UAE தொழிலாளர் சட்டம்: எந்தெந்த சூழ்நிலைகளில் ஊழியர்களுக்கு கருணை விடுப்பு கிடைக்கும்??

ஐக்கிய அரபு அமீரகத்தில் பணிபுரியும் ஊழியர்களுக்கு பெற்றோர் (parental) மற்றும் மகப்பேறு (maternity) விடுப்பு உட்பட அவர்களின் தனிப்பட்ட வாழ்க்கையை ஆதரிப்பதற்காக, வேலை மற்றும் வாழ்க்கைக் கடமைகளுக்கு இடையே ஊழியர்களின் சமநிலையை உறுதிப்படுத்தும் வகையில் நாட்டின் தொழிலாளர் சட்டம் பலவிதமான விடுப்பு விருப்பங்களை வழங்குகிறது.

அதில் ஒன்றாக கருணை விடுப்பு அல்லது துக்க விடுப்பு என்று அழைக்கப்படும் விடுப்பு, ஒரு குடும்ப உறுப்பினர் இறந்தால் துக்கத்தில் பங்கேற்பதற்கும், குடும்ப விஷயங்களை நிர்வகிக்கவும் ஊழியர்களுக்கு தேவையான நேரத்தை வழங்குகிறது. ஆனால் இந்த விடுப்பு எந்தெந்த சூழ்நிலைகளுக்கு பொருந்தும் மற்றும் எத்தனை நாட்களுக்கு நீங்கள் விடுப்பு எடுக்க உரிமை உண்டு? போன்ற முக்கிய விபரங்களை நீங்கள் தெரிந்து கொள்வது அவசியம். அவற்றைப் பின்வருமாறு பார்க்கலாம்.

கருணை விடுமுறை என்றால் என்ன?

ஐக்கிய அரபு அமீரகத்தின் 2021 ஆம் ஆண்டின் ஃபெடரல் ஆணை-சட்ட எண். 33 இன் பிரிவு 32 இன் படி, நாட்டில் உள்ள தனியார் துறை ஊழியர்கள் நெருங்கிய உறவினரின் மரணத்தைத் தொடர்ந்து ஊதியத்துடன் கூடிய இரக்க விடுமுறைக்கு தகுதி உடையவர்கள் ஆவர்.

எத்தனை நாட்கள் விடுப்பு கிடைக்கும்?

• மனைவி அல்லது கணவன் இறந்தால் 5 நாட்கள் ஊதியத்துடன் கூடிய விடுப்பு.
• பெற்றோர், குழந்தை, உடன்பிறந்தவர், பேரக்குழந்தை அல்லது தாத்தா பாட்டி இறந்தால் 3 நாட்கள் ஊதியத்துடன் கூடிய விடுப்பு.

கருணை விடுப்பு கணவன் அல்லது மனைவியின் பெற்றோரை உள்ளடக்குமா?

இந்த ஏற்பாடு (பிரிவு 32) கணவன் அல்லது மனைவியின் பெற்றோருக்கு கூறப்படவில்லை. எனவே, அவர்கள் இறந்தால், ஊதியத்துடன் கூடிய கருணை விடுப்பு வழங்கலாமா என்பதை முடிவு செய்வது முதலாளியின் விருப்பத்திற்குரியது என்று சட்ட ஆலோசகர்கள் கூறுகின்றனர்.

கருணை விடுப்பு எப்போது தொடங்குகிறது?

ஊழியரின் குடும்ப உறுப்பினர் இறந்த நாளில் இந்த விடுமுறை தொடங்குகிறது.

கருணை விடுமுறைக்கு இறப்பு சான்றிதழ் தேவையா?

2022 ஆம் ஆண்டின் அமைச்சரவை முடிவு எண். 1 இன் கட்டுரை 21, பிரிவு (3) இன் படி, ஊழியர்கள் பணிக்குத் திரும்பியவுடன், மரணம் அடைந்ததற்கான சான்றைச் சமர்ப்பித்தால், இறந்த நாளில் இருந்து, துக்க விடுமுறைக்கு உரிமை உண்டு என்று கூறப்படுகிறது.

ஃப்ரீ ஸோன் ஊழியர்களுக்கு கருணை விடுமுறை பொருந்துமா?

இந்த ஏற்பாடு 2021 ஆம் ஆண்டின் ஃபெடரல் ஆணை-சட்ட எண். 33ஐப் பின்பற்றும் அனைத்து அதிகார வரம்புகளுக்கும் பொருந்தும். இருப்பினும், துபாய் இன்டர்நேஷனல் பைனான்ஷியல் சென்டர் (DIFC) மற்றும் அபுதாபி குளோபல் மார்க்கெட் (ADGM) ஆகியவற்றின் வேலைவாய்ப்புச் சட்டங்கள் மரணம் அல்லது இரக்க விடுமுறையை சட்டப்பூர்வ உரிமையாக அங்கீகரிக்காததால், அத்தகைய விதிகளைச் சேர்த்து நிறுவ வேண்டுமா என்பதை அந்த நிறுவனங்களின் முதலாளியே முடிவு செய்ய வேண்டும் என்று கூறப்படுகிறது.

இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel