துபாயின் பிரபலமான பன்முகக் கலாச்சார இலக்கான குளோபல் வில்லேஜ், ஒரே இரவில் ஏழு வானவேடிக்கை நிகழ்ச்சிகளுடன் 2026 புத்தாண்டை வரவேற்கத் தயாராகி வருகிறது. இது பார்வையாளர்களுக்குப் பல நாடுகளின் புத்தாண்டு கொண்டாட்டங்களை ஒரே இடத்தில் காணும் ஒரு தனித்துவமான அனுபவத்தை வழங்குகிறது.
மேலும், குளோபல் வில்லேஜின் மூன்று முக்கிய வாயில்களும் புத்தாண்டு தினத்தன்று நீட்டிக்கப்பட்ட நேரத்திற்குத் திறந்திருக்கும் என பூங்கா நிர்வாகம் தெரிவித்துள்ளது. அதன்படி, பார்வையாளர்கள் மாலை 4 மணி முதல் அதிகாலை 2 மணி வரை அனுமதிக்கப்படுவார்கள்.
ஏழு உலகளாவிய புத்தாண்டு கொண்டாட்டங்கள்
அங்கு பார்வையாளர்கள் ஏழு வெவ்வேறு நாடுகளில் புத்தாண்டு கொண்டாடப்படுவதைக் காண முடியும். ஒவ்வொரு கொண்டாட்டமும் வெவ்வேறு நேரங்களில் வானவேடிக்கை மற்றும் ட்ரோன் நிகழ்ச்சிகளுடன் குறிக்கப்படும்:
- சீனா – இரவு 8 மணி
- தாய்லாந்து – இரவு 9 மணி
- பங்களாதேஷ் – இரவு 10 மணி
- இந்தியா – இரவு 10.30 மணி
- பாகிஸ்தான் – இரவு 11 மணி
- துபாய் – நள்ளிரவு
- துருக்கி – அதிகாலை 1 மணி
ஒவ்வொரு புத்தாண்டு கொண்டாட்டமும் உலகின் ஒரு வெவ்வேறு பகுதியைப் பிரதிபலிக்கும், இது புத்தாண்டை வரவேற்க ஒரு தனித்துவமான மற்றும் பண்டிகை காலச் சூழலை உருவாக்கும்.
பொழுதுபோக்கு மற்றும் ஈர்ப்புகள்
இவை தவிர, பார்வையாளர்கள் பிரதான மேடையில் நேரலை டிஜே நிகழ்ச்சியை ரசிக்கலாம். அத்துடன் அங்குள்ள 90-க்கும் மேற்பட்ட கலாச்சாரங்களைப் பிரதிநிதித்துவப்படுத்தும் 30 பெவிலியன்கள் மற்றும் 3,500-க்கும் மேற்பட்ட கடைகளை ஆராயலாம்.
கூடுதலாக, தெரு உணவுகள் முதல் சர்வதேச உணவு வகைகள் வரை 250-க்கும் மேற்பட்ட உணவு விருப்பங்களையும் வழங்கும் என்று தெரிவிக்கப்பட்டுள்ளது. புத்தாண்டு கொண்டாட்டங்களைத் தவிர, பார்வையாளர்கள் மிதக்கும் சந்தை (floating market), ஹேப்பினஸ் ஸ்ட்ரீட் , ஃபீஸ்டா ஸ்ட்ரீட் (Fiesta Street) மற்றும் டெசர்ட் டிஸ்ட்ரிக்ட் போன்ற கருப்பொருள் சார்ந்த பகுதிகளையும் ஆராயலாம்.
குறிப்பாக, கார்னிவலில் 200-க்கும் மேற்பட்ட சவாரிகள் மற்றும் விளையாட்டுகளை அனுபவிக்கலாம். மேலும், இளம் பார்வையாளர்களுக்காக பிரத்யேகமாக வடிவமைக்கப்பட்ட டிராகன் கிங்டம், கார்டன்ஸ் ஆஃப் தி வேர்ல்ட் மற்றும் தி லிட்டில் வொண்டரர்ஸ் போன்ற புதிய ஈர்ப்புகளும் உள்ளதாகக் கூறப்படுகிறது.
இத்தகைய தொடர் கொண்டாட்டங்கள், பொழுதுபோக்கு மற்றும் உலகளாவிய கலாச்சாரங்கள் அனைத்தும் ஒன்றிணைந்து, குளோபல் வில்லேஜ் அனைத்து வயதினருக்கும் ஒரு மறக்க முடியாத புத்தாண்டு அனுபவத்தை உறுதியளிக்கும் என கூறப்படுகின்றது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link:Khaleej Tamil WhatsApp Channel
