உலகளவில் தனக்கான முத்திரையை தொடர்ந்து பல துறைகளில் பதித்து வரும் துபாய் எமிரேட் புதியதொரு மைல்கல்லை எட்டியுள்ளது. அதாவது புதிதாக வெளியிடப்பட்ட குளோபல் பவர் சிட்டி இன்டெக்ஸ் (GPCI) 2025 அறிக்கையின்படி, துபாய் எமிரேட்டானது 2026-ல் உலகின் சிறந்த சுற்றுலா நகரங்களில் நான்காவது இடத்தை பிடித்துள்ளதாக தெரிவிக்கப்பட்டுள்ளது. ஏற்கெனவே துபாய் ஐந்தாவது இடத்தை பிடித்து நிலையில் தற்பொழுதுள்ள நான்காவது இடத்திற்கு முன்னேறியுள்ளது.
இந்த முன்னேற்றத்திற்கு முக்கியக் காரணம், நகரத்தின் விரிவடைந்து வரும் ஷாப்பிங், உணவு மற்றும் வாழ்க்கை முறை வசதிகளே ஆகும். இவை உலகம் முழுவதிலுமிருந்து வரும் பார்வையாளர்களைத் தொடர்ந்து ஈர்த்து வருகின்றன.
ஏற்கனவே ஒரு உலகளாவிய ஷாப்பிங் மையமாக அறியப்படும் துபாயில், துபாய் மால், மால் ஆஃப் தி எமிரேட்ஸ், கோல்ட் சூக், இப்ன் பத்தூதா மால் மற்றும் டிராகன் மார்ட் உட்பட உலகின் மிகப்பெரிய மற்றும் மிகவும் பிரபலமான வர்த்தக மையங்கள் சில அமைந்துள்ளன. இவற்றில் துபாய் மால் மட்டும் 2024-ல் 111 மில்லியன் பார்வையாளர்களை வரவேற்றதாக புள்ளிவிபரங்கள் கூறுகின்றன, இது சர்வதேச சுற்றுலாப் பயணிகளை ஈர்க்கும் நகரத்தின் வலுவான திறனை எடுத்துக்காட்டுகிறது.
2025-ஆம் ஆண்டின் முதல் பாதியில், துபாய் 9.88 மில்லியனுக்கும் அதிகமான பார்வையாளர்களை ஈர்த்தது, இது கடந்த ஆண்டின் இதே காலப்பகுதியுடன் ஒப்பிடும்போது 6 சதவீதம் அதிகரிப்பாகும்.
முக்கிய உலக நகரங்களை விட முன்னணியில் உள்ள துபாய்
சுற்றுலாத் தரவரிசையில், துபாய் எமிரேட்டானது நியூயார்க், மாட்ரிட், மாஸ்கோ, இஸ்தான்புல், பாங்காக், ஆம்ஸ்டர்டாம், வியன்னா, சிட்னி, ஹாங்காங் மற்றும் கோபன்ஹேகன் போன்ற முக்கிய உலகளாவிய இடங்களை விட முன்னணியில் உள்ளது குறிப்பிடத்தக்கது. மேலும், லண்டன், டோக்கியோ மற்றும் பாரிஸ் முதல் மூன்று இடங்களைத் தக்கவைத்துக் கொண்டன.
தி மோரி மெமோரியல் ஃபவுண்டேஷனால் (The Mori Memorial Foundation) வெளியிடப்பட்ட GPCI அறிக்கையானது, ஒரு நகரத்தின் ஒட்டுமொத்த ஈர்ப்புத் திறனை அளவிடுகிறது, அதாவது, மக்கள், முதலீடுகள் மற்றும் வணிகங்களை ஈர்க்கும் அதன் திறனை இது கணக்கிடுகிறது. நகரங்கள் பொருளாதாரம், ஆராய்ச்சி மற்றும் மேம்பாடு, கலாச்சார தொடர்பு, வாழ்வாதாரம், சுற்றுச்சூழல் மற்றும் அணுகல்தன்மை போன்ற ஆறு முக்கியப் பகுதிகளில் மதிப்பிடப்படுகின்றன என்றும் தெரிவிக்கப்பட்டுள்ளது.
ஒட்டுமொத்தமாக, துபாய் உலகளவில் ஒன்பதாவது இடத்தைப் பிடித்ததாக அறிக்கையில் கூறப்பட்டுள்ளது, இது பெர்லின், பெய்ஜிங், மெல்போர்ன், மாட்ரிட், சிட்னி, வியன்னா, ஸ்டாக்ஹோம், ஹாங்காங் மற்றும் டொராண்டோ போன்ற நகரங்களை விட முன்னணியில் உள்ளது சிறப்பிற்குரியது.
48 நகரங்களின் பட்டியலில், ஜோகன்னஸ்பர்க், மும்பை, கெய்ரோ, ஜகார்த்தா, மெக்சிகோ சிட்டி, பியூனஸ் அயர்ஸ், டெல் அவிவ், சாவ் பாலோ, ஃபுகுவோகா மற்றும் வாஷிங்டன் டி.சி ஆகியவை கடைசி இடங்களில் தரவரிசைப்படுத்தப்பட்டன.
வணிகம் மற்றும் திறமைகளுக்கான வலுவான ஈர்ப்பு
இவை தவிர, வணிகம் மற்றும் திறமையான நிபுணர்களுக்கான ஒரு இடமாகவும் துபாய் சிறப்பாகச் செயல்பட்டுள்ளதாக அறிக்கையில் குறிப்பிடப்பட்டுள்ளது. பெருநிறுவன இருப்பிட முடிவுகளை எடுக்கும் வணிகத் தலைவர்களின் கண்ணோட்டத்தில் மதிப்பிடும்போது, இந்த நகரம் உலக அளவில் நான்காவது இடத்தைப் பிடித்தது.
அறிக்கையின்படி, துபாய் பணியிட விருப்பங்கள் மற்றும் ஸ்டார்ட்அப் செயல்பாடுகளில் கணிசமாக முன்னேறி, இந்த பிரிவில் கடந்த ஆண்டு ஒன்பதாவது இடத்திலிருந்து நான்காவது இடத்திற்கு முன்னேறியுள்ளது.
உயர் திறமையான உலகளாவிய நிபுணர்களின் கண்ணோட்டத்தில் அடிப்படையில் மதிப்பிடும்போது, துபாய் உலகம் முழுவதும் ஏழாவது இடத்தைப் பிடித்தது, இது சர்வதேச திறமைகளுக்கு விருப்பமான இடமாக அதன் வளர்ந்து வரும் நற்பெயரை உறுதிப்படுத்துகிறது.
தரவரிசையை உயர்த்தும் பொருளாதார வளர்ச்சி மற்றும் இணைப்புத் திறன்
இவற்றுடன் துபாயின் பொருளாதாரச் செயல்பாடு ஒரு பெரிய முன்னேற்றத்தைக் கண்டுள்ளது. மொத்த உள்நாட்டு உற்பத்தியின் வளர்ச்சி விகிதத்தில் இந்த நகரம் 42வது இடத்திலிருந்து 10வது இடத்திற்கு முன்னேறி, முதல் முறையாக உலகளாவிய முதல் 10 இடங்களுக்குள் நுழைந்துள்ளது. இது அமீரகத்தின் தொடர்ச்சியான பொருளாதார பல்வகைப்படுத்தல் முயற்சிகளைப் பிரதிபலிக்கிறது.
அதுமட்டுமில்லாமல், எமிரேட்ஸ் மற்றும் ஃப்ளைதுபாய் ஆகிய விமான நிறுவனங்களின் வலுவான விரிவாக்கமும் துபாயின் உலகளாவிய இணைப்புத் திறனை மேம்படுத்தியுள்ளது. இதன் விளைவாக, நேரடி சர்வதேச விமான இணைப்புகளின் எண்ணிக்கையில் இந்த நகரம் உலக அளவில் மூன்றாவது இடத்தைப் பிடித்து, ஒரு முன்னணி உலகளாவிய மையமாக தனது நிலையை வலுப்படுத்தியுள்ளது.
இவ்வாறு அதிகரித்து வரும் சுற்றுலாப் பயணிகளின் எண்ணிக்கை, வலுவான பொருளாதார வளர்ச்சி மற்றும் மேம்பட்ட உலகளாவிய தரவரிசைகளுடன், துபாய் சுற்றுலாப் பயணிகள், வணிகங்கள் மற்றும் தொழில் வல்லுநர்கள் என அனைவருக்கும் உலகின் மிகவும் கவர்ச்சிகரமான நகரங்களில் ஒன்றாக தனது நிலையைத் தொடர்ந்து உறுதிப்படுத்தி வருகிறது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
