உலகின் மிகப்பெரிய தொழில்நுட்ப நிறுவனமான ஆப்பிள் ஒரு புதிய ஐஃபோனை அறிமுகப்படுத்தும் போதெல்லாம், ஐக்கிய அரபு அமீரகம் முழுவதும் உள்ள கடைகள் ஐஃபோன் ரசிகர்களின் கூட்டத்தாலும், அறிமுக நாள் உற்சாகத்துடனும் கொண்டாட்டமாக மாறிவிடுகின்றன. அதே பரபரப்பு ஐபோன் 18 தொடருடனும் மீண்டும் வந்துள்ளது.
ஆம், சமீபத்திய iPhone 18 Pro மற்றும் Pro Max ஆகியவை அதிகாரப்பூர்வமாக விற்பனைக்கு வந்த இன்று (வெள்ளிக்கிழமை), புதிய மாடல்களைப் பெறுவதற்காக வாடிக்கையாளர்கள் துபாய் முழுவதும் உள்ள கடைகளுக்கு விரைந்தனர். அறிமுக நாள் கூட்டம் தொடங்குவதற்கு முன்பே சில பிரபலமான மாடல்களும் வண்ணங்களும் விற்றுத் தீர்ந்துவிட்டதாகவும், எதிர்பார்த்ததை விட அதிக அளவிலான தேவையை இது குறிப்பதாகவும் சில்லறை விற்பனையாளர்கள் தெரிவித்துள்ளனர்.
புதிய ஐஃபோன் மாடல்களை வாங்குவதற்காக மக்கள் திரண்டதால், துபாய் மாலில் அறிமுக நாளன்று பெரும் கூட்டம் காணப்பட்டதாக விற்பனையாளர்கள் கூறுகின்றனர். முந்தைய அறிமுகங்களின்போதும் ஆப்பிளின் உயர்தர மாடல்களுக்கு இருந்த வலுவான தேவையைத் தொடரும் வகையில், Pro மற்றும் Pro Max மாடல்களுக்கான முன்பதிவுகள் (pre-orders) ஏற்கனவே எதிர்பார்ப்புகளைத் தாண்டியுள்ளதாக விற்பனையாளர்கள் தெரிவித்தனர்.
அமோக விற்பனை
இது குறித்து Eros நிறுவனத்தின் தலைமை நிர்வாக அதிகாரி (CEO) ரஜத் அஸ்தானா கூறுகையில், iPhone 18 Pro மற்றும் Pro Max விற்பனையானது எதிர்பார்த்தபடியே அமோகமாக உள்ளது என்று விவரித்துள்ளார். குறிப்பாக புதிய பர்கண்டி (burgundy) மற்றும் கிளேசியர் ப்ளூ (glacier blue) நிறங்கள் அதிக வரவேற்பைப் பெற்றுள்ளன என்று அவர் குறிப்பிட்டுள்ளார்.
ஈரோஸ் நிறுவனம் தற்போது துபாயில் உள்ள பாம் ஜுமைரா மால், இப்ன் பத்தூதா மால், துபாய் ஹில்ஸ் மற்றும் புர்ஜுமான் மால் ஆகிய நான்கு விற்பனை நிலையங்களில் ஐபோன் 18 ரகங்களை விற்பனைக்கு வைத்துள்ளது.
மேலும், தங்களுக்கு ஒதுக்கப்பட்ட ஆரம்பக்கட்ட சரக்குகள் ஏற்கனவே விற்றுத் தீர்ந்துவிட்டதாக அவர் கூறியுள்ளார். விற்பனையாளர்களின் கூற்றுப்படி, புதிய மாடல் ஐஃபோன்கள் iPhone 17 மாடல்களை விட விலை அதிகமாக இருந்தபோதிலும், 512GB மாடல் அதிக அளவில் விரும்பப்படும் தேர்வாக உருவெடுத்துள்ளது.
அதேபோல், ‘Jumbo Electronics’ நிறுவனமும் முன்பதிவு காலத்தில் “மிகவும் வலுவான வரவேற்பு” இருந்ததாகத் தெரிவித்துள்ளது. இதிலும் பர்கண்டி நிறம் மிகவும் பிரபலமான நிறங்களில் ஒன்றாக இருந்தது குறிப்பிடத்தக்கது. இந்த மாடல்கள் அமீரகம் முழுவதும் உள்ள ஜம்போ கடைகளிலும், அதன் ஆன்லைன் தளத்திலும் கிடைக்கின்றன.
சமீபத்திய மாடல்களுக்கான இந்த வலுவான வரவேற்பானது, கடந்த ஆண்டு iPhone 17 அறிமுகத்தின்போது இருந்த சூழலை நினைவூட்டுவதாக விற்பனையாளர்கள் குறிப்பிடுகின்றனர். அப்போது ஈரோஸ் நிறுவனம் முன்னெப்போதும் இல்லாத அளவிலான தேவையைப் பதிவு செய்தது. கடைகளுக்கு வரும் வாடிக்கையாளர்களின் எண்ணிக்கை ஆண்டுக்கு ஆண்டு 50 சதவீதம் அதிகரித்ததுடன், முன்பதிவுகள் சில நிமிடங்களிலேயே விற்றுத் தீர்ந்ததாகவும் அவர்கள் குறிப்பிடுகின்றனர்.
மேலும், அந்த அறிமுகத்தின்போது Pro Max மாடல், குறிப்பாக அதிக சேமிப்புத் திறன் (storage) கொண்ட பதிப்புகள், அதிக தேவையைப் பெற்றிருந்தன. அசல் சில்லறை விலையான 8,499 திர்ஹம்ஸ் உடன் ஒப்பிடுகையில், சில சாதனங்கள் பின்னர் ‘கிரே மார்க்கெட்’ (grey market) எனப்படும் அதிகாரப்பூர்வமற்ற சந்தையில் 14,000 திர்ஹம்ஸ் வரை மறுவிற்பனை செய்யப்பட்டதாகத் தகவல்கள் வெளியாகின. இந்த ஆண்டுக்கான ஐஃபோன் 18 ப்ரோ மற்றும் ப்ரோ மேக்ஸ், செப்டம்பர் 18, வெள்ளிக்கிழமை அன்று அமீரகம் முழுவதும் விற்பனைக்கு வந்த நிலையில், ஆன்லைன் முன்பதிவு 20 நிமிடங்களுக்கும் குறைவான நேரத்தில் விற்றுத் தீர்ந்ததாகக் கூறப்படுகிறது.
மடிக்கக்கூடிய ஐஃபோன்
வாடிக்கையாளர்கள் புதிய மாடல்களை வாங்க விரைந்த நிலையில், ஆப்பிளின் மற்றொரு சாதனம் ஏற்கனவே எதிர்பார்ப்பை உருவாக்கி வருவதாக சில்லறை விற்பனையாளர்கள் தெரிவிக்கின்றனர். அது நிறுவனத்தின் முதல் மடிக்கக்கூடிய ஐஃபோன் ஆகும், இது ஐஃபோன் டியோ என்று அழைக்கப்படுவதாகக் கூறப்படுகிறது.
இந்த மாடலுக்கான முன்பதிவுகள் அக்டோபர் 16 அன்று தொடங்க திட்டமிடப்பட்டுள்ளது, விற்பனை அக்டோபர் 23 அன்று ஆரம்பமாகும். இந்தச் சாதனத்தின் விலை 8,499 திர்ஹம்ஸில் தொடங்கி 13,599 திர்ஹம்ஸ் வரை இருக்கும் என்று கூறப்படுகிறது.
அதுமட்டுமில்லாமல், மடிக்கக்கூடிய மாடலுக்காகக் காத்திருப்பதால், சில வாடிக்கையாளர்கள் தங்கள் வாங்குதலைத் தள்ளி வைத்துள்ளதாக விற்பனையாளர்கள் கூறுகின்றனர். ஐஃபோன் 18 வரிசையை வாங்க நினைக்கும் வாடிக்கையாளர்களிடையே இந்தச் சாதனம் குறிப்பிடத்தக்க ஆர்வத்தை உருவாக்கி வருவதாக ஜம்போ நிறுவனமும் கூறியுள்ளது.
அதேசமயம், 24 மாதங்கள் வரை 0 சதவீதத் தவணைகள் போன்ற நெகிழ்வான கட்டண விருப்பங்களை அதிகமான வாடிக்கையாளர்கள் தேர்ந்தெடுப்பதாக ஜம்போ கூறியுள்ளது.
அதுமட்டுமில்லாமல், அதன் உத்தரவாதமளிக்கப்பட்ட திரும்ப வாங்கும் திட்டம், 129 திர்ஹம்ஸ் பதிவுக் கட்டணத்திற்கு, சாதனத்தின் மதிப்பில் 70 சதவீதம் வரை வழங்குவதாகக் கூறப்படுகிறது. எனவே, ஐஃபோன் 13 முதல் ஐஃபோன் 17 வரையிலான சாதனங்களை வர்த்தகம் செய்யும் வாடிக்கையாளர்கள், பொருந்தக்கூடிய வர்த்தக மதிப்புக்கு மேல் கூடுதலாக 100 திர்ஹம்ஸ் பெறலாம்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
