தமிழர்கள் அதிகம் வசிக்கும் நாடான மலேசியாவில் இதற்கு முன் இல்லாத அளவில் பெரு வெள்ளம் ஏற்பட்டு பொதுமக்களின் வாழ்வாதாரங்கள் பாதிக்கப்பட்டுள்ளன.
மலேசியாவின் பல்வேறு மாநிலங்களை புரட்டிப்போட்ட வெள்ளத்தால் பாதிக்கப்பட்ட மக்களுக்கு ஐக்கிய அரபு அமீரகம் அவசர மனிதாபிமான உதவிகளை தற்சமயம் வழங்கியுள்ளது.
அபுதாபியின் பட்டத்து இளவரசரும், ஐக்கிய அரபு அமீரக ஆயுதப் படைகளின் துணைத் தளபதியுமான மாண்புமிகு ஷேக் முகமது பின் சயீத் அல் நஹ்யானின் உத்தரவுகளையும், அல் தஃப்ரா பிராந்தியத்தின் ஆட்சியாளரின் பிரதிநிதியும் எமிரேட்ஸ் ரெட் கிரசண்ட் (ERC) தலைவருமான ஷேக் ஹம்தான் பின் சயீத் அல் நஹ்யானின் ஆணைகளையும் பின்பற்றி இந்த நடவடிக்கை எடுக்கப்பட்டுள்ளது.
ERC ஆல் செயல்படுத்தப்பட்ட உதவித் திட்டத்தின் முதல் கட்டத்தில் மருத்துவம் மற்றும் உணவுப் பொருட்கள், தங்குமிடத்திற்கான கட்டுமானப் பொருட்கள் ஆகியவை அடங்கும்.
அமீரக தலைமையின் கட்டளைகளை நிறைவேற்றவும், வெள்ளத்தால் பாதிக்கப்பட்டவர்களுக்கு உதவிகளை விரைவாக வழங்கவும் ஆணையம் தயாராக உள்ளது.
நிவாரண நடவடிக்கைகளை மேற்பார்வையிடவும், மிகவும் பாதிக்கப்பட்ட பகுதிகளுக்கு மனிதாபிமான தேவைகளை வழங்கவும் ERC குழுவொன்று மலேசியாவிற்கு பயணிக்கவுள்ளது. ERC இன் பொதுச் செயலாளரான டாக்டர் முகமது அதீக் அல் ஃபலாஹி, புத்திசாலித்தனமான தலைமையானது, பிராந்திய ரீதியாகவும் உலகளவில் ஐக்கிய அரபு அமீரகத்தின் மனிதாபிமான மற்றும் மேம்பாட்டுப் பங்கை மேம்படுத்துவதற்கும், பின்தங்கியவர்களுக்கும் பல்வேறு பேரழிவுகளால் பாதிக்கப்பட்டவர்களுக்கும் உதவுவதற்கும் எப்போதும் ஆர்வமாக இருப்பதாக உறுதிப்படுத்தியுள்ளார்.
தற்போதைய நிலையில் அவசரத் தேவைகளைக் கருத்தில் கொண்டு கள அறிக்கைகள் மற்றும் மனிதாபிமான முறையீடுகளின் அடிப்படையில் மலேசியாவுக்கு உதவுவதற்காக ஐக்கிய அரபு அமீரகம் உதவித் திட்டம் ஒன்று செயல்படுத்தப்பட இருப்பதாக அல் ஃபலாஹி விளக்கியுள்ளார்.
பல்வேறு கட்டங்களை உள்ளடக்கிய இத்திட்டத்தில் முதல் கட்டம் தங்குமிடம், உணவு மற்றும் சுகாதாரத் தேவைகளில் கவனம் செலுத்தும், பின்னர் மற்ற நிலைகள் பின்பற்றப்படும் என்றும் கூறியுள்ளார்.
மலேசியாவில் சமீபத்தில் பெய்த கனமழை வெள்ளத்தால் கிட்டத்தட்ட 63,000 பேர் இடம்பெயர்ந்துள்ளனர் மற்றும் பெரும்பாலான உள்கட்டமைப்பு மற்றும் பொதுப் பயன்பாடுகள் சேதமடைந்துள்ளன. மலேசியாவின் எட்டு மாநிலங்களில் உள்ள 33 மாவட்டங்கள் இந்த வெள்ளத்தால் கடுமையாக பாதிக்கப்பட்டிருப்பது குறிப்பிடத்தக்கது.
