எமிரேட்ஸ் மற்றும் எதிஹாடின் ‘Unaccompanied Minor’ சேவை: தனியாகப் பயணிக்கும் குழந்தைகளுக்கான வயது விதிகள், கட்டணங்கள் உள்ளிட்ட முழு விபரங்களும் இங்கே…

உங்கள் குழந்தையை தனியாக விமானத்தில் அனுப்புவது பற்றி யோசிக்கிறீர்களா? புதிய பள்ளி பருவ தொடக்கம் அல்லது எதிர்பாராத பயண மாற்றங்கள் என எதுவாக இருந்தாலும், உங்கள் குழந்தையை தனியாக விமானத்தில் பயணிக்க அனுமதிப்பது சற்று கடினமானதாக இருக்கலாம். அதே நேரத்தில், எமிரேட்ஸ் மற்றும் எதிஹாட் ஏர்வேஸ் ஆகிய இரண்டு விமான நிறுவனங்களும் இளம் சிறார்கள் தங்கள் பயணம் முழுவதும் பாதுகாப்பாகவும், ஆதரவுடனும், வசதியாகவும் இருப்பதை உறுதிசெய்ய பிரத்யேக துணையில்லாத சிறுவர் பயண சேவைகளை வழங்குகின்றன.

வயதுத் தேவைகள் மற்றும் முன்பதிவு செய்வது முதல் விமான நிலைய நடைமுறைகள் மற்றும் விமானத்தில் பராமரிப்பு வரை, அமீரகத்தைத் தளமாகக் கொண்ட இரண்டு விமான நிறுவனங்களும் குழந்தைகள் மற்றும் பெற்றோர் இருவருக்கும் மன அழுத்தமில்லாமல் தனியாக பயணம் செய்ய திட்டங்களை சிந்தனையுடன் வடிவமைத்துள்ளன. இதில், உங்கள் குழந்தை தனியாக விமானத்தில் ஏறுவதற்கு முன்பு நீங்கள் தெரிந்து கொள்ள வேண்டிய அனைத்தும் கொடுக்கப்பட்டுள்ளது.

எமிரேட்ஸ் துணையில்லாத சிறார் பயண சேவை (Emirates Unaccompanied Minor Service)

தனியாகப் பயணம் செய்யும் 5 முதல் 11 வயது வரையிலான குழந்தைகளுக்கு இந்த சேவை கட்டாயம். மேலும், 12 முதல் 15 வயது வரையிலான சிறுவர்களுக்கு, சேவை விருப்பத்தேர்வுக்குரியது. இந்த வயதுள்ளவர்கள் சுதந்திரமாகப் பயணிக்க அனுமதிக்கப்பட்டாலும், கூடுதல் மன அமைதிக்காக பெற்றோர்கள் அல்லது பாதுகாவலர்கள் துணையில்லாத சிறு வயதினருக்கான சேவையைக் கோரலாம் என்று ஏர்லைன்ஸ் தெரிவித்துள்ளது.

விமான நிலையத்தில் ஆதரவு

எமிரேட்ஸ் நிறுவனத்தின் ஒரு சிறப்பு ஊழியர் உறுப்பினர், செக்-இன் முதல் வருகை (arrival) வரை, விமான நிலைய செயல்முறை, விமானத்தில் ஏறுதல் மற்றும் குழந்தையை அவர்கள் சேருமிடத்தில் நியமிக்கப்பட்ட பாதுகாவலரிடம் பாதுகாப்பாக ஒப்படைத்தல் உள்ளிட்ட அனைத்திற்கும் உதவுவார்.

அதுமட்டுமில்லாமல், விமானத்தில் ஏறுவதற்கு குடும்பங்கள் மற்றும் இளம் விமானப் பயணிகளுக்கு முன்னுரிமை வழங்கப்படுகிறது. அதேநேரத்தில், கேபின் குழு உறுப்பினர்கள் ஹாண்ட் லக்கேஜ்களை சேமித்து வைப்பதிலும், பயணத்திற்கு வசதியாக இருப்பதை உறுதி செய்வதிலும் உதவுவார்கள்.

கட்டணம்:

5 முதல் 11 வயது வரையிலான குழந்தைகள் தனியாகப் பயணிக்கும் போது இந்த சேவைக்கான கட்டணமாக பெரியவர்களுக்கான வழக்கமான விமான பயண கட்டணத்தைச் செலுத்த வேண்டும். 12 வயதுக்கு மேற்பட்ட குழந்தைகளுக்கு இந்த சேவை கட்டாயமில்லை, இருப்பினும் 12 முதல் 15 வயது வரையிலான சிறுவர்களுக்கு இந்த சேவை பெற வேண்டுமென்றால் ஒரு நபருக்கு $50 கூடுதலாக கேட்கலாம்.

முன்பதிவு:

• விமானப் பயணத்திற்கு குறைந்தது 12 மணி நேரத்திற்கு முன்பே முன்பதிவு செய்யப்பட வேண்டும்.
• எமிரேட்ஸ் அலுவலகம், லைவ்சாட் அல்லது வாடிக்கையாளர் சேவை வழியாக முன்பதிவு செய்யவும்.

இணைப்புகள் (connecting flight):

• பிற விமான நிறுவனத்துடன் இணைக்க, அதிகபட்ச இணைப்பு நேரம் 4 மணிநேரம்.
• துபாய் சர்வதேச விமான நிலையத்தில் (DXB) எமிரேட்ஸ்-எமிரேட்ஸ் இடமாற்றங்களுக்கு அதிகபட்சம் 8 மணிநேரம்
• நீண்ட நேர இணைப்பு விமானங்களுக்கு எமிரேட்ஸின் சிறப்பு அனுமதி தேவை.

எனினும் இது போன்ற நேரங்களில் இரவு நேரத்தில் தங்க வேண்டிய சூழல் வந்தால், பெற்றோர் அல்லது பாதுகாவலர் இருந்தால் மட்டுமே குழந்தைகள் டிரான்சிட் விமான நிலையத்தில் இரவு தங்க முடியும். இந்த ஏற்பாட்டிற்கு எமிரேட்ஸின் ஒப்புதலும் முக்கியமாகும்.

ஆவணங்கள்:

• இளம் பயணியின் பெற்றோர் அல்லது பாதுகாவலர் எமிரேட்ஸ் விமான நிலைய அலுவலகங்களில் கிடைக்கக்கூடிய இழப்பீட்டுப் பிரகடனப் படிவத்தை (Declaration of Indemnity form) நிரப்ப வேண்டும்
• குழந்தையின் விமானம் புறப்படும் வரை பெற்றோர் அல்லது பாதுகாவலர் விமான நிலையத்திலேயே இருக்க வேண்டும். குழந்தையை அனுப்பி விடும் போது அல்லது அழைத்துச் செல்லும்போது அவர்கள் அடையாளச் சான்றிதழை வழங்க வேண்டும்.

எதிஹாட் ஏர்வேஸ் துணையில்லாத சிறார் பயண சேவை (Etihad Airways Unaccompanied Minor Service)

தனியாகப் பயணம் செய்யும் 5 முதல் 17 வயதுடைய குழந்தைகளுக்கு ஆதரவளிக்க எதிஹாட் ஏர்வேஸ் பாதுகாப்பான துணையில்லாத சிறுவயதினருக்கான சேவையை வழங்குகிறது. செக்-இன் முதல் அரைவல் வரை பயணத்தின் ஒவ்வொரு செயல்முறையிலும் அர்ப்பணிப்புள்ள ஊழியர்கள் உதவுவதால், உங்கள் குழந்தையின் தனி பயணம் பாதுகாப்பாகவும் வசதியாகவும் இருப்பதை எதிஹாட் உறுதி செய்கிறது.

வயது மற்றும் கட்டண வழிகாட்டுதல்கள்

5 வயதுக்குட்பட்டவர்கள் தனியாகப் பயணிக்கவோ அல்லது இந்த சேவையைப் பயன்படுத்தவோ முடியாது. ஒரு பெற்றோர் அல்லது பாதுகாவலர் அவர்களுடன் ஒரே விமானத்திலும் ஒரே கேபினிலும் செல்ல வேண்டும்.

5 வயது முதல் 11 வயது வரை:

இந்த வயதிற்குட்பட்ட குழந்தைகள் துணையில்லாத சிறார் பயண சேவையைப் பயன்படுத்தலாம். இந்த சேவை இலவசம் என்றாலும், குழந்தைகள் சாதாரண கட்டணத்தில் பயணம் செய்ய வேண்டும் என்பதுடன் இந்த சேவையை பெற முன்பதிவு செய்ய வேண்டும்.

12 வயது முதல் 17 வயது வரை:

இவர்கள் பெரியவர்களுக்கான டிக்கெட்டில் தனியாக பயணிக்கலாம். துணையில்லாத சிறார் சேவை வேண்டுமென்றால் கோரிக்கை வைக்கலாம். இதில் நேரடி விமானங்களுக்கு ஒவ்வொரு பயணத்திற்கும் $100 கூடுதலாகவும், இணைப்பு விமானங்களுக்கு (connecting flights) ஒவ்வொரு பயணத்திற்கும் $150 கூடுதலாகவும் செலுத்த வேண்டும்.

சேவையை முன்பதிவு செய்தல்

1. உங்கள் குழந்தைக்கான கட்டணத்தை முன்பதிவு செய்யுங்கள்.
2. எதிஹாட்டின் வலைத்தளம் மூலம் துணையில்லாத சிறார் பயண சேவைக்கான (unaccompanied minors service) கோரிக்கை படிவத்தை சமர்ப்பிக்கவும்.
3. எதிஹாட் ஆவணங்கள் மற்றும் கட்டணத்தை மதிப்பாய்வு செய்த 24 மணி நேரத்திற்குள் உறுதிப்படுத்தலுக்காக காத்திருங்கள்.

செக்-இன் மற்றும் போர்டிங்

• குழந்தை செக்-இன் செய்வதற்கு புறப்படுவதற்கு குறைந்தது 2 மணி நேரத்திற்கு முன்பே வர வேண்டும்.
• விமானம் புறப்படும் வரை பெற்றோர் அல்லது பாதுகாவலர் விமான நிலையத்தில் இருக்க வேண்டும்.
• எதிஹாட் ஹோஸ்ட் உங்கள் குழந்தைக்கு செக்-இன் மூலம் உதவுவார் மற்றும் ஏறும் வரை அவர்களுடன் செல்வார்.
• பிஸினெஸ் அல்லது ஃபர்ஸ்ட் கிளாஸில் பயணம் செய்தால், குழந்தைகள் அபுதாபியில் உள்ள எதிஹாட்டின் பிரத்தியேக ஓய்வறைகளில் ஓய்வெடுக்கலாம்.

விமானத்தில் அனுபவம்

எதிஹாட் விமானத்தில் பயணிக்கும் குழந்தைகள் பின்வரும் அனுபவத்தைப் பெறுவார்கள்:

• E-BOX பொழுதுபோக்கு அணுகல்
• ஈடுபாட்டுடன் இருக்க ஒரு வேடிக்கையான செயல்பாட்டு தொகுப்பு.
• குறுகிய நேர விமான பயணங்களில், குழந்தைகள் E-BOX-ஐ அணுக தங்கள் சொந்த தொலைபேசி அல்லது டேப்லெட்டை கொண்டு வருதல் சிறந்தது.

இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel