திகிலூட்டும் விர்ச்சுவல் ரியாலிட்டி சவாரிகள், கண்கவர் லேசர் நிகழ்ச்சிகள், மிதக்கும் சந்தை (floating market) மற்றும் உலகம் முழுவதிலுமிருந்து கொண்டுவரப்பட்ட கலாச்சார அனுபவங்கள் என, அபுதாபியின் ‘ஷேக் சையத் திருவிழா’ (Sheikh Zayed Festival) இந்த சீசனில் அல் வத்பாவை (Al Wathba) குடும்பங்கள் கொண்டாடும் ஒரு துடிப்பான பொழுதுபோக்கு இடமாக மாற்றியுள்ளது. அனைத்து வயதினருக்கும் ஏற்ற அம்சங்களைக் கொண்ட இந்தத் திருவிழாவில், வெறும் 10 திர்ஹம் முதல் தொடங்கும் நுழைவுச் சீட்டுகளைப் பெற்று, உலக கலாச்சாரங்களை அறிந்துகொள்ளலாம், நேரலை நிகழ்ச்சிகளை ரசிக்கலாம் மற்றும் பல புதிய அனுபவங்களை ஒரே இடத்தில் கண்டுகளிக்கலாம். இது குடும்பங்களுக்கு ஒரு மலிவு விலைப் பயணமாக அமைகிறது.
இந்த பொழுதுபோக்கு பூங்காவான வொண்டர்லேண்ட், புதிய சவாரிகளையும் அனுபவங்களையும் அறிமுகப்படுத்தியுள்ளது. அதே நேரத்தில், அல் வத்பா மிதக்கும் சந்தை மற்றும் அரிய உயிரினங்கள் காப்பகம் போன்ற ஈர்ப்புகள், பொழுதுபோக்கு மண்டலங்களைத் தாண்டி பார்வையாளர்கள் மேலும் ஆராய்வதற்கு வாய்ப்பளிக்கின்றன.
இந்த சீசன் முழுவதும் என்ன எதிர்பார்க்கலாம்?
ஐக்கிய அரபு அமீரக நாகரிக அரங்குகள் (UAE Civilisation pavilion), ஹெரிட்டேஜ் வில்லேஜ் மற்றும் பிரபலமான சூக் ஆகியவை இந்த விழாவின் மையமாக விளங்குகின்றன. இவை நேரடி நிகழ்ச்சிகள், பாரம்பரிய கைவினைப் பொருட்கள் மற்றும் கலாச்சார செயல்விளக்கங்கள் மூலம் அமீரகப் பாரம்பரியங்களை வெளிப்படுத்துகின்றன.
இந்த சீசனில் 15க்கும் மேற்பட்ட நாடுகள் மற்றும் பிராந்தியங்கள் தங்களது பிரத்யேக அரங்குகளை அமைத்துள்ளன, அவற்றுள் சில:
- இந்தியா
- சீனா
- ஜப்பான்
- துருக்கி
- மொராக்கோ
- எகிப்து
- பாகிஸ்தான்
- தாய்லாந்து
- உஸ்பெகிஸ்தான்
- ஈரான்
- அமெரிக்கா
- லெவண்ட் மற்றும் ஈராக்
- யேமன்
- சிரியா
- வளைகுடா ஒத்துழைப்பு கவுன்சில் (GCC) நாடுகள்
- ஆப்பிரிக்கா
இந்த சீசன் முழுவதும் நடைபெறும் கலை மற்றும் இசை நிகழ்ச்சிகள், சிறப்பு விழாக்கள், தேசிய கொண்டாட்டங்கள் மற்றும் விளையாட்டு நிகழ்வுகளும் இந்த விழாவில் இடம்பெற்றுள்ளன.
மேலும், தேசிய நூலகம் மற்றும் ஆவணக்காப்பகம், அபுதாபி கலாச்சாரம் மற்றும் சுற்றுலாத் துறை, அபுதாபி காவல்துறை, அபுதாபி நீதித்துறை, மாற்றுத்திறனாளிகளுக்கான சையத் உயர் அமைப்பு, அரேபிய சலூக்கி மையம் மற்றும் ஷேக் மன்சூர் பின் சையத் வேளாண் சிறப்பு விருது உள்ளிட்ட அரசு நிறுவனங்களால் நடத்தப்படும் பிரத்யேக அரங்குகளைப் பார்வையாளர்கள் சுற்றிப் பார்க்கலாம்.
அபுதாபியின் பிரபலமான இந்தக் கொண்டாட்ட நிகழ்வு தினமும் மாலை 4 மணிக்குத் திறக்கும்.
- வார நாட்கள்: மாலை 4 மணி முதல் நள்ளிரவு வரை
- வார இறுதி நாட்கள் மற்றும் பொது விடுமுறை நாட்கள்: மாலை 4 மணி முதல் அதிகாலை 1 மணி வரை
டிக்கெட்டுகளை முன்பதிவு செய்வது எப்படி?
பார்வையாளர்கள் பொது நுழைவுச் சீட்டுகள் மற்றும் VIP தொகுப்புகளை அதிகாரப்பூர்வ இணையதளமான zayedfestival.ae மூலம் முன்பதிவு செய்து கொள்ளலாம்.
நுழைவுச்சீட்டுகளின் விலை எவ்வளவு?
பொது நுழைவுக் கட்டணம் ஒரு நபருக்கு 10 திர்ஹம்ஸ் ஆகும்.
பின்வரும் பார்வையாளர்கள் இலவசமாக நுழையலாம்:
- மாற்றுத்திறனாளிகள் மற்றும் அவர்களுடன் வரும் ஒருவர்.
- மூன்று வயதுக்குட்பட்ட குழந்தைகள்.
- 60 வயது மற்றும் அதற்கு மேற்பட்ட பார்வையாளர்கள்.
குடும்பங்கள் மற்றும் அடிக்கடி வருகை தருபவர்களுக்காக, விஐபி பாக்ஸ் (VIP Box) பேக்கேஜ்கள் மூன்று வகைகளில் கிடைக்கின்றன:
- சில்வர் (Silver) – 375 திர்ஹம்
- கோல்ட் (Gold) – 650 திர்ஹம்
- பிளாட்டினம் (Platinum) – 850 திர்ஹம்
ஒவ்வொரு பேக்கேஜிலும் பல பொது நுழைவுச் சீட்டுகள், புத்தாண்டு கொண்டாட்டத்திற்கான பிரத்யேகச் சீட்டுகள், வொண்டர்லேண்ட் (Wonderland) பாஸ், விஐபி வாகன நிறுத்துமிட வசதி, ராஃபிள் கூப்பன்கள் (raffle coupons) மற்றும் தேர்ந்தெடுக்கப்பட்ட உணவகங்கள் மற்றும் பெவிலியன்களில் 10 முதல் 15 சதவீத தள்ளுபடிகள் ஆகியவை அடங்கும் என்று தெரிவிக்கப்பட்டுள்ளது. இருப்பினும், புத்தாண்டு தினத்தன்று சாதாரண நுழைவுச் சீட்டுகள் செல்லாது என்று தெரிவிக்கப்பட்டுள்ளது.
மேற்கூறியவாறு எண்ணற்ற செயல்பாடுகள் தினந்தோறும் நடைபெறுவதால் குடும்பத்தினருடனும் நண்பர்களுடனும் சிறந்த பொழுதை கழிக்க இந்த இடம் மிக சிறந்ததொரு தேர்வாகும்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
