அனைத்து கட்டண பார்க்கிங் சேவைகள் மீதும் 5 சதவீத மதிப்பு கூட்டப்பட்ட வரியை (VAT) அறிமுகப்படுத்துவதாக ‘Parkin’ மற்றும் salik நிறுவனம் அறிவித்துள்ளதைத் தொடர்ந்து, ஜூன் 1, 2026 முதல் துபாய் முழுவதும் உள்ள வாகன ஓட்டிகள் பொது பார்க்கிங் இடங்களுக்கு சற்று அதிக கட்டணம் செலுத்த வேண்டியிருக்கும். இந்த நடவடிக்கை ஐக்கிய அரபு அமீரகத்தின் வரி விதிமுறைகளுக்கு இணங்க அமைந்துள்ளது. மேலும் இது அமீரகம் முழுவதும் உள்ள சாலை ஓர மற்றும் சாலைக்கு அப்பாலான (off-street) பார்க்கிங் வசதிகள் இரண்டிற்கும் பொருந்தும் என்று தெரிவிக்கப்பட்டுள்ளது.
Parkin நிறுவனத்தை பொறுத்தவரை இந்த புதிய வரி, வழக்கமான பார்க்கிங் கட்டணங்கள், பல அடுக்கு பார்க்கிங் கட்டணங்கள், பருவ கால அனுமதிச் சீட்டுகள் மற்றும் பார்க்கின் நிறுவனத்தால் நிர்வகிக்கப்படும் பார்க்கிங் தொடர்பான பிற சேவைகள் அனைத்தையும் பாதிக்கும் என்று கூறபபடுகிறது.
திருத்தப்பட்ட விலை நிர்ணயக் கட்டமைப்பின்படி:
- 4 திர்ஹம்ஸ் (VAT-க்கு முன்) சாலை ஓர பார்க்கிங் → 4.20 திர்ஹம்ஸ் (VAT-க்குப் பிறகு)
- 6 திர்ஹம்ஸ் (பீக் நேரம்/அதிக நெரிசல் நேரம்) சாலை ஓர பார்க்கிங் → 6.30 திர்ஹம்ஸ்
- 5 திர்ஹம்ஸ் (மணிக்கு) பல அடுக்கு பார்க்கிங் → 5.25 திர்ஹம்ஸ்
- 40 திர்ஹம்ஸ் (24 மணி நேரத்திற்கு) பல அடுக்கு பார்க்கிங் → 42 திர்ஹம்ஸ்
- 24 திர்ஹம்ஸ் பிரீமியம் பீக் நேர பார்க்கிங் (மண்டலம் AP) → 25.20 திர்ஹம்ஸ்
- 10 திர்ஹம்ஸ் (மணிக்கு) JLT பார்க்கிங் → 10.50 திர்ஹம்ஸ்
மேலும், வாகன ஓட்டிகள் எவ்விதமான முன்தேதியிட்ட (retrospective) VAT கட்டணங்களையும் செலுத்தத் தேவையில்லை என்பதையும் நிறுவனம் உறுதிப்படுத்தியுள்ளது.
பிப்ரவரி 1, 2024 முதல் மார்ச் 31, 2026 வரையிலான காலப்பகுதிக்கான VAT தொகையை, சாலைகள் மற்றும் போக்குவரத்து ஆணையமே (RTA) ஈடுசெய்யும் என்றும், இதன் மூலம் கடந்தகால வரி மாற்றங்களால் வாடிக்கையாளர்கள் பாதிக்கப்படாமல் இருப்பது உறுதி செய்யப்படும் என்றும் அந்நிறுவனம் தெரிவித்துள்ளது.
மேலும், பார்க்கிங் பயனர்களிடமிருந்து வசூலிக்கப்படும் அனைத்து VAT தொகையும், அமீரக விதிமுறைகளுக்கு இணங்க, மத்திய வரி ஆணையத்திற்கு (Federal Tax Authority) மாற்றப்படும் என்றும் கூறப்பட்டுள்ளது.
இதனுடன் மற்றொரு முக்கிய மாற்றமாக, அமீரகத்தின் ‘ரொக்கமில்லாப் பணப் பரிவர்த்தனை’ (cashless) உத்தியின் ஒரு பகுதியாக, ஜூன் 1 முதல் பொது பார்க்கிங் கட்டண மீட்டர்களில் ரொக்கப் பணம் செலுத்தும் முறையை துபாய் அதிகாரப்பூர்வமாக நீக்கவுள்ளது.
வாகன ஓட்டிகள் இனி பின்வரும் டிஜிட்டல் பணப் பரிவர்த்தனை முறைகளையே பயன்படுத்த வேண்டும்:
- நோல் அட்டைகள் (Nol cards)
- பார்க்கின் மொபைல் செயலி (App)
- SMS வாகன நிறுத்தச் சேவை
- WhatsApp பணப் பரிவர்த்தனை வசதிகள்
- அங்கீகரிக்கப்பட்ட பிற டிஜிட்டல் வழிமுறைகள்
SMS வாயிலாகச் செய்யப்படும் பணப் பரிவர்த்தனைகளுக்கு, தற்போது நடைமுறையில் உள்ள 0.30 திர்ஹம்ஸ் சேவைக்கட்டணம் தொடர்ந்து வசூலிக்கப்படும் என்றும், அதேவேளையில், மொபைல் செயலி மற்றும் WhatsApp வாயிலாகச் செய்யப்படும் பணப் பரிவர்த்தனைகளுக்கு எவ்விதக் கூடுதல் கட்டணங்களும் வசூலிக்கப்படாது என்றும் நிறுவனம் குறிப்பிட்டுள்ளது.
வாகன ஓட்டிகள் செய்ய வேண்டியவை
ஜூன் 1 ஆம் தேதி காலக்கெடுவிற்கு முன்னதாக, வாகன ஓட்டிகள் டிஜிட்டல் கட்டண முறைகளுக்கு மாறுமாறும், சுமுகமான வாகன நிறுத்துமிட அனுபவத்திற்காக பார்க்கின் (Parkin) செயலியைப் பதிவிறக்கம் செய்யுமாறும் அதிகாரிகள் ஊக்குவிக்கின்றனர்.
இந்த மாற்றங்கள், மதிப்புக்கூட்டு வரி (VAT) அமலாக்கத்தையும், நகரம் முழுமையாகப் பணமில்லா வாகன நிறுத்துமிட வலையமைப்பை நோக்கி மாறுவதையும் இணைத்து, இந்த ஆண்டு துபாயின் பார்க்கிங் அமைப்பில் செய்யப்படும் மிகப்பெரிய மேம்படுத்தல்களில் ஒன்றாகக் கருதப்படுகிறது.
இதேபோல், சாலிக் (Salik) நிறுவனமும் ஜூன் 1, 2026 முதல் சுங்கக் கட்டணங்கள் மற்றும் டேக் (tag) செயல்படுத்துவதற்கான கட்டணங்கள் மீது 5 சதவீத மதிப்பு கூட்டப்பட்ட வரி (VAT) அறிமுகப்படுத்தப்படுவதாக அறிவித்துள்ளது.
புதிய கட்டண விகிதங்களின்படி, தற்போது நெரிசலான நேரங்களில் வசூலிக்கப்படும் 6 திர்ஹம்ஸ் சுங்கக் கட்டணம் 6.30 திர்ஹம்ஸ் ஆக உயரும். அதேவேளையில், நெரிசல் இல்லாத பிற நேரங்களில் வசூலிக்கப்படும் 4 திர்ஹம்ஸ் கட்டணம் 4.20 திர்ஹம்ஸ் ஆக அதிகரிக்கும். இது தவிர, தற்போதுள்ள நடைமுறையின்படியே, நள்ளிரவு 1 மணி முதல் காலை 6 மணி வரை சுங்கக் கட்டணங்கள் எதுவும் வசூலிக்கப்படாது என்பதை நிறுவனம் உறுதிப்படுத்தியுள்ளது.
துபாயின் சாலைகளில் தினசரி பயணம் மேற்கொள்வோரைப் பொறுத்தவரை, ஒரு பயணத்திற்கான இந்தக் கட்டண உயர்வு சிறியதாகத் தோன்றலாம். ஆனால், காலப்போக்கில் இது கணிசமான தொகையாகக் கூடிவிடும். நெரிசலான நேரங்களில் தினமும் நான்கு சாலிக் சுங்கச்சாவடிகளைக் கடந்து செல்லும் ஒரு வாகன ஓட்டி, முன்பு 24 திர்ஹம்ஸ் செலவிட்ட நிலையில், இனி தினமும் 25.20 திர்ஹம்ஸ் செலவிட வேண்டியிருக்கும். வழக்கமான 21 வேலை நாட்கள் கொண்ட ஒரு மாதத்தில், இத்தொகை முன்பு 504 திர்ஹம்ஸ் ஆக இருந்த நிலையில், இனி 529.20 திர்ஹம்ஸ் ஆக உயரும். அதாவது, மாதத்திற்கு 25.20 திர்ஹம்ஸ் கூடுதல் செலவாகும்.
வாகன ஓட்டிகளிடமிருந்து வசூலிக்கப்படும் அனைத்து மதிப்பு கூட்டப்பட்ட வரிகளும் (VAT), ஐக்கிய அரபு அமீரகத்தின் விதிமுறைகளுக்கு இணங்க, ‘கூட்டாட்சி வரி ஆணையத்திடம்’ (FTA) ஒப்படைக்கப்படும் என்று சாலிக் நிறுவனம் தெரிவித்துள்ளது.
ஜூலை 1, 2022 முதல் மார்ச் 31, 2026 வரையிலான காலகட்டத்தில் ஈட்டப்பட்ட சுங்க வருவாய்கள் மற்றும் அது சார்ந்த கட்டணங்கள் மீது, பின்னேற்பு அடிப்படையில் (retrospectively) மதிப்பு கூட்டப்பட்ட வரி விதிக்கப்பட்டுள்ளதாக அந்நிறுவனம் உறுதிப்படுத்தியுள்ளது. இதன் விளைவாக, அபராதங்கள் உட்பட சுமார் 471 மில்லியன் திர்ஹம்ஸ் அளவிலான வரிப் பொறுப்புகள் (VAT liabilities) ஏற்பட்டுள்ளன.
எனினும், வாகன ஓட்டிகள் இத்தகைய பின்னேற்புக் கட்டணங்கள் எதையும் செலுத்த வேண்டியதில்லை. கடந்தகால வரிப் பொறுப்புகளால் சாலைப் பயனாளிகள் எவரும் பாதிக்கப்படாமல் இருப்பதை உறுதிசெய்யும் வகையில், அந்தப் பழைய வரிப் பொறுப்புத் தொகையை ‘சாலைகள் மற்றும் போக்குவரத்து ஆணையமே’ (RTA) ஈடுசெய்யும் என்று சாலிக் நிறுவனம் தெரிவித்துள்ளது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
