வெளிநாடுகளில் இருந்து இந்தியாவிற்கு வருவதற்கு முன்பு ஏர் சுவிதா படிவத்தை பூர்த்தி செய்ய வேண்டும்!! அதிகாரிகள் வலியுறுத்தல்

ஆப்பிரிக்க நாடுகளில் தொடர்ந்து பரவி வரும் எபோலா பரவலுக்கு மத்தியில், சர்வதேச விமான நிலையங்களில் அதிகாரிகள் பரிசோதனைகளைத் தீவிரப்படுத்தியுள்ளதால், இந்தியாவிற்குப் பயணம் செய்யும் நபர்கள், இந்தியாவிற்கு வருவதற்கு முன்பு கட்டாய ஆன்லைன் சுகாதார அறிவிப்பைப் பூர்த்தி செய்ய வேண்டும்.

அனைத்து சர்வதேசப் பயணிகளும் இந்தியாவிற்கு வருவதற்கு 24 மணி நேரத்திற்குள் ஏர் சுவிதா சுய-அறிவிப்புப் படிவத்தை (SDF) சமர்ப்பிக்க வேண்டும் என்று இந்தியாவின் குடிவரவுப் பணியகம் ஒரு அறிவுறுத்தலை வெளியிட்டுள்ளது. இந்த அறிவிப்பின் படி, தேசியம் அல்லது பயண வரலாறு ஆகியவற்றைப் பொருட்படுத்தாமல் இந்தக் கட்டுப்பாடு பொருந்தும் என்பது குறிப்பிடத்தக்கது.

இதில் இந்திய பாஸ்போர்ட் வைத்திருப்பவர்கள், வெளிநாட்டு இந்தியக் குடிமக்கள் (OCI) அட்டை வைத்திருப்பவர்கள் மற்றும் வெளிநாட்டு பாஸ்போர்ட் வைத்திருப்பவர்கள் அடங்குவர்.

எனவே, பயணிகள் தங்கள் பயணத்தைத் தொடங்குவதற்கு முன்பு, குறிப்பாக இணையவழி செக்-இன் செய்யும் போது, இந்தப் படிவத்தைப் பூர்த்தி செய்து, அனைத்துத் தகவல்களும் துல்லியமாக இருப்பதை உறுதி செய்யுமாறு அறிவுறுத்தப்பட்டுள்ளனர். இந்த அறிவிப்பு, மேலதிக மதிப்பீடு அல்லது உதவி தேவைப்படக்கூடிய பயணிகளைக் கண்டறிய விமான நிலைய சுகாதார அதிகாரிகளுக்கு உதவும்.

அமீரகப் பயணிகள் தெரிந்து கொள்ள வேண்டியவை

ஐக்கிய அரபு அமீரகத்திலிருந்து இந்தியாவிற்கு விமானத்தில் பயணம் செய்யும் குடியிருப்பாளர்கள், இந்தியாவிற்கு வருவதற்கு 24 மணி நேரத்திற்குள் ஆன்லைனில் இந்தப் படிவத்தைச் சமர்ப்பிக்க வேண்டும். இந்தச் சேவை இலவசமானது மற்றும் அதிகாரப்பூர்வ அரசு இணையதளம் மூலம் கிடைக்கிறது: https://airsuvidha.civilaviation.gov.in/

மேலும், படிவத்தைப் பூர்த்தி செய்வதற்கு கட்டணம் வசூலிக்கும் அதிகாரப்பூர்வமற்ற இணையதளங்கள் அல்லது சேவைகளை பயணிகள் தவிர்க்க வேண்டும் என்று கூறப்பட்டுள்ளது.

நீங்கள் என்னென்ன விவரங்களைத் தயாராக வைத்திருக்க வேண்டும்?

விண்ணப்பத்தைத் தொடங்குவதற்கு முன், பயணிகள் பின்வரும் தகவல்களையும் ஆவணங்களையும் தயாராக வைத்திருக்க வேண்டும்:

• செல்லுபடியாகும் பாஸ்போர்ட்
• விமான டிக்கெட் அல்லது போர்டிங் பாஸ்
• இந்தியாவில் தங்கும் முகவரி
• பயண வரலாறு (travel history ) மற்றும் வெளிநாட்டு இடைநிறுத்தங்களின் (transit details) விவரங்கள்
• மருத்துவப் பரிந்துரைக் கடிதம் (தேவைப்பட்டால்)
• OTP சரிபார்ப்பிற்கான செயல்பாட்டில் உள்ள கைபேசி எண் மற்றும் மின்னஞ்சல் முகவரி

ஏர் சுவிதா படிவத்தை எவ்வாறு பூர்த்தி செய்வது

படிவத்தைச் சமர்ப்பிக்க பயணிகள் இந்தப் படிகளைப் பின்பற்றலாம்:

1. தனிப்பட்ட மற்றும் பயண விவரங்களை உள்ளிடவும்: பாஸ்போர்ட் தகவல், தேசியம், விமான எண், இந்தியாவில் முதலில் நுழையும் விமான நிலையம் மற்றும் கடந்த 21 நாட்களுக்கான பயண வரலாறு ஆகியவற்றை வழங்கவும்.

2. பயண விவரங்களைச் சேர்க்கவும்: அனைத்து வெளிநாட்டு இடைவழிப் பயண நிறுத்தங்களையும் (transitdetails) அறிவிக்கவும். ஒன்றுக்கு மேற்பட்ட பயண நிறுத்தங்களைக் கொண்ட பயணிகள், ஒவ்வொன்றையும் தனித்தனியாக உள்ளிடுவதற்கு ‘Add Transit Row’ என்ற விருப்பத்தைப் பயன்படுத்தலாம்.

3. தொடர்புத் தகவலைச் சரிபார்க்கவும்: இந்தியாவில் உள்ள முகவரி, மொபைல் எண் மற்றும் மின்னஞ்சல் முகவரியை உள்ளிட்டு, OTP சரிபார்ப்பை முடிக்கவும்.

4. சுகாதார அறிவிப்பைப் பூர்த்தி செய்யவும்: எபோலா தொற்று ஏற்பட்டிருக்கலாம் என்பது மற்றும் காய்ச்சல் அல்லது இரத்தப்போக்கு உள்ளிட்ட தொடர்புடைய அறிகுறிகள் பற்றிய கேள்விகளுக்குப் பதிலளிக்கவும். பயணிகளின் பயண மற்றும் தொற்று ஏற்பட்ட வரலாற்றைப் பொறுத்து கூடுதல் கேள்விகள் கேட்கப்படலாம்.

5. ஒப்புகையைச் சமர்ப்பித்துச் சேமிக்கவும்: அனைத்து விவரங்களையும் சரிபார்த்து, ஒப்புதல் அறிவிப்பைப் பூர்த்தி செய்து, படிவத்தைச் சமர்ப்பிக்கவும். ஒப்புகையைப் பதிவிறக்கம் செய்து, பயணத்தின் போது எளிதில் அணுகும்படி வைத்திருக்கவும்.

இந்தியா வந்தடைந்த பிறகு என்ன நடக்கும்?

சர்வதேச பயண சுகாதார மையத்தில் (International Travel Health Desk) பயணிகள் தங்களின் ஏர் சுவிதா ஒப்புகையைக் காண்பிக்குமாறு கேட்கப்படலாம்.

பெரும்பாலான பயணிகள் வழக்கமான வருகை நடைமுறைகளைத் தொடரலாம் என்றாலும், சமர்ப்பிக்கப்பட்ட தகவல்களின் அடிப்படையில் விமான நிலைய துறைமுக சுகாதார அதிகாரி (Airport Port Health Officer) கூடுதல் பரிசோதனைகளை மேற்கொள்ளலாம்.

இந்த டிஜிட்டல் அமைப்பு, சுகாதார மற்றும் குடிவரவு அதிகாரிகளுக்குத் தகவல்களைப் பகிர்ந்துகொள்ளவும், மேலும் மதிப்பீடு தேவைப்படக்கூடிய பயணிகளை அடையாளம் காணவும் உதவுகிறது.

நான் படிவத்தை நிரப்பாமல் இந்தியாவிற்கு வந்தால் என்ன செய்வது?

பயணிகள் விமான நிலைய ஊழியர்களின் அறிவுறுத்தல்களைப் பின்பற்றி, சர்வதேச பயண சுகாதார மையத்தை (International Travel Health Desk) அணுக வேண்டும். ஏற்படக்கூடிய தாமதங்களைத் தவிர்க்க, புறப்படுவதற்கு முன் அறிவிப்பைப் பூர்த்தி செய்வது பரிந்துரைக்கப்படுகிறது.

இந்தியா ஏன் ஏர் சுவிதாவை மீண்டும் அறிமுகப்படுத்தியுள்ளது?

காங்கோ ஜனநாயகக் குடியரசு மற்றும் உகாண்டாவில் பரவியுள்ள எபோலா/புண்டிபுக்யோ வைரஸ் நோயை, உலக சுகாதார அமைப்பு 2026, மே 17 அன்று சர்வதேச முக்கியத்துவம் வாய்ந்த பொது சுகாதார அவசரநிலையாக அறிவித்ததைத் தொடர்ந்து, இந்தியா சர்வதேச நுழைவுப் புள்ளிகளில் சுகாதாரப் பரிசோதனையை வலுப்படுத்தியுள்ளது.

மேம்படுத்தப்பட்ட ஏர் சுவிதா 2.0 இணையதளம், விமான நிலைய சுகாதார அதிகாரிகள், குடிவரவு அதிகாரிகள் மற்றும் நோய் கண்காணிப்புக் குழுக்களுக்கு இடையே தகவல் பகிர்வை ஆதரிக்கிறது. இதன் நோக்கம், அபாயத்தில் இருக்கக்கூடிய பயணிகளைக் கண்டறிந்து, அவர்களை மேலதிக மதிப்பீட்டிற்காகப் பரிந்துரைப்பதாகும்.

இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel