“மற்ற அனைவரும் உயிரிழப்பதை என்னால் அனுமதிக்க முடியவில்லை!” ஃப்ளை-துபாய் விமானத்தை பேராபத்தில் இருந்து காப்பாற்றிய இந்திய விமானி கூறியது என்ன?

ஃப்ளை-துபாய் விமானத்தின் காக்பிட் பகுதியில் ஏற்பட்ட தகராறின் போது பலத்த காயமடைந்த இந்திய கேப்டன் ஸ்மித் மச்சார் (Smit Machchhar), காயமடைந்த நிலையிலும் தான் விமானத்தின் கட்டுப்பாட்டை மீண்டும் பெறப் போராடிய தருணங்கள் குறித்து முதன்முறையாகப் பொதுவெளியில் பேசியுள்ளார்.

வெள்ளிக்கிழமையன்று பிரதமர் நரேந்திர மோடியுடன் நடைபெற்ற 10 நிமிட காணொளி உரையாடலின் போது, ​​காக்பிட்டில் காயத்துடன் சரிந்து கிடந்த நிலையிலும், விமானம் கீழே இறங்கிக்கொண்டிருப்பதை உணர்ந்து செயல்பட வேண்டிய கட்டாயத்தில் இருந்ததாக மச்சார் அச்சம்பவம் குறித்து நினைவு கூர்ந்தார்.

“அந்தத் தருணத்தில், நான் என் உயிருக்காகப் போராடிக்கொண்டிருந்தேன்,” என்று மோடியிடம் கூறிய மச்சார், காயங்கள் இருந்தபோதிலும், தனது 17 ஆண்டுகால விமானப் பணி அனுபவம், விமானத்தின் கருவிகளைப் பார்க்க முடியாத நிலையிலும் உள்ளே என்ன நடக்கிறது என்பதைப் புரிந்துகொள்ள உதவியதாகக் குறிப்பிட்டுள்ளார்.

இது குறித்து அவர் கூறியதாவது: “நான் 17 ஆண்டுகளாக விமானியாகவும், கடந்த 11 ஆண்டுகளாக கேப்டனாகவும் பணியாற்றி வருகிறேன். விமானத்தைப் பார்க்காமலேயே அதன் நிலையை என்னால் உள்ளுணர்வால் புரிந்துகொள்ள முடியும். நான் கீழே விழுந்து கிடந்தபோதும், விமானம் கீழே இறங்கிக்கொண்டிருப்பதை என்னால் உணர முடிந்தது,” என்று அவர் தெரிவித்துள்ளார்.

மேலும், அந்த சமயத்தில் விமானத்தில் இருந்த அனைவரின் உயிரும் ஆபத்தில் இருக்கக்கூடும் என்பதால், தான் மீண்டும் எழுந்திருக்க வேண்டும் என்பது மச்சாருக்குத் தெரிந்திருந்தது.

“அந்தத் தருணத்தில் எனக்குள் தோன்றியது இதுதான் – இன்னும் ஒரே ஒரு முயற்சிதான், ஸ்மித்! அதைச் செய்துவிடு. கதவு அங்கேயேதான் இருக்கிறது,” என்று அவர் நினைவு கூர்ந்தார்.

அத்துடன், தாக்குதலுக்குள்ளான நிலையிலும், தன்னால் காக்பிட் கதவை அடையவும் திறக்கவும் முடிந்ததாகவும், உடனே பயணிகள் மற்றும் விமானக் குழுவினர் காக்பிட்டிற்குள் நுழைந்து தாக்குதல் நடத்தியவரைக் கட்டுப்படுத்த உதவியதாகவும் அவர் குறிப்பிட்டுள்ளார்.

மேலும், “நான் என் உயிருக்காக இதைச் செய்தேன்; அதே சமயம், மற்றவர்கள் அனைவரும் இறந்துபோக நான் அனுமதிக்க முடியாது என்பதையும் அறிந்திருந்தேன்,” என்று அவர் கூறியுள்ளார்.

நிலைமையைக் கட்டுப்பாட்டிற்குள் கொண்டுவருவதில் அனைவரும் முக்கியப் பங்காற்றினர் என்பதை வலியுறுத்திய மச்சார், இதில் தலையிட்ட பயணிகள் மற்றும் விமானக் குழுவினருக்கும் பாராட்டு தெரிவித்ததாகக் கூறப்படுகிறது.

தொடர்ந்து அந்தக் கடினமான சூழலை நினைவு கூர்ந்த மச்சார், வலியுடன் போராடியபோது தான் இறைவனை நோக்கி வேண்டிக்கொண்டதாகக் கூறினார். “எனக்கு வலி ஏற்படும்போதெல்லாம் நான் அனுமன் சாலீசாவை ஜபிப்பேன். அந்தச் சமயத்திலும் நான் அதைத்தான் ஜபித்துக்கொண்டிருந்தேன். கடவுள் என்னைக் காப்பாற்றினார் என்பது எனக்குத் தெரியும்,” என்று அவர் மோடியிடம் தெரிவித்துள்ளார்.

விமானத்தில் நடந்தது என்ன?

புதன்கிழமையன்று துபாயிலிருந்து டெல் அவிவ் நகருக்குச் சென்றுகொண்டிருந்த ‘ஃப்ளைதுபாய்’ (flydubai) விமானம் FZ1073-இல் இந்தச் சம்பவம் நடந்தது. போயிங் 737 மேக்ஸ் 8 (Boeing 737 MAX 8) ரக அந்த விமானத்தில் 174 பயணிகளும் எட்டு விமானக் குழுவினரும் இருந்தனர்.

விமானம் பறந்துகொண்டிருந்தபோது, ​​விமானி அறையில் (cockpit) ஏற்பட்ட பிரச்சனையில், சுமார் 29 வினாடிகளில் 14,000 அடிக்கும் அதிகமான உயரத்தை விமானம் இழந்ததற்கு முன்னதாகவே, அது அவசரக்காலக் குறியீடுகளை (emergency codes) அனுப்பியதை விமானப் போக்குவரத்துத் தரவுகள் காட்டியுள்ளன.

இந்த மோதலின்போது மச்சார் (Machchhar) காயமடைந்தார். பின்னர் விமானி அறையின் கதவு திறக்கப்பட்டது. இதனால் பயணிகளும் குழுவினரும் உள்ளே சென்று தாக்குதல் நடத்தியவரைக் கட்டுப்படுத்த உதவ முடிந்தது.

மேலும், அதே விமானத்தில் பயணித்த, பணியில் இல்லாத ‘ஃப்ளைதுபாய்’ விமானிகள் இருவர் விமானத்தின் பாதுகாப்பை உறுதிப்படுத்த உதவியதாகக் கூறப்படுகிறது. பின்னர், விமானம் சவுதி அரேபியாவின் தபூக் (Tabuk) நகருக்குத் திருப்பிவிடப்பட்டு, அங்கு பாதுகாப்பாகத் தரையிறக்கப்பட்டது.

முதல் அதிகாரி (first officer) விமானியைத் தாக்கியதாகவும், இதில் இரு விமானிகளும் காயமடைந்ததாகவும் சவுதி அரேபியாவின் முதற்கட்ட விசாரணையில் தெரியவந்துள்ளது. தாக்குதலுக்கான காரணம் இன்னும் கண்டறியப்படவில்லை. சம்பவம் குறித்த விசாரணை தொடர்ந்து நடைபெற்று வருவதாக அறிக்கைகள் கூறுகின்றன.

மேலதிக மருத்துவச் சிகிச்சைக்காக ஐக்கிய அரபு அமீரகம் திரும்புவதற்கு முன், மச்சார் முதலில் தபூக் நகரில் சிகிச்சை பெற்றார்.

பின்னர், மருத்துவமனைக்குச் சென்று விமானியையும் அவரது குடும்பத்தினரையும் சந்தித்த அமீரகத்திற்கான இந்தியத் தூதர் தீபக் மிட்டல், மச்சார் நன்றாகக் குணமடைந்து வருவதாகத தெரிவித்துள்ளார்.

“அவர் வெளிப்படையாகப் பேசினார், புன்னகைத்துச் சிரித்தார்; இது எங்களுக்கும், எல்லாவற்றிற்கும் மேலாக அவரது குடும்பத்தினருக்கும் மிகுந்த நிம்மதியை அளித்தது,” என்றும் மிட்டல் கூறியுள்ளார்.

ஐக்கிய அரபு அமீரகம், சவுதி அரேபியா மற்றும் இஸ்ரேல் ஆகிய நாடுகளின் அதிகாரிகள் இச்சம்பவம் குறித்து விசாரணை நடத்தி வருகின்றனர். அதேவேளையில், நடந்த சம்பவம் குறித்து அவசரப்பட்டு யூகங்களை வெளியிட வேண்டாம் என்று ‘ஃப்ளைதுபாய்’ நிறுவனம் பொதுமக்களைக் கேட்டுக்கொண்டுள்ளது.

இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel