகம் முக்கிய பங்காற்றி வருகிறது. பல நாடுகளில் இருந்தும் தங்களின் வாழ்வில் முன்னேற்றம் காணவும் தொழிலில் சிறந்து விளங்கவும் அதிக தொழில் வாய்ப்புகளை பெறவும் இலட்சக்கணக்கான வெளிநாட்டு மக்கள் அமீரகத்தில் வந்து பணிபுரிகின்றனர். இருந்தபோதிலுமே ஒரு சில காரணங்களால் இங்கு பணிபுரியும் ஊழியர்கள் வேறு வேலைக்கு மாறும் எண்ணம் கொண்டிருப்பதாக ஆய்வுகளில் தெரிய வந்துள்ளது.
அதாவது அமீரகத்தில் உள்ள மூன்றில் இரண்டு பங்கு (67 சதவிகிதம்) ஊழியர்கள் உடனடி வேலை மாற்றத்தை நாடுகின்றனர் என்றும் இது வேலையின் இயக்கம் அதிகரிப்பதையும் புதிய தொழில் பாதைகளை ஆராய்வதற்கான விருப்பத்தையும் குறிக்கிறது என்று உலகளாவிய மனிதவள தீர்வு நிறுவனமான Adecco வெளியிட்டுள்ள புதிய கணக்கெடுப்பில் தெரிவிக்கப்பட்டுள்ளது. விண்ணப்பதாரர்கள் தங்கள் வேலையை மாற்றுவதற்கு ஏற்படும் முக்கிய காரணிகள், வரையறுக்கப்பட்ட தொழில் முன்னேற்றம், போட்டியற்ற ஊதியம், வாழ்க்கைச் செலவு அதிகரிப்பு, மோசமான வேலை-வாழ்க்கை சமநிலை, ஊழியர்களுக்கான நன்மைகள் மற்றும் வேலை நெகிழ்வுத்தன்மை இல்லாமை ஆகியவை அடங்கும் என கூறப்பட்டுள்ளது.
இது குறித்து SVP மற்றும் Adecco EEMENA இன் தலைவரும், மத்திய கிழக்கு நாடுகளின் தலைவருமான மயங்க் படேல் கூறுகையில் “வேட்பாளர்கள் இன்று அதிகளவில் தொழில் முயற்சிகளால் உந்தப்படுகிறார்கள். நேர்காணல்கள் மற்றும் வேலை தொடர்பான பேச்சுவார்த்தைகளின் போது கலந்துரையாடல்கள் அடிக்கடி வேலை பாதுகாப்பு, வேலை-வாழ்க்கை சமநிலை, வருடாந்திர தொழில் முன்னேற்ற வாய்ப்புகள் மற்றும் போட்டி இழப்பீடு ஆகியவற்றைச் சுற்றியே சுழல்கின்றன” என்று கூறியுள்ளார்.
அமீரகத்தில் உள்ள ஊழியர்கள் தங்களின் வேலைகளை மாற்றுவதற்கு சம்பளம் ஒரு குறிப்பிடத்தக்க உந்துதலாக உள்ளது என்றும் கூறப்பட்டுள்ளது. அத்துடன், நல்ல வேலை-வாழ்க்கை சமநிலை, தொழில் வாய்ப்புகள் மற்றும் வேலை பாதுகாப்பு போன்ற பிற காரணிகளும் இதற்கு முக்கிய பங்கு வகிக்கின்றன என்று தெரிவித்துள்ளார்.
பல்வேறு தொழில் புரியும் 507 நபர்களிடம் இருந்து பெறப்பட்ட தரவுகளின் அடிப்படையில் தற்போதைய பணிப்போக்கு குறித்த அறிக்கை வெளியிடப்பட்டுள்ளது. அதில் தொழில்நுட்பம் மற்றும் மென்பொருள் சேவைகள் துறை, அதைத் தொடர்ந்து வங்கி, கட்டுமானம், பொறியியல், தளவாடங்கள், சில்லறை வணிகம் மற்றும் ஆடம்பரத் துறைகளில் அதிக எண்ணிக்கையில் ஊழியர்கள் ஆர்வம் காட்டுகின்றனர் என கூறப்பட்டுள்ளது. மாறாக, 15 முதல் 20 சதவீத தொழில் வல்லுநர்களுக்கு வேலைகளை மாற்றும் எண்ணம் இல்லை என்றும் அவர்கள் தற்போதைய வேலையில் முன்னேறுவதில் கவனம் செலுத்த விரும்புவதாகவும் தெரிவிக்கப்பட்டுள்ளது.
பணியமர்த்தல் துறைகள்
ஐக்கிய அரபு அமீரகம் ஆட்சேர்ப்பில் குறிப்பிடத்தக்க மாற்றத்தை அனுபவித்து வருகிறதாக கூறப்படுகின்றது. இது அதிகரித்து வரும் வெளிநாட்டினரின் மக்கள்தொகை, விரைவான தொழில்நுட்ப முன்னேற்றங்கள், பன்முகத்தன்மைக்கு வலுவான முக்கியத்துவம் மற்றும் சேர்க்கை மற்றும் திறன் தேவைகளை மேம்படுத்துதல் உள்ளிட்ட பல காரணிகளால் இயக்கப்படுகிறது என தெரிவிக்கப்பட்டுள்ளது.
குறிப்பாக தகவல் தொழில்நுட்பம், மென்பொருள் சேவைகள், சில்லறை வணிகம் மற்றும் ஆடம்பரம் மற்றும் போக்குவரத்து மற்றும் லாஜிஸ்டிக்ஸ் துறைகளில் கிட்டத்தட்ட பாதி (46 சதவீதம்) ஊழியர்கள் ஐக்கிய அரபு அமீரகத்தின் வேலைச் சந்தை குறித்து மிகுந்த நம்பிக்கையுடன் உள்ளனர் என தெரிவிக்கப்பட்டுள்ளது.
மேலும் 2024 இல், குறிப்பாக IT (AI, கிளவுட் கம்ப்யூட்டிங், இயந்திர கற்றல், இணைய பாதுகாப்பு), வங்கி, சில்லறை விற்பனை, முதலீடுகள், லாஜிஸ்டிக்ஸ், இ-காமர்ஸ், விருந்தோம்பல் (hospitality), எண்ணெய் மற்றும் எரிவாயு போன்ற துறைகளில் ஊழியர்களை பணியமர்த்துதல் அதிகமாக இருக்கும் என்று எதிர்பார்க்கப்படுவதாகவும் கூறப்படுகின்றது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
