ஐக்கிய அரபு அமீரகம் பொதுப் போக்குவரத்துத் துறையில் ஒரு புதிய சகாப்தத்தில் அடியெடுத்து வைக்கிறது. நீண்டகாலமாக எதிர்பார்க்கப்பட்ட பயணிகள் ரயில் சேவையின் முதல் கட்டமாக அபுதாபி மற்றும் ஃபுஜைரா நிலையங்களுக்கு இடையே ஜூன் 30 அன்று சேவை தொடங்கப்படும் என்று ‘எதிஹாட் ரயில்’ (Etihad Rail) நிறுவனம் அறிவித்துள்ளது.
அபுதாபியின் பட்டத்து இளவரசரும், அபுதாபி நிர்வாகக் குழுவின் தலைவருமான ஷேக் காலித் பின் முகமது பின் சையத் அல் நஹ்யான் அவர்கள், அபுதாபியின் முகமது பின் சையத்நகரில் (Mohammed bin Zayed City) அமைந்துள்ள புதிய பயணிகள் ரயில் நிலையத்தைத் திறந்து வைத்தபோது இந்த அறிவிப்பு வெளியிடப்பட்டுள்ளது.
சமீபத்திய அறிவிப்பின் படி, செயல்பாட்டின் முதல் கட்டம் அபுதாபி மற்றும் ஃபுஜைராவை இணைக்கும். இதன் மூலம் பயணிகள் இந்த இரண்டு எமிரேட்களுக்கு இடையே வெறும் 1 மணிநேரம் 45 நிமிடங்களில் பயணிக்க முடியும். முழுமையான பயணிகள் ரயில் கட்டமைப்பு அதிகாரப்பூர்வமாக செப்டம்பர் 30, 2026 அன்று பயன்பாட்டிற்கு வரும் என்றும் அதிகாரிகள் தெரிவித்துள்ளனர்.
கட்டம் கட்டமாக மேற்கொள்ளப்படும் செயல்பாட்டின் ஒரு பகுதியாக, துபாய் மற்றும் அல் தைத் (Al Dhaid) ஆகிய இடங்களில் உள்ள நிலையங்கள் செப்டம்பர் 30, 2026 அன்று செயல்படத் தொடங்கும் என்றும் அறிவிக்கப்பட்டுள்ளது. பின்னர் டிசம்பர் 30, 2026 அன்று அல் தஃப்ரா (Al Dhafra) பகுதிக்குச் சேவைகள் விரிவுபடுத்தப்படும். இறுதிக்கட்டத்தில், மார்ச் 30, 2027 அன்று ரயில்கள் ஷார்ஜாவைச் சென்றடையும், இதன் மூலம் தேசிய அளவிலான பயணிகள் ரயில் வழித்தடம் முழுமையடையும் என்று தெரிவிக்கப்பட்டுள்ளது.
புதிய அபுதாபி நிலையத்தின் திறப்பு விழாவின் போது, தடையற்ற பயண அனுபவத்தை வழங்கும் வகையில் வடிவமைக்கப்பட்ட நிலையத்தின் வசதிகள், நவீன செயல்பாட்டு அமைப்புகள் மற்றும் பயணிகள் சேவைகளை ஷேக் காலித் பார்வையிட்டார். இந்த நிலையத்தில் கஃபேக்கள், உணவகங்கள், சில்லறை விற்பனைக் கடைகள் மற்றும் சர்வதேச பிராண்டுகள் உள்ளிட்ட நவீன வசதிகள் உள்ளன. மேலும் பயணிகளுக்கு ரயிலுக்குள்ளேயே உணவு மற்றும் பானம் அருந்தும் வசதிகளும் வழங்கப்படும் என்று கூறப்பட்டுள்ளது.
அதுமட்டுமில்லாமல், ஜூன் 23 முதல் நிறுவனத்தின் அதிகாரப்பூர்வ இணையதளம் மற்றும் மொபைல் செயலி மூலம் டிக்கெட் விற்பனை தொடங்கும் என்று எதிஹாட் ரயில் உறுதிப்படுத்தியுள்ளது. அபுதாபி-ஃபுஜைரா வழித்தடத்தில் ‘கம்போர்ட் கிளாஸ்’ (Comfort Class) பயணத்திற்கு 55 திர்ஹம்ஸ் மற்றும் ‘பிரீமியம் கிளாஸ்’ (Premium Class) பயணத்திற்கு 120 திர்ஹம்ஸ் என கட்டணங்கள் நிர்ணயிக்கப்பட்டுள்ளன.
மொத்தம் 13 ரயில்களைக் கொண்ட தொகுப்புடன் இந்தச் சேவை இயக்கப்படும். ஒவ்வொரு ரயிலும் 400 பயணிகள் வரை பயணிக்கும் திறன் கொண்டது, இது சாலைப் பயணத்திற்கு ஒரு வசதியான மற்றும் திறமையான மாற்று போக்குவரத்து முறையாக அமையும்.
இந்தத் தொடக்க நிகழ்வு, ஐக்கிய அரபு அமீரகத்தின் ‘தேசிய ரயில்வே திட்டத்தில்’ (National Railway Programme) ஒரு முக்கிய மைல்கல்லாக அமைகிறது. நாட்டின் ‘Projects of the 50’ (ஐம்பது ஆண்டுகளுக்கான திட்டங்கள்) முன்முயற்சியின் ஒரு பகுதியாக 2021-இல் இத்திட்டம் அறிமுகப்படுத்தப்பட்டது. பொருளாதார வளர்ச்சி, சுற்றுலா, முதலீடு மற்றும் நகர்ப்புற மேம்பாடு ஆகியவற்றை ஆதரிக்கும் அதே வேளையில், எமிரேட்களை இணைக்கும் ஒருங்கிணைந்த போக்குவரத்து கட்டமைப்பை உருவாக்குவதே இத்திட்டத்தின் நோக்கமாகும்.
மேலும், முக்கிய நகரங்களுக்கு இடையே இணைப்பை மேம்படுத்தி, பயண வசதியை அதிகரித்து, நாட்டின் போட்டித்திறனை வலுப்படுத்தும் உலகத் தரம் வாய்ந்த உள்கட்டமைப்பை உருவாக்கும் ஐக்கிய அரபு அமீரகத்தின் தொலைநோக்குப் பார்வையை இந்தப் பயணிகள் ரயில் திட்டம் பிரதிபலிக்கிறது என்று ஷேக் காலித் கூறியுள்ளார். அதுமட்டுமில்லாமல், திட்டமிடப்பட்ட காலத்திற்கு முன்பே இத்திட்டம் நிறைவடைந்திருப்பது என்பது திறமையான செயலாக்கம் மற்றும் புதுமைகளின் மூலம் லட்சியத் திட்டங்களை நனவாக்கும் ஐக்கிய அரபு அமீரகத்தின் திறனை நிரூபிக்கிறது என்றும் அவர் குறிப்பிட்டுள்ளார்.
அதிகாரிகளின் கூற்றுப்படி, இந்த ரயில் சேவை முழுமையாகச் செயல்பாட்டுக்கு வரும்போது, இந்தப் பயணிகள் ரயில் வலையமைப்பு அமீரகங்களுக்கு இடையே வேகமான பயணத்தை வழங்கும் என்றும், சாலைப் போக்குவரத்தைச் சார்ந்திருப்பதைக் குறைக்கும் என்றும், ஐக்கிய அரபு அமீரகம் முழுவதும் உள்ள வணிகங்கள், குடியிருப்பாளர்கள் மற்றும் பார்வையாளர்களுக்குப் புதிய வாய்ப்புகளைத் திறக்கும் என்றும் எதிர்பார்க்கப்படுகிறது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
