நெரிசல் மற்றும் முறைசாரா குடியிருப்புப் பிரச்சினைகளுக்குத் தீர்வு காணவும், அதே வேளையில் வாடகைதாரர்கள் மற்றும் சொத்து உரிமையாளர்களின் நலன்களைப் பாதுகாக்கவும், துபாய் முழுவதும் பகிரப்பட்ட குடியிருப்பு வசதிகளை (shared housing) ஒழுங்குபடுத்தும் புதிய சட்டத்தை துபாய் அறிமுகப்படுத்தியுள்ளது. இச்சட்டம் அனுமதி பெறுதல், குத்தகைக்கு விடுதல், குடியிருப்போர் எண்ணிக்கை வரம்பு மற்றும் பாதுகாப்புத் தரநிலைகள் குறித்த கடுமையான விதிகளை வகுத்துள்ளது.
ஐக்கிய அரபு அமீரகத்தின் துணை அதிபரும் பிரதமரும் துபாயின் ஆட்சியாளருமான ஷேக் முகமது பின் ரஷித் அல் மக்தூம் அவர்களால் 2026-ஆம் ஆண்டின் சட்டம் எண் (4) வெளியிடப்பட்டது. இச்சட்டம் பகிரப்பட்ட குடியிருப்பு வசதிகளை நிர்வகிப்பதற்கான தெளிவான சட்டக் கட்டமைப்பை உருவாக்குவதுடன், வாழ்க்கைச் சூழலை மேம்படுத்தவும், துபாயின் ரியல் எஸ்டேட் துறையின் ஸ்திரத்தன்மையை ஆதரிக்கவும் நோக்கமாகக் கொண்டுள்ளது.
பகிரப்பட்ட குடியிருப்புக்கு அனுமதி கட்டாயம்
புதிய சட்டத்தின்படி, துபாய் முனிசிபாலிட்டியிடமிருந்து (Dubai Municipality) முறையான அனுமதி பெறாமல் எந்தவொரு தனிநபரோ அல்லது நிறுவனமோ ஒரு சொத்தைப் பகிரப்பட்ட குடியிருப்பு (shared housing) வசதியாகப் பயன்படுத்த முடியாது. இந்த அனுமதிகள் துபாய் நிலத் துறை (DLD) மற்றும் பிற தொடர்புடைய அதிகாரிகளின் ஒருங்கிணைப்புடன் வழங்கப்படும் என்பது குறிப்பிடத்தக்கது.
இந்த அனுமதிகள் பொதுவாக ஓராண்டு காலத்திற்குச் செல்லுபடியாகும், மேலும் ஓராண்டுக்கு நீட்டிக்கப்படலாம். சொத்து உரிமையாளர்கள் இரண்டு ஆண்டுகளுக்கான அனுமதிக்கும் விண்ணப்பிக்கலாம். அனுமதி காலாவதியாவதற்கு குறைந்தது 30 நாட்களுக்கு முன்னதாகவே புதுப்பிப்பதற்கான விண்ணப்பங்களைச் சமர்ப்பிக்க வேண்டும் என்று கூறப்பட்டுள்ளது.
மேலும், அனைத்து பகிரப்பட்ட குடியிருப்பு அலகுகளும் தொழில்நுட்பத் தரநிலைகளுக்கு இணங்க வேண்டும் என்று அதிகாரிகள் தெரிவித்துள்ளனர். இதில் அதிகபட்ச குடியிருப்போர் எண்ணிக்கை வரம்பு, ஒரு குடியிருப்பாளருக்கான குறைந்தபட்ச இடவசதி மற்றும் தேவையான பொதுவான வசதிகள் ஆகியவை அடங்கும்.
இச்சட்டம் புதிய குத்தகை விதிகளையும் அறிமுகப்படுத்துகிறது. அதன் படி, சொத்து உரிமையாளர்கள் அல்லது உரிமம் பெற்ற நிறுவனங்கள் மட்டுமே பகிரப்பட்ட குடியிருப்பு அலகுகளைக் குத்தகைக்கு விட அனுமதிக்கப்படுவார்கள்.
அதேபோல், வாடகைதாரர்கள் சொத்தின் எந்தப் பகுதியையும் மறு-குத்தகைக்கு (sublease) விட அனுமதிக்கப்பட மாட்டார்கள்.
பகிரப்பட்ட குடியிருப்பு யூனிட்களை உரிமையாளரே நேரடியாகக் குத்தகைக்கு விடலாம், உரிமையாளரின் சார்பாக உரிமம் பெற்ற நிறுவனம் நிர்வகிக்கலாம், அல்லது வாடகைதாரர்களுக்குச் சட்டப்பூர்வமாக மறு-குத்தகைக்கு விடும் உரிமம் பெற்ற நிறுவனமும் குத்தகைக்கு விடலாம் என்று கூறப்படுகிறது.
பாதுகாப்புத் தரநிலைகள் மற்றும் கடுமையான அபராதங்கள்
அனைத்து பகிரப்பட்ட குடியிருப்பு யூனிட்களும் சுகாதாரம், தீ பாதுகாப்பு, தூய்மை, மின்சாரம், கட்டிடம் மற்றும் பாதுகாப்புத் தேவைகளைப் பூர்த்தி செய்ய வேண்டும்.
பகிரப்பட்ட குடியிருப்புச் சொத்துக்களை விளம்பரப்படுத்துதல் மற்றும் சந்தைப்படுத்துதல் தொடர்பான விதிகள் உட்பட, வீட்டு உரிமையாளர்கள் மற்றும் வாடகைதாரர்களின் பொறுப்புகளையும் இச்சட்டம் வரையறுக்கிறது.
விதிமீறல்களில் ஈடுபடுபவர்களுக்கு 500 திர்ஹம் முதல் 500,000 திர்ஹம் வரை அபராதம் விதிக்கப்படலாம். ஓராண்டுக்குள் மீண்டும் மீண்டும் செய்யப்படும் குற்றங்களுக்கு, அதிகபட்சமாக 1 மில்லியன் திர்ஹாம் வரை அபராதம் இரட்டிப்பாக்கப்படலாம் என்றும் கூறப்பட்டுள்ளது.
நிதி அபராதங்களுடன் கூடுதலாக, துபாய் நிலத் துறை (Dubi Land Department) வணிக நடவடிக்கைகளை ஆறு மாதங்கள் வரை இடைநிறுத்தலாம், அனுமதிகளை ரத்து செய்யலாம், வணிக உரிமங்களைத் திரும்பப் பெறலாம், மீறல்கள் சரிசெய்யப்படும் வரை பயன்பாட்டுச் சேவைகளைத் துண்டிக்கலாம் அல்லது விதிமுறைகளுக்கு இணங்காத பகிரப்பட்ட வீட்டு அலகுகளை வெளியேற்ற உத்தரவிடலாம் என்று அதிகாரிகள் எச்சரிக்கின்றனர்.
ஓராண்டு கால அவகாசம்
சட்டம் அமலுக்கு வருவதற்கு முன்பே பகிரப்பட்ட வீடுகளை இயக்கி வரும் சொத்து உரிமையாளர்கள் மற்றும் உரிமம் பெற்ற நிறுவனங்கள், புதிய விதிமுறைகளுக்கு இணங்க ஓராண்டு அவகாசம் பெறுவார்கள். தேவைப்பட்டால், துபாய் முனிசிபாலிட்டி ஒரு முறை கால நீட்டிப்பை வழங்கலாம் என்று கூறப்படுகிறது.
இந்தச் சட்டம் அதிகாரப்பூர்வ அரசிதழில் வெளியிடப்பட்ட 180 நாட்களுக்குப் பிறகு அமலுக்கு வரும் என்றும் தெரிவிக்கப்பட்டுள்ளது.
துபாய் நகராட்சி மற்றும் DLD அமலாக்கத்தை மேற்பார்வையிடும்
துபாய் முனிசிபாலிட்டி, நகர்ப்புறத் திட்டமிடல், உள்கட்டமைப்பு, மக்கள்தொகை அடர்த்தி மற்றும் சுற்றுப்புறங்களின் தன்மை ஆகியவற்றின் அடிப்படையில் அத்தகைய தங்குமிடங்கள் எங்கு அனுமதிக்கப்படுகின்றன என்பதைத் தீர்மானிப்பது உட்பட, பகிரப்பட்ட வீடுகளின் ஒழுங்குமுறையை மேற்பார்வையிடும். மேலும், அனுமதிகள் மற்றும் பதிவுகளுக்கான ஒருங்கிணைந்த டிஜிட்டல் தளத்தையும் இது நிர்வகிக்கும்.
அதேபோல், துபாய் நிலத் துறை, பகிரப்பட்ட வீட்டு அலகுகளுக்கான மின்னணுப் பதிவேட்டைப் பராமரிக்கும், குத்தகை மற்றும் மேலாண்மை ஒப்பந்தங்களை மேற்பார்வையிடும், இணக்கத்தைக் கண்காணிக்கும் மற்றும் பகிரப்பட்ட வீட்டுச் சொத்துக்களின் பண்புகளின் அடிப்படையில் ஒரு வாடகைக் குறியீட்டை வெளியிடும் என்று தெரிவிக்கப்பட்டுள்ளது.
சட்டத்தின் இலக்குகள்
அதிகாரிகளின் கூற்றுப்படி, இந்தப் புதிய சட்டம் பின்வருவனவற்றை நோக்கமாகக் கொண்டுள்ளது:
- துபாய் முழுவதும் பகிரப்பட்ட வீடுகளின் மேலாண்மை மற்றும் குடியிருப்பை ஒழுங்குபடுத்துதல்.
- பாதுகாப்பான மற்றும் பொருத்தமான தங்குமிடத்தை உறுதி செய்வதன் மூலம் வாழ்க்கைத்தரத்தை மேம்படுத்துதல்.
- குடியிருப்பு சமூகங்களில் ஏற்படும் நெரிசலைக் குறைத்தல்.
- கட்டுமானம், நிலப் பயன்பாடு மற்றும் கட்டிட விதிமுறைகள் தொடர்பான மீறல்களைக் கையாளுதல்.
- நில உரிமையாளர்கள் மற்றும் குத்தகைதாரர்கள் இருவரின் உரிமைகளையும் பாதுகாப்பதுடன், ஒரு நிலையான மற்றும் நீடித்த ரியல் எஸ்டேட் சந்தையை ஆதரித்தல்.
இந்தச் சட்டம் தனியார் மேம்பாட்டுப் பகுதிகள் மற்றும் சுதந்திர மண்டலங்கள், அத்துடன் சொத்து உரிமையாளர்கள், உரிமம் பெற்ற இயக்குநர்கள் மற்றும் பகிரப்பட்ட வீட்டு அலகுகளின் குத்தகைதாரர்களுக்கும் பொருந்தும். இருப்பினும், கூட்டுத் தொழிலாளர் தங்குமிடங்கள் இதன் வரம்பிலிருந்து விலக்கப்பட்டுள்ளன.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
