ஐக்கிய அரபு அமீரகத்தில் ஆகஸ்ட் 13, வியாழக்கிழமை அன்று ரபி-அல்-அவ்வல் மாதப் பிறை காணப்பட்டதாக பிறை பார்க்கும் குழு அறிவித்தது. இதன் மூலம் நபிகள் நாயகம் (ஸல்) அவர்களின் பிறந்தநாள் மற்றும் அதற்கான பொது விடுமுறைக்கான தேதி உறுதி செய்யப்பட்டுள்ளது.
நேற்று இந்தப் பிறை காணப்பட்டதன் மூலம், ஆகஸ்ட் 14 அன்று ரபி-உல்-அவ்வல் மாதம் தொடங்குவதைக் குறிக்கிறது. இதன்படி, நபிகள் நாயகத்தின் பிறந்தநாளாகக் கொண்டாடப்படும் ஹிஜ்ரி மாதத்தின் 12-வது நாள் செவ்வாய்க்கிழமை, ஆகஸ்ட் 25 அன்று வருகிறது.
இருப்பினும், அமீரகத்தில் வசிப்பவர்கள் மூன்று நாள் விடுமுறையை அனுபவிக்கவுள்ளனர். ஏனெனில், ஆகஸ்ட் 28, 2026 வெள்ளிக்கிழமையை இந்த நிகழ்விற்கான அதிகாரப்பூர்வ பொது விடுமுறையாக அரசு அறிவித்துள்ளது.
அலுவலகங்கள் எப்போது மீண்டும் திறக்கப்படும்?
அமீரகத்தின் பொது மற்றும் தனியார் துறை ஊழியர்களுக்கு ஆகஸ்ட் 28 வெள்ளிக்கிழமை விடுமுறை அளிக்கப்படும் என்று தெரிவிக்கப்பட்டுள்ளது. அதைத் தொடர்ந்து வழக்கமான சனி மற்றும் ஞாயிறு வார இறுதி விடுமுறைகளும் இருக்கும்.
பின்னர், திங்கட்கிழமை, ஆகஸ்ட் 31 அன்று வழக்கமான பணி நேரம் மீண்டும் தொடங்கும் என்று அறிவிக்கப்பட்டுள்ளது.
துபாய் அரசுத் துறைகள், ஆணையங்கள் மற்றும் நிறுவனங்களும் ஆகஸ்ட் 28 அன்று இந்த விடுமுறையைக் கடைப்பிடிக்கும் என்று கூறப்பட்டுள்ளது.
விடுமுறை ஏன் ஆகஸ்ட் 28 அன்று அறிவிக்கப்பட்டுள்ளது?
நபிகள் நாயகத்தின் பிறந்தநாள் செவ்வாய்க்கிழமை, ஆகஸ்ட் 25 அன்று வந்தாலும், அமீரகத்தின் பொது விடுமுறை மாற்றுக் கொள்கையின்படி, பெரும்பாலான பொது விடுமுறைகளை வாரத்தின் தொடக்கத்திற்கோ அல்லது வார இறுதிக்கோ மாற்றியமைக்க அனுமதிக்கப்படுகிறது.
இந்தக் கொள்கை ஈத்-அல்-பித்ர் மற்றும் ஈத்-அல்-அதா ஆகிய பண்டிகைகளுக்குப் பொருந்தாது என்பது குறிப்பிடத்தக்கது.
இந்த நீண்ட வார இறுதி விடுமுறையானது, அமீரகப் பள்ளிகளின் கோடைக்கால விடுமுறையின் இறுதி நாட்களுடனும் ஒத்துப்போகிறது. 2026-27 கல்வியாண்டு ஆகஸ்ட் 31 அன்று தொடங்குவதாக பள்ளி நிர்வாகங்கள் ஏற்கனவே அறிவித்துள்ளன.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
