ஐக்கிய அரபு அமீரகத்தில் உள்ள சில வாகன ஓட்டிகள் எதிர்கொள்ளக்கூடிய திடீர் உடல்நலப் பிரச்சினைகள் சாலைப் பாதுகாப்பை நேரடியாகப் பாதிக்கின்றன என்று அபுதாபி காவல்துறை இன்று (வெள்ளிக்கிழமை) எச்சரித்துள்ளது. குறிப்பாக நீரிழிவு நோயால் பாதிக்கப்பட்ட ஓட்டுநர்கள் மிகுந்த எச்சரிக்கையுடன் இருக்குமாறு அபுதாபி காவல்துறை கேட்டுக்கொண்டுள்ளது.
அதாவது நீரிழிவு நோயால் பாதிக்கப்பட்ட ஓட்டுநர்கள், குறைந்த இரத்த சர்க்கரை அளவை (ஹைப்போகிளைசீமியா) எதிர்கொள்ளும்போது வாகனம் ஓட்டுவதில் உள்ள ஆபத்துகளை மனதில் கொள்ள வேண்டும் என தெரிவித்துள்ளது. மேலும் இரத்த சர்க்கரை அளவில் ஏற்படும் இத்தகைய திடீர் வீழ்ச்சிகள், ஓட்டுநர்களின் கவனத்தையும் அவர்களின் எதிர்வினை வேகத்தையும் பாதிக்கின்றன என்றும், இது கடுமையான போக்குவரத்து விபத்துகளுக்கு வழிவகுக்கும் என்றும் அபுதாபி காவல்துறையின் பொதுக் கட்டளைப் பிரிவு கூறியுள்ளது.
மேலும் குறைந்த இரத்த சர்க்கரை அளவுகள், ஒரு வாகனத்தைக் கட்டுப்படுத்தும் ஓட்டுநரின் திறனை எதிர்மறையாகப் பாதிக்கும் திடீர் அறிகுறிகளை ஏற்படுத்தக்கூடும் என்றும் தெரிவிக்கப்பட்டுள்ளது.
இதனை விளக்கும் விதமாக அபுதாபியில் உள்ள 4 வழிச் சாலையில் நீரிழிவு நோயால் பாதிக்கப்பட்ட ஓட்டுநர் ஒருவர் தனது வாகனத்தின் கட்டுப்பாட்டை இழந்து பாதையை விட்டு விலகிச் சென்றபோது நடந்த விபத்து குறித்த காணொளியை அந்த அமைப்பு பகிர்ந்துள்ளது. அதில் மற்ற வாகனங்கள் விலகிச் செல்ல முயன்றபோதும், அவர் ஒரு பாதையிலிருந்து மற்றொரு பாதைக்கு மாறிக்கொண்டே இருந்தார். இறுதியில், அவர் ஒரு நீல நிறக் காரின் மீது மோதினார், அந்தக் கார் சாலையின் வேலியின் மீது மோதி நின்றது குறிப்பிடத்தக்கது. எனவே இது போன்ற சம்பவங்கள் ஏற்படாமல் இருக்க சர்க்கரை நோய் உடையவர்கள் எச்சரிக்கையுடன் இருக்குமாறு காவல்துறை வலியுறுத்தியுள்ளது.
ஹைப்போகிளைசீமியா என்றால் என்ன?
ஹைப்போகிளைசீமியா என்பது ஒருவரின் இரத்தத்தில் குளுக்கோஸ் (சர்க்கரை) அளவு அசாதாரணமாகக் குறைவாக இருக்கும் ஒரு நிலையாகும். நீரிழிவு நோய்க்கு சிகிச்சை பெறுபவர்களுக்கு ஹைப்போகிளைசீமியா ஏற்படுவதற்கான காரணங்களில், தாமதமாக அல்லது உணவைத் தவிர்ப்பது, வழக்கத்திற்கு மாறான உடல் செயல்பாடு, அதிகப்படியான இன்சுலின் அல்லது நீரிழிவு நோய்க்கான பல வாய்வழி மருந்துகள், மற்றும் தொற்றுகள் போன்ற நோய்கள் அடங்கும்.
ஹைப்போகிளைசீமியாவின் பிற ஆபத்துக் காரணிகளில் மது அருந்துதல், முக்கிய உறுப்பு செயலிழப்பு (சிறுநீரகம், இதயம் அல்லது கல்லீரல்), மற்ற மருந்துகளுடனான மருந்து இடைவினைகள், தீவிர நோய், ஹார்மோன் குறைபாடுகள் மற்றும் கட்டிகள் ஆகியவை அடங்கும் என கூறப்படுகின்றது.
மேலும் ஹைப்போகிளைசீமியாவின் அறிகுறிகளில் படபடப்பு, நடுக்கம், அதிக வியர்வை, மங்கலான பார்வை, தலைச்சுற்றல், நடுக்கம், குழப்பம், திடீரென ஏற்படும் பசி மற்றும் ஆரம்பத்தில் அதீத சோர்வு ஆகியவை அடங்கும் என்பதும் குறிப்பிடத்தக்கது.
