இந்தியாவிலிருந்து அபுதாபிக்குச் செல்லத் திட்டமிடுகிறீர்களா? இப்போது உங்கள் UAE நுழைவு விசாவிற்கு நீங்கள் எந்தக் கட்டணமும் செலுத்த வேண்டியதில்லை. ஆம், ஒரு புதிய சுற்றுலாத் திட்டத்தின் கீழ், அபுதாபியில் குறைந்தது மூன்று இரவுகள் தங்கும் விடுதி முன்பதிவை மேற்கொள்ளும் தகுதியுள்ள இந்திய பாஸ்போர்ட் வைத்திருப்பவர்களுக்கு கட்டணமின்றி இலவசமாக விசா வழங்கப்படும் என்று அறிவிக்கப்பட்டுள்ளது. இது பயணிகளுக்கு அமீரகத்துக்குச் சுற்றுலா செல்ல மற்றொரு சிறப்பான வாய்ப்பை அளிக்கிறது.
சமீபத்தில் வெளியிடப்பட்ட அறிவிப்பின்படி, இந்தியாவிலிருந்து பயணம் செய்யும் இந்திய பாஸ்போர்ட் வைத்திருப்பவர்கள், ஒரு புதிய சுற்றுலாத் திட்டத்தின் கீழ் தகுதியுள்ள அபுதாபி சுற்றுலாத் தொகுப்பை முன்பதிவு செய்யும்போது, தங்கள் UAE என்ட்ரி விசாவை இலவசமாகப் பெறலாம்.
கலாச்சாரம் மற்றும் சுற்றுலாத் துறை – அபுதாபி (DCT Abu Dhabi) இத்திட்டம் ஆகஸ்ட் 1 முதல் அக்டோபர் 31, 2026 வரை செயல்படுத்தப்படும் என்றும், ஆரம்பக்கட்ட மூன்று மாத காலத்தில் 20,000 விசாக்கள் வரை இதன்கீழ் வழங்கப்படும் என்றும் தெரிவித்துள்ளது.
இத்திட்டத்தின் கீழ், இதில் பங்கேற்கும் பயண முகவர்கள் அல்லது இணையவழி பயண நிறுவனங்கள் (online travel agencies) மூலம் முன்பதிவு செய்யும் தகுதியுள்ள பயணிகளுக்கான நுழைவு விசா கட்டணத்தை ‘DCT Abu Dhabi’ முழுமையாக ஏற்கும் என்றும் தெரிவிக்கப்பட்டுள்ளது.
இலவச விசாவை யார் பெறலாம்?
இச்சலுகை இந்தியாவிலிருந்து புறப்படும் இந்திய பாஸ்போர்ட் வைத்திருப்பவர்களுக்கு மட்டுமே பொருந்தும்.
மேலும், பயணிகள் பின்வரும் அனைத்து நிபந்தனைகளையும் பூர்த்தி செய்ய வேண்டும்:
- பங்கேற்கும் பயண முகவர் அல்லது இணையவழி பயண நிறுவனம் மூலம் முன்பதிவு செய்தல்
- அபுதாபியில் உள்ள ஒரு விடுதியில் குறைந்தது தொடர்ச்சியாக மூன்று இரவுகள் தங்குதல்
- இந்தியாவிற்கான திரும்பும் விமான டிக்கெட்டை (return flight ticket) வைத்திருத்தல்
பயணிகளின் முன்பதிவு இத்திட்டத்தின் தேவைகளைப் பூர்த்தி செய்யும் பட்சத்தில் விசா கட்டணம் அந்த துறையால் ஏற்றுக்கொள்ளப்படும் (இலவசமாக வழங்கப்படும்).
இத்திட்டம் எவ்வாறு செயல்படும்?
இத்திட்டத்தில் பங்கேற்கும் பயண நிறுவனங்கள் இரண்டு வழிகளில் விசா நடைமுறைகளை மேற்கொள்ளலாம்.
அவை DCT Abu Dhabi-யால் நியமிக்கப்பட்ட ‘டெஸ்டினேஷன் மேனேஜ்மென்ட் நிறுவனத்துடன்’ (Destination Management Company) இணைந்து செயல்படலாம். இதில் விசா கட்டணத்தை அத்துறையே நேரடியாக ஏற்கும்.
மாற்றாக, பயண முகவர்கள் தங்கள் தற்போதைய ‘டெஸ்டினேஷன் மேனேஜ்மென்ட் நிறுவனங்களுடனேயே’ தொடர்ந்து பணியாற்றலாம். இச்சூழ்நிலையில், வழங்கப்படும் ஒவ்வொரு தகுதியுள்ள விசாவுக்கும் 285 திர்ஹம் தொகையை ‘DCT Abu Dhabi’ திரும்ப வழங்கும்.
இந்தியச் சந்தை
இந்தியப் பயணச் சந்தையில் தங்கள் இருப்பை வலுப்படுத்தவும், அதிக சுற்றுலாப் பயணிகள் அபுதாபிக்கு வருகை தந்து அதனைச் சுற்றிப் பார்க்க ஊக்குவிக்கவும் மேற்கொள்ளப்படும் முயற்சிகளின் ஒரு பகுதியாகவே இத்திட்டம் அமைந்துள்ளதாக DCT அபுதாபி தெரிவித்துள்ளது.
விமானப் போக்குவரத்து இணைப்பை மேம்படுத்துதல், பயண நிறுவனங்களுடனான கூட்டாண்மையை விரிவுபடுத்துதல் மற்றும் இந்தியச் சுற்றுலாப் பயணிகளுக்கு அபுதாபியை எளிதில் சென்றடையக்கூடிய இடமாக மாற்றுதல் போன்ற முயற்சிகளின் தொடர்ச்சியாகவும் இத்திட்டம் அமைந்துள்ளது.
இது குறித்து DCT அபுதாபியின் சர்வதேசச் செயல்பாடுகளுக்கான இயக்குநர் அப்துல்லா யூசுப் பேசுகையில், “இந்தியா எங்களின் மிக முக்கியமான சர்வதேசச் சந்தைகளில் ஒன்றாகத் தொடர்ந்து திகழ்கிறது,” என்று குறிப்பிட்டுள்ளார்.
மேலும், அமீரகத்திற்கான நுழைவு விசா கட்டணத்தை ஏற்பது, இந்தியப் பயணிகள் அபுதாபியைத் தேர்ந்தெடுப்பதை எளிதாக்குவதுடன், சுற்றுலாத் துறை சார்ந்த கூட்டாளிகளுக்கு இச்சுற்றுலாத் தலத்தை ஊக்குவிப்பதற்கான கூடுதல் ஊக்கத்தையும் அளிக்கும் என்றும் அவர் கூறியுள்ளார்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
