நீங்கள் சமீபத்தில் துபாய்க்கு விசிட் விசாவில் உங்கள் குடும்பத்தை ஸ்பான்சர் செய்திருந்தால், நீங்கள் திரும்பப்பெறக்கூடிய பாதுகாப்பு வைப்புத்தொகையை (security deposit) செலுத்தியிருக்கலாம். இருப்பினும், இந்த பணத்தைத் திரும்பப் பெறுவது எப்படி என்பது குறித்த சந்தேகம் இருக்கலாம். அது குறித்தான விபரங்களை கீழே காணலாம்.
டெபாசிட் பணத்தைத் திரும்பப்பெற நான் எப்போது விண்ணப்பிக்க முடியும்?
குடும்ப உறுப்பினர்கள் ஐக்கிய அரபு அமீரகத்தில் இருந்து வெளியேறிய பிறகு அல்லது அவர்களின் விசா நிலையை மாற்றிய பின்னரே நீங்கள் விசிட் விசாவின் பாதுகாப்பு வைப்புத் தொகையைத் திரும்பப் பெற விண்ணப்பிக்க முடியும் என்று கூறப்படுகின்றது. மேலும் பயணிகள் ஐக்கிய அரபு அமீரகத்தில் இருந்து புறப்பட்ட 30 நாட்களுக்குள் பணத்தைத் திரும்பப்பெறுவதற்கான கோரிக்கையை சமர்ப்பிக்க வேண்டும். நீங்கள் துபாய் குடியிருப்பாளராக இருந்தால், ரெசிடென்ஸ் மற்றும் வெளிநாட்டினர் விவகாரங்களுக்கான பொது இயக்குநரகம் – துபாய் (GDRFAD) மூலம் பணத்தைத் திரும்பப் பெறலாம்.
துபாய் விசிட் விசா டெபாசிட் தொகையை திரும்பப் பெறுவதற்கான தேவைகள் என்ன?
பணத்தை திரும்பப் பெற விண்ணப்பிக்கும் போது, பயணிகள் நாட்டை விட்டு வெளியேறியதற்கான ஆதாரத்தை நீங்கள் வழங்க வேண்டியிருக்கும். இந்த ஆதாரத்தில் பாஸ்போர்ட்டில் உள்ள வெளியேறும் முத்திரையின் (exit stamp) ஸ்கேன் அல்லது ஸ்கிரீன்ஷாட் அல்லது GDRFAD இன் பயண அறிக்கை (travel report) ஆகியவை அடங்கும்.
பயண அறிக்கையானது பாஸ்போர்ட் எண்ணுடன் வெளியேறும் மற்றும் நுழைவு தேதிகளைக் காண்பிக்கும். GDRFAD இணையதளம் அல்லது துபாய் நவ் (Dubai Now) ஆப் மூலம் இந்த அறிக்கையை நீங்கள் கோரலாம். பயண அறிக்கை அல்லது வெளியேறும் முத்திரையுடன் கூடுதலாக, நீங்கள் வழங்க வேண்டியது:
- பயணிகளின் பாஸ்போர்ட் மற்றும் விசிட் விசாவின் நகல்
- பாதுகாப்பு வைப்புத் தொகையின் அசல் ரசீது
அமீரகத்தில் இருந்து பயணிகள் வெளியேறும் போது, இமிகிரேஷன் அமைப்பு தானாகவே வெளியேறும் நிலை மற்றும் தேதியைப் புதுப்பிக்கும் என்பதால், சில சந்தர்ப்பங்களில், வெளியேறுவதற்கான ஆதாரத்தை நீங்கள் வழங்க வேண்டியதில்லை என்றும் தெரிவிக்கப்பட்டுள்ளது.
பணத்தைத் திரும்பப்பெற நான் எவ்வாறு கோருவது?
நீங்கள் GDRFAD இணையதளம் மூலம் குடும்ப விசிட் விசாவிற்கு விண்ணப்பித்திருந்தால், அவர்களின் போர்ட்டல் மூலம் நேரடியாக பணத்தைத் திரும்பப்பெறக் கோரலாம். நீங்கள் அமர் சென்டர் அல்லது டைப்பிங் சென்டர் வழியாக விண்ணப்பித்திருந்தால், அவர்கள் மூலம் பணத்தைத் திரும்பப்பெறச் செயல்படுத்த வேண்டும்.
விசிட் விசா ரீஃபண்டை ஆன்லைனில் கோருவது எப்படி?
விசிட் விசாவில் அமீரகம் வந்தவர் ஐக்கிய அரபு அமீரகத்தில் இருந்து வெளியேறினால் அல்லது அவர்களின் ஸ்பான்சர்ஷிப்பை மாற்றினால், GDRFAD இன் ஆன்லைன் நிலை கண்காணிப்பு (online status tracking) மூலம் விண்ணப்ப எண் மற்றும் பரிவர்த்தனை எண்ணை (transaction number) உள்ளிட்டு பணத்தைத் திரும்பப் பெறலாம் என்று கூறப்படுகின்றது. அதற்கு நீங்கள் பின்பற்ற வேண்டிய படிகள்:
1. GDRFAD இணையதளத்தைப் பார்வையிடவும் – www.gdrfad.gov.ae மற்றும் log in ஐகானைக் கிளிக் செய்யவும். உங்களின் UAE PASS மூலம் உள்நுழையவும்
2. அதன் பின் நீங்கள் உங்கள் டாஷ்போர்டுக்கு திருப்பி விடப்படுவீர்கள். பின் ‘Existing Applications and Dependents’ என்பதற்குச் செல்லவும்.
3. விசா செல்லுபடியாகும் தேதிகளுடன் விசிட் விசா விண்ணப்ப எண் அல்லது பரிவர்த்தனை எண்ணை உள்ளிடவும்.
4. விசிட் விசா விண்ணப்பத்தைக் கண்டறிந்து, ‘Refund’ விருப்பத்தைத் தேர்ந்தெடுக்கவும்.
5. திரும்பப்பெறும் தொகை, முறை மற்றும் உங்கள் மொபைல் எண்ணை மதிப்பாய்வு செய்யவும். ‘Process Refund’ என்பதைக் கிளிக் செய்யவும்.
மேற்கண்ட செயல்முறைகளை முடித்த பின்னர் உங்கள் பணத்தைத் திரும்பப்பெறும் நிலையைக் கண்காணிக்க, டிராக்கிங் எண்ணைப் பெறுவீர்கள். அதன் பின் அந்த பணம் உங்கள் வங்கிக் கணக்கில் இரண்டு வேலை நாட்களுக்குள் வரவு வைக்கப்படும் என்று கூறப்படுகின்றது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
