துபாய் எமிரேட் முழுவதும் இரவு நேர நீச்சல் நடவடிக்கைகளுக்கான தேவை அதிகரித்து வருவதால், துபாயின் இரவு நேர நீச்சல் கடற்கரைகளுக்கு வருகை தரும் பார்வையாளர்களின் எண்ணிக்கை, 2024-ஆம் ஆண்டுடன் ஒப்பிடும்போது கடந்த ஆண்டு 50 சதவீதம் அதிகரித்துள்ளதாக தெரிவிக்கப்பட்டுள்ளது.
மேலும் அமீரகத்தின் எமராத் அல் யோம் பத்திரிகையின்படி, அதிகரித்து வரும் தேவைக்கு பதிலளிக்கும் விதமாகவும், பொழுதுபோக்கு அம்சங்களைப் பன்முகப்படுத்தவும், வாழ்க்கைத் தரத்தை மேம்படுத்தவும் மேற்கொள்ளப்படும் முயற்சிகளின் ஒரு பகுதியாகவும், இந்தத் திட்டத்தை கூடுதல் பொது கடற்கரைகளுக்கு விரிவுபடுத்தும் திட்டங்களில் துபாய் நகராட்சி செயல்பட்டு வருவதாகக் கூறியுள்ளது.
அத்துடன் குடியிருப்பாளர்களும் சுற்றுலாப் பயணிகளும் பகல் நேரத்திற்குப் பிறகும் கடற்கரையை அனுபவிக்க அனுமதிக்கும் வகையில் தொடங்கப்பட்ட இந்த முயற்சியின் மூலம், ஜுமைரா 2, ஜுமைரா 3 மற்றும் உம் சுக்கீம் 1 ஆகிய மூன்று குறிப்பிட்ட இடங்களில், 2024-ல் சுமார் பத்து லட்சம் பார்வையாளர்களாக இருந்த வருகை, கடந்த ஆண்டு கிட்டத்தட்ட இருபது லட்சமாக உயர்ந்துள்ளது எனவும் தகவல் தெரிவிக்கப்பட்டுள்ளது.
இது குறித்து துபாய் நகராட்சியின் கடற்கரைகள் மற்றும் நீர்வழிகள் மேம்பாட்டுப் பிரிவின் இயக்குநர் அமல் அல் ஷம்சி கூறுகையில், இந்த வலுவான வருகையானது, ஒரு தனித்துவமான மற்றும் எளிதில் அணுகக்கூடிய அனுபவத்தை வழங்குவதில் இந்த முயற்சியின் வெற்றியை மீண்டும் உறுதிப்படுத்துகிறது என்று கூறியுள்ளார்.
மேலும் துபாயின் கடற்கரைகளை இரவு நேரங்களில் அனுபவிக்கும் வாய்ப்பில்தான் இதன் ஈர்ப்பு அடங்கியுள்ளது என்றும், இது குறிப்பாகக் குடும்பங்களுக்கும் நீர் விளையாட்டு ஆர்வலர்களுக்கும் மிகவும் கவர்ச்சிகரமானதாக அமைகிறது என்றும் அல் ஷம்சி குறிப்பிட்டுள்ளார்.
மேலும் வருகையாளர்களின் தொடர்ச்சியான அதிகரிப்பு, அங்குள்ள சேவைகளின் தரம், உள்கட்டமைப்பு மற்றும் பாதுகாப்பு நடவடிக்கைகள் மீதான பொதுமக்களின் நம்பிக்கையைப் பிரதிபலிக்கிறது என்று நகராட்சி கூறியுள்ளது.
இதனை தொடர்ந்து அல் மம்சார் க்ரீக் கடற்கரையின் சில பகுதிகள் உட்பட, கூடுதல் இடங்களுக்கு இரவு நேர நீச்சலை விரிவுபடுத்துவதற்கான திட்டங்கள் செயல்படுத்தப்பட்டு வருகின்றன; இப்பகுதி 24 மணி நேரமும் நீச்சலுக்காகத் திறந்திருக்கும் என்று எதிர்பார்க்கப்படுகிறது.
அது மட்டுமல்லாமல் அல் மம்சார் கார்னிச்சில், தனியுரிமையை உறுதி செய்வதற்கும், பாதுகாப்பான மற்றும் வசதியான சூழலை வழங்குவதற்கும் வடிவமைக்கப்பட்ட, பெண்களுக்கென ஒரு பிரத்யேகப் பகுதியும் அறிமுகப்படுத்தப்படும் என கூறப்பட்டுள்ளது.
இரவு நேரக் கடற்கரைகள், 24 மணி நேரப் பயன்பாட்டைச் சாத்தியமாக்கும் விளக்கு அமைப்புகள், விழிப்புணர்வுச் செய்திகளுக்கான டிஜிட்டல் திரைகள், நவீன கண்காணிப்பு அமைப்புகள் மற்றும் பயிற்சி பெற்ற உயிர்காப்பாளர் குழுக்கள் உள்ளிட்ட ஒருங்கிணைந்த சேவைகளுடன் அமைக்கப்பட்டுள்ளன. தற்போது, நீச்சல் நேரம் சூரிய மறைவு முதல் சூரிய உதயம் வரை அனுமதிக்கப்படுவது குறிப்பிடத்தக்கது.
