சமீபத்திய மோசமான வானிலையைத் தொடர்ந்து, எமிரேட்டின் பிரதான சாலை நெட்வொர்க் மற்றும் முக்கியப் பகுதிகள் தற்போது 100% மீட்கப்பட்டுவிட்டதாகவும், சிறிய அளவிலான பாதிப்புகள் உடனடியாகச் சரிசெய்யப்பட்டுவிட்டதாகவும் துபாயின் சாலைகள் மற்றும் போக்குவரத்து ஆணையம் (RTA) தெரிவித்துள்ளது.
மேலும் வானிலை அமைப்பு வருவதற்கு முன்பே ஆயத்தப் பணிகள் தொடங்கப்பட்டதாகவும், இடையூறுகளைக் குறைக்கவும் போக்குவரத்துத் தொடர்ச்சியை உறுதி செய்யவும் முக்கியப் பங்காளிகளுடன் ஒருங்கிணைந்து முன்கூட்டிய நடவடிக்கைகள் செயல்படுத்தப்பட்டதாகவும் RTA-வின் சாலைகள் இயக்குநர் ஹமாத் அலி அல் ஷெஹி கூறியுள்ளார்.
எமராத் அல் யோம் பத்திரிகையின்படி, வானிலை நிகழ்வுக்கு முன்னதாக 14-க்கும் மேற்பட்ட முக்கிய இடங்களில் ஆணையம் மேம்பட்ட பொறியியல் தீர்வுகளைச் செயல்படுத்தியதாக அவர் கூறியுள்ளார்.
துபாய் காவல்துறை, துபாய் நகராட்சி, குடிமைப் பாதுகாப்பு மற்றும் துபாய் ஆம்புலன்ஸ் சேவைகள் கழகம், அத்துடன் தனியார் துறை கூட்டாளிகள் மற்றும் மேம்பாட்டாளர்களுடன் ஒருங்கிணைந்து, RTA விரிவான களத் திட்டங்களையும் அறிமுகப்படுத்தியது. மேலும் வளங்களைத் திறமையாகப் பயன்படுத்தவும், நீர் தேங்கும் பகுதிகளுக்கு விரைவாகப் பதிலளிக்கவும் துபாய் செயல்பாட்டுத் துறைகளாகப் பிரிக்கப்பட்டது என தெரிவிக்கப்பட்டுள்ளது.
அத்துடன் வானிலை மீட்பு நடவடிக்கைகள், ஆணையத்தின் ஒருங்கிணைந்த கட்டுப்பாட்டு மையத்தில் உள்ள கூட்டுக் கட்டளை அறை மூலம் நிர்வகிக்கப்பட்டன என்றும் இந்த மையம், தேசிய வானிலை ஆய்வு மையத்துடன் ஒருங்கிணைந்து, நிகழ்வுகளைக் கண்காணித்து, மழைக்கு முன்னும் பின்னும் தயார்நிலை அளவுகளைத் தீர்மானிக்கிறது என்றும் கூறப்பட்டுள்ளது.
முடிவெடுப்பதற்கும் மீட்புக் குழுக்களை வழிநடத்துவதற்கும், இந்த மையம் துபாய் எமிரேட் முழுவதும் உள்ள 10,000-க்கும் மேற்பட்ட கேமராக்கள், தரவுப் பகுப்பாய்வு, தரவு நுண்ணறிவுகள் மற்றும் முந்தைய வானிலை நிகழ்வுகளிலிருந்து கற்றுக்கொண்ட பாடங்களைச் சார்ந்துள்ளது என்று அல் ஷெஹி கூறினார்.
துபாய் முழுவதும் 380-க்கும் மேற்பட்ட பம்புகள், 500-க்கும் மேற்பட்ட தண்ணீர் டேங்கர்கள் மற்றும் 100 அவசரக்கால வாகனங்கள் பயன்படுத்தப்பட்டதாகவும், இவற்றுக்கு சுமார் 1,300 RTA பணியாளர்கள் ஆதரவளித்ததாகவும் அவர் மேலும் கூறியுள்ளார். இந்த வானிலை நிகழ்வின் போது பெரிய அளவிலான சாலை மூடல்கள் எதுவும் பதிவாகவில்லை என்றும், பாதிப்புகள் சிறிய அளவிலான பாதிப்புகளுடன் மட்டுமே இருந்ததாகவும், அவை விரைவாகத் தீர்க்கப்பட்டதாகவும் அவர் தெரிவித்தார்.
வெள்ளம் சூழ்ந்த பகுதிகளை விரைவாகச் சென்றடையக்கூடிய, பிரத்யேகமாக வடிவமைக்கப்பட்ட அதிக கொள்ளளவு கொண்ட வாகனங்கள் உட்பட, புதிய உபகரணங்களையும் தொழில்நுட்பங்களையும் அந்த ஆணையம் முதல் முறையாகப் பயன்படுத்தியது என தெரிவிக்கப்பட்டுள்ளது. மேலும் சுரங்கப்பாதைகள் மற்றும் கீழ்வழிப்பாதைகளில் நீர் மட்டங்களைக் கண்காணிக்கவும், நிகழ்நேரத் தரவுகளைக் கட்டுப்பாட்டு மையங்களுக்கு அனுப்பவும் திறன்மிகு அமைப்புகளும் பயன்படுத்தப்பட்டன எனவும் கூறப்பட்டுள்ளது. இது போக்குவரத்து மாற்றுப்பாதைகள் அல்லது முன்கூட்டியே தண்ணீரை அகற்றுதல் போன்ற தடுப்பு நடவடிக்கைகளை மேற்கொள்ள வழிவகுத்தது என தெரிவிக்கப்பட்டுள்ளது குறிப்பிடத்தக்கது.
