துபாய் அதன் தூய்மையான, அகலமான மற்றும் நன்கு இணைக்கப்பட்ட சாலைகளுக்காக அறியப்படுகிறது. மேலும், போக்குவரத்து நெரிசல் ஒரு வளர்ந்து வரும் சவாலாக மாறி வருவதால், இந்த எமிரேட் தனது உள்கட்டமைப்பைத் தொடர்ந்து விரிவுபடுத்தி வருகிறது. அந்த வகையில், வாகன ஓட்டிகளின் தினசரி பயணத்தை எளிதாக்கவும், இணைப்பை வலுப்படுத்தவும் ஒரு முக்கிய நடவடிக்கையாக, துபாய் 80 கி.மீ நீளமுள்ள புதிய நான்காவது வழித்தடத்திற்கு ஒப்புதல் அளித்துள்ளது.
கட்டமைப்பு வசதிகளில் முதலீட்டை விரைவுபடுத்துவதற்கான ஷேக் முகமது பின் ரஷித் அல் மக்தூமின் அறிவுறுத்தல்களின்படி இத்திட்டம் அங்கீகரிக்கப்பட்டதாக, துபாயின் பட்டத்து இளவரசர் ஷேக் ஹம்தான் பின் முகமது பின் ரஷித் அல் மக்தூம் தெரிவித்துள்ளார்.
துபாய் முழுவதும் 80 கி.மீ வழித்தடம்
இந்த புதிய வழித்தடமானது அபுதாபியில் உள்ள அல் ஃபயா (Al Faya) சாலையில் தொடங்கி ஷார்ஜாவில் உள்ள அல் ஷனூஃப் (Al Shanouf) சாலை வரை அமையும் என்று தெரிவிக்கப்பட்டுள்ளது. இதில் பின்வருவன அடங்கும்:
- இரு திசைகளிலும் தலா 12 வழித்தடங்கள் (lanes)
- 72 பாலங்கள்
- 17 சுரங்கப்பாதைகள்
- அல் மக்தூம் சர்வதேச விமான நிலையத்துடனான இணைப்புகள்
- எதிஹாட் ரயில் (Etihad Rail) உடனான இணைப்புகள்
அதிகாரிகளின் கூற்றுப்படி, இத்திட்டம் பயண நேரத்தை 60 சதவீதம் வரை குறைக்கும் என்றும், 31 லட்சத்திற்கும் அதிகமான மக்களுக்குப் பயன்படும் என்றும் எதிர்பார்க்கப்படுகிறது.
3.5 பில்லியன் திர்ஹம் மதிப்பிலான முதல் கட்டம்
இதன் முதல் கட்டம் அல் ஷனூஃப் சாலையில் தொடங்கி துபாய்-அல் அய்ன் சாலை வரை அமையும் என்றும், இதற்கு 3.5 பில்லியன் திர்ஹம் செலவாகும் எனவும் மதிப்பிடப்பட்டுள்ளது.
மக்கள் தொகை வளர்ச்சி மற்றும் அதிகரித்து வரும் பொருளாதார நடவடிக்கைகளுக்குத் தயாராகும் வகையில், துபாய் மேற்கொள்ளும் முக்கிய போக்குவரத்து உள்கட்டமைப்பு முதலீடுகளின் ஒரு பகுதியாக இந்த வழித்தடம் அமைகிறது.
பொருளாதார வளர்ச்சியை ஊக்குவிப்பதிலும், வாழ்க்கைத் தரத்தை மேம்படுத்துவதிலும், எதிர்காலத் தேவைகளுக்குத் தயாராவதிலும் உள்கட்டமைப்புக்கு துபாய் அளிக்கும் முக்கியத்துவத்தை இத்திட்டம் பிரதிபலிக்கிறது என்று ஷேக் ஹம்தான் கூறியுள்ளார்.
ஒட்டுமொத்தத்தில், இந்த புதிய சாலை அமைப்பு, துபாய், அண்டை எமிரேட் மற்றும் ஐக்கிய அரபு அமீரகம் முழுவதும் உள்ள முக்கிய போக்குவரத்து மையங்களுக்கு இடையிலான இணைப்பை மேம்படுத்தும் என்றும் எதிர்பார்க்கப்படுகிறது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
