ஐக்கிய அரபு அமீரகத்தின் 750 மில்லியன் திர்ஹம் மதிப்பிலான ‘எமிரேட்ஸ் சாலை மேம்பாட்டுத் திட்டம்’ (Emirates Road Enhancement Project), திட்டமிடப்பட்ட காலக்கெடுவுக்கு முன்னதாகவே 30 சதவீத நிறைவை எட்டியுள்ளதாக அதிகாரிகள் தெரிவித்துள்ளனர். நாட்டின் மிக முக்கியமான மற்றும் பரபரப்பான நெடுஞ்சாலைகளில் ஒன்றான எமிரேட்ஸ் சாலையில் மேற்கொள்ளப்படும் இந்த முக்கிய மேம்பாட்டுப் பணி, போக்குவரத்து நெரிசலைக் குறைப்பதோடு, பயண நேரத்தை 65 சதவீதம் வரை குறைக்கும் என்று எதிர்பார்க்கப்படுகிறது.
இத்திட்டம் முக்கியமாக எமிரேட்ஸ் சாலை – அல் அய்ன் சாலை சந்திப்புப் பகுதியை (interchange) மையமாகக் கொண்டுள்ளது என்று எரிசக்தி மற்றும் உள்கட்டமைப்பு அமைச்சகம் (MoEI) தெரிவித்துள்ளது. இப்பகுதியில், 11 கிலோமீட்டர் நீளத்திற்குச் சாலையின் இருபுறமும் தலா மூன்று வழித்தடங்களில் இருந்து ஆறு வழித்தடங்களாக விரிவுபடுத்தும் பணிகள் நடைபெற்று வருகின்றன.
விரிவாக்கப் பணிகள் நிறைவடைந்ததும், இச்சாலை கூடுதலாக சுமார் 9,000 வாகனங்களை கையாளும் திறன் பெறும். மேலும், ஒட்டுமொத்த போக்குவரத்து ஓட்டத்தின் செயல்திறன் 70 சதவீதம் மேம்படும் என்றும், இதன் மூலம் தினசரி பயணிகளுக்கு ஏற்படும் போக்குவரத்து நெரிசல் கணிசமாகக் குறையும் என்றும் எதிர்பார்க்கப்படுகிறது.
முக்கிய உள்கட்டமைப்பு மேம்பாடு
இத்திட்டத்தின் ஒரு பகுதியாக, இண்டர்செக்ஷன் பகுதியில் போக்குவரத்து இயக்கத்தை மேம்படுத்தும் வகையில், மொத்தம் 2.1 கிலோமீட்டர் நீளம் கொண்ட 14 பாலங்கள் மற்றும் ஐந்து சுரங்கப்பாதைகள் அமைச்சகத்தால் கட்டப்பட்டு வருகின்றன.
இந்த சாலை விரிவாக்கப் பணிகள் சாலையின் கொள்ளளவை சுமார் 9,000 வாகனங்கள் அளவுக்கு அதிகரிக்கும் என்றும், இது தற்போதைய கொள்ளளவை விட 65 சதவீதம் வரை அதிகம் என்றும் அமைச்சகத்தின் உள்கட்டமைப்பு மேம்பாட்டுத் திட்டங்களின் இயக்குனர் ஆயிஷா அல் ஜாபி (Aisha Al Zaabi) தெரிவித்துள்ளார்.
மேலும், கட்டுமானப் பணிகள் தற்போது 26.59 சதவீத நிறைவை எட்டியுள்ளதாகவும், அங்கீகரிக்கப்பட்ட கால அட்டவணையை விட 3.27 சதவீதம் முன்னிலையில் முன்னேறி வருவதாகவும் அவர் குறிப்பிட்டுள்ளார். அமைச்சகத்தின் முக்கிய உள்கட்டமைப்புத் திட்டங்களில் ஒன்றான இதில் காணப்படும் இந்த வேகமான முன்னேற்றம் குறிப்பிடத்தக்கது.
தொழிலாளர் பாதுகாப்புக்கு முக்கியத்துவம்
அதிகாரப்பூர்வ கள ஆய்வின் போது, அமைச்சகம் தனது ‘தொழில்சார் வெப்ப அழுத்தத் தடுப்புக் கொள்கை’ (Occupational Heat Stress Prevention Policy) குறித்தும் வலியுறுத்தியுள்ளது. ஐக்கிய அரபு அமீரகத்தின் கோடைக்கால மாதங்களில் கட்டுமானத் தொழிலாளர்களை வெப்பம் தொடர்பான உடல்நலப் பாதிப்புகளிலிருந்து பாதுகாப்பதே இக்கொள்கையின் நோக்கமாகும் .
அந்த வகையில், உள்கட்டமைப்புப் பணிகள் மற்றும் தொழிலாளர் நலன் சார்ந்த முயற்சிகள் ஆகிய இரண்டிற்கும் ஆதரவளித்ததற்காக மத்திய மற்றும் உள்ளூர் அதிகாரிகள், ஒப்பந்ததாரர்கள் மற்றும் திட்டப் பங்காளிகளுக்கு அதிகாரிகள் நன்றி தெரிவித்துக் கொண்டனர்.
எமிரேட்ஸ் சாலை மேம்பாட்டுத் திட்டம் ஜூலை 2025-இல் அறிவிக்கப்பட்டது. இதனைத் தொடர்ந்து, இரண்டு ஆண்டு காலச் செயலாக்கத் திட்டத்தின் கீழ் செப்டம்பர் 2025-இல் கட்டுமானப் பணிகள் தொடங்கின. இத்திட்டம் ஐக்கிய அரபு அமீரகத்தின் விரிவான உள்கட்டமைப்பு உத்தியின் ஒரு முக்கிய அங்கமாக அடையாளம் காணப்பட்டுள்ளது. மேலும், போக்குவரத்து ஓட்டத்தை மேம்படுத்துதல் மற்றும் நிலையான வளர்ச்சியை ஆதரித்தல் ஆகியவற்றிற்கான முயற்சிகளின் ஒரு பகுதியாக, அமீரக அரசின் வருடாந்திரக் கூட்டங்களின் போது இது காட்சிப்படுத்தப்பட்டது.
அதுமட்டுமில்லாமல், 2030-ஆம் ஆண்டிற்கு முன்னதாக நாட்டின் கூட்டாட்சி சாலைக் கட்டமைப்பை நவீனமயமாக்குவதை நோக்கமாகக் கொண்ட, 170 பில்லியன் திர்ஹம் மதிப்பிலான உள்கட்டமைப்பு முதலீட்டுத் திட்டத்தின் கீழ் உள்ள முக்கியத் திட்டங்களில் ஒன்றாக, இது கூட்டாட்சி தேசிய அவையிலும் (Federal National Council) சமர்ப்பிக்கப்பட்டது குறிப்பிடத்தக்கது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
