ஐக்கிய அரபு அமீரகம் முழுவதும் உள்ள ஆயிரக்கணக்கான டெலிவரி ஓட்டுநர்கள், கடுமையான கோடை வெப்பத்திலிருந்து நிவாரணம் பெறும் வகையில், நாடு முழுவதும் 12,000-க்கும் மேற்பட்ட குளிரூட்டப்பட்ட ஓய்வு நிலையங்கள் அமைக்கப்படவுள்ளதாக செய்திகள் வெளியாகியுள்ளன. ஆண்டுதோறும் மதிய நேரங்களில் வெளிப்புறப் பணிகளுக்கு விதிக்கப்படும் தடையின் போது ஊழியர்களுக்கு இந்த வசதி கிடைக்கும்.
மனித வளங்கள் மற்றும் எமிராட்டிசேஷன் அமைச்சகம் (Mohre), அரசு மற்றும் தனியார் துறை நிறுவனங்களுடன் இணைந்து மேற்கொள்ளும் இந்த முயற்சி, தொடர்ந்து நான்காவது ஆண்டாக செயல்படுத்தப்படுகிறது. மதியம் 12:30 மணி முதல் 3 மணி வரை நேரடி சூரிய ஒளியில் வெளிப்புற வேலை செய்வதைத் தடை செய்யும் ஐக்கிய அரபு அமீரகத்தின் மதிய நேரப் பணித் தடை காலத்துடன் இணைந்து, இந்த ஓய்வு நிலையங்கள் ஜூன் 15 முதல் செப்டம்பர் 15, 2026 வரை செயல்படும் என்று அதிகாரிகள் தெரிவித்துள்ளனர்.
Mohreயின் படி, பணி நேரத்தில் அதிக வெப்பத்திலிருந்து விலகி ஓய்வெடுக்க உதவும் குளிரூட்டப்பட்ட இடங்கள் உள்ளிட்ட அத்தியாவசிய வசதிகளை இந்த நிலையங்கள் டெலிவரி ஓட்டுநர்களுக்கு வழங்கும்.
குறிப்பிட்ட இடங்களில் நிலையாக அமர்ந்து வேலை செய்யாமல், தொடர்ந்து நகர்ந்து கொண்டே பணியாற்ற வேண்டிய சூழலில் உள்ள டெலிவரி ஊழியர்களுக்கு இந்த முயற்சி மிகவும் முக்கியமானது என்று அமைச்சகம் (Mohre) தெரிவித்துள்ளது. ஓட்டுநர்கள் தங்கள் மொபைல்களில் உள்ள மேப்ஸ் (interactive maps) மூலம் தங்களுக்கு அருகிலுள்ள ஓய்வு நிலையத்தைக் கண்டறிய முடியும் என்றும் அதிகாரிகள் தெரிவித்துள்ளனர்.
மேலும், தங்கள் நிறுவனங்களுடன் செய்துகொள்ளப்பட்ட ஏற்பாடுகளின் அடிப்படையில், கட்டுப்பாட்டு நேரங்களில் டெலிவரி ஊழியர்கள் தொடர்ந்து பணியாற்றலாம் அல்லது தங்கள் பணிகளைச் சிறிது நேரம் நிறுத்தி வைக்கலாம் என்று அமைச்சகம் குறிப்பிட்டுள்ளது.
பாதுகாப்பு நடவடிக்கைகள், விழிப்புணர்வு பிரச்சாரங்கள் மற்றும் பணியிட ஆய்வுகள் மூலம் வெளிப்புற ஊழியர்களை வெப்பம் தொடர்பான ஆபத்துகளிலிருந்து பாதுகாப்பதை நோக்கமாகக் கொண்ட, ஐக்கிய அரபு அமீரகத்தின் விரிவான ‘தொழில்சார் வெப்ப அழுத்தத் தடுப்புக் கொள்கையின்’ (Occupational Heat Stress Prevention Policy) ஒரு பகுதியாகவே இந்தத் திட்டம் அமைந்துள்ளது.
தொழிலாளர் நலன், தொழில்சார் சுகாதாரம் மற்றும் பாதுகாப்பு, மற்றும் அனைத்துத் துறைகளிலும் பாதுகாப்பான பணிச்சூழலை உருவாக்குதல் ஆகியவற்றில் நாட்டின் அர்ப்பணிப்பை இந்த முயற்சி பிரதிபலிக்கிறது என்று அமைச்சகம் (Mohre) தெரிவித்துள்ளது.
இத்திட்டத்திற்குச் சாலைகள் மற்றும் போக்குவரத்து ஆணையம் (RTA), அபுதாபி மொபிலிட்டி (Abu Dhabi Mobility) மற்றும் எமராத் (Emarat) போன்ற அரசு முகமைகள் மற்றும் தனியார் நிறுவனங்கள் ஆதரவளிக்கின்றன. அத்துடன் Talabat, Deliveroo, Noon, Careem மற்றும் Keeta போன்ற முக்கிய விநியோகச் (delivery) சேவைகளும் இதில் பங்கேற்கின்றன. உணவகங்கள், வணிக வளாகங்கள், சில்லறை விற்பனைக் கடைகள் மற்றும் ‘கிளவுட் கிச்சன்கள்’ (cloud kitchens) ஆகியவையும் இம்முயற்சியில் இணைந்துள்ளதாகக் கூறப்படுகிறது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
