ஐக்கிய அரபு அமீரகம் முழுவதும் உள்ள மக்கள் வரும் நாட்களில் பெரும்பாலும் வெயில் மற்றும் நிலையான வானிலையை எதிர்பார்க்கலாம் என நாட்டின் தேசிய வானிலை ஆய்வு மையம் (NCM) தெரிவித்துள்ளது. அதாவது ஜூன் மாதத் தொடக்கத்தில் தெளிவான வானம், லேசானது முதல் மிதமான காற்று மற்றும் பொதுவாக அமைதியான கடல் நிலவும் என்று கணித்துள்ளது.
NCM வெளியிட்டுள்ள வானிலை அறிக்கையின் படி, சனிக்கிழமை நாடு முழுவதும் நல்ல வானிலை நிலவும் என்று எதிர்பார்க்கப்படுகிறது, மேலும் தென்கிழக்குக் காற்று அன்றைய பிற்பகுதியில் படிப்படியாக வடமேற்குக் காற்றாக மாறும். காற்றின் வேகம் மணிக்கு 10 முதல் 25 கி.மீ. வரை இருக்கும், திறந்தவெளிப் பகுதிகளில் அவ்வப்போது மணிக்கு 40 கி.மீ. வரை எட்டும் என்று கூறப்பட்டுள்ளது. அதே நேரத்தில், அரேபிய வளைகுடா மற்றும் ஓமான் கடல் ஆகிய இரண்டிலும் கடல் நிலை லேசானது முதல் மிதமானது வரை இருக்கும் என்று NCM தெரிவித்துள்ளது.
இதைத் தொடர்ந்து, அடுத்தநாளான ஞாயிற்றுக்கிழமையும் நிலையான வானிலை தொடரும் என்று NCM கூறியுள்ளது, இருப்பினும் வெப்பநிலை சற்று குறையும் என எதிர்பார்க்கப்படுகிறது. வடமேற்குக் காற்று அவ்வப்போது வலுப்பெறுவதால், சில திறந்தவெளிப் பகுதிகளில் புழுதிப் புயல் உருவாகி, மூடுபனி சூழ்ந்த நிலை ஏற்படலாம் என்று எச்சரிக்கை விடுத்துள்ளது. இதனிடையே, காற்றின் வேகம் மணிக்கு 40 கி.மீ. வரை எட்டக்கூடும் என்றும், மேலும் அரேபிய வளைகுடா அவ்வப்போது சீற்றமாக மாறும் என்றும் கூறப்பட்டுள்ளது.
ஞாயிற்றுக்கிழமையைப் போலவே, திங்கட்கிழமையும் இதே போன்ற வானிலை கணிக்கப்பட்டுள்ளது, ஐக்கிய அரபு அமீரகம் முழுவதும் தெளிவான வானம் நிலவும் என்று வானிலை மையம் கூறியுள்ளது. அத்துடன் புதிய வடமேற்குக் காற்று இடைவிட்டு வீசும் என எதிர்பார்க்கப்படுகிறது, இது அரேபிய வளைகுடாவின் சில பகுதிகளில் மிதமான முதல் சீற்றமாக கடல் நிலைக்கு வழிவகுக்கும், அதே நேரத்தில் ஓமான் கடல் ஒப்பீட்டளவில் அமைதியாக இருக்கும் என்று கூறப்பட்டுள்ளது.
அடுத்ததாக, செவ்வாய்க்கிழமையை எதிர்நோக்குகையில், வெயிலான வானிலை தொடரும் என எதிர்பார்க்கப்படுகிறது, அவ்வப்போது காற்று வலுப்பெறுவதால், அவ்வப்போது புகைமூட்டம் மற்றும் புழுதி காணப்படும். அதுமட்டுமில்லாமல், வெப்பநிலை பருவகால சராசரிக்கு அருகில் இருக்கும் என கணிக்கப்பட்டுள்ளது, மேலும் பெரிய வானிலை அமைப்புகள் எதுவும் நாட்டைப் பாதிக்காது என எதிர்பார்க்கப்படுகிறது.
ஜூன் மாதத்தின் நிலையான தொடக்கம்
தேசிய வானிலை ஆய்வு மையத்தின் (NCM) கணிப்பின் படி, ஜூன் மாதத்தின் முதல் வாரம் அமீரகம் முழுவதும் நிலையான வானிலை தொடர வாய்ப்புள்ளது, இது வெயில், அவ்வப்போது புழுதிப் படலம் மற்றும் குறிப்பாக கடலோர மற்றும் ஆழ்கடல் பகுதிகளில் பலமான வடமேற்குக் காற்று வீசும் காலங்களுடன் குறிக்கப்படுகிறது.
ஆகவே, வெளிப்புற நடவடிக்கைகள் அல்லது கடற்கரைப் பயணங்களைத் திட்டமிடும் குடியிருப்பாளர்கள் பொதுவாக சாதகமான வானிலையை எதிர்பார்க்கலாம், அதே நேரத்தில் புழுதி மற்றும் புகைமூட்டத்தால் ஏற்படும் குறைந்த பார்வைத் திறனின் போது வாகன ஓட்டிகள் எச்சரிக்கையாக இருக்குமாறு அறிவுறுத்தப்படுகிறார்கள்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
