ஹிஜ்ரி புத்தாண்டு விடுமுறையை முன்னிட்டு, துபாயில் உள்ள சாலை மற்றும் போக்குவரத்து ஆணையம் (RTA) மெட்ரோ, டிராம், பேருந்துகள் மற்றும் வாடிக்கையாளர் சேவை மையங்களுக்கான சிறப்பு அட்டவணையை வெளியிட்டுள்ளது. இதனால், துபாய்வாசிகள் பொது பார்க்கிங் இடங்களை இலவசமாகப் பயன்படுத்திக்கொள்ளலாம் மற்றும் மாற்றியமைக்கப்பட்ட பொதுப் போக்குவரத்து சேவைகளைப் பெறலாம்.
ஹிஜ்ரி புத்தாண்டு என்பது இஸ்லாமிய நாட்காட்டி ஆண்டின் தொடக்கத்தைக் குறிக்கிறது மற்றும் ஐக்கிய அரபு அமீரகம் முழுவதும் பொது விடுமுறையாகக் கடைபிடிக்கப்படுகிறது.
RTA வெளியிட்டுள்ள அறிவிப்பின் படி, திங்கட்கிழமை, ஜூன் 15 ஹிஜ்ரி புத்தாண்டு 1448-ஐ முன்னிட்டு, வாகன ஓட்டிகள் துபாய் முழுவதும் பொது பார்க்கிங் இடங்களை இலவசமாக அணுகலாம். இருப்பினும், பல அடுக்கு பார்க்கிங் இடங்களுக்கு (multi-storey parking) வழக்கமான கட்டணங்கள் பொருந்தும். அதன் பின்னர், செவ்வாய்க்கிழமை, ஜூன் 16 முதல் வழக்கமான பார்க்கிங் கட்டணங்கள் மீண்டும் அமலுக்கு வரும்.
அதேபோல், விடுமுறை நாட்களில் RTA-வின் ‘வாடிக்கையாளர் மகிழ்ச்சி மையங்கள்’ (Customer Happiness Centres) மூடப்பட்டிருக்கும் என்று அறிவிக்கப்பட்டுள்ளது. இருப்பினும், வாடிக்கையாளர்கள் ‘உம் ரமூல்’ (Umm Ramool) வாடிக்கையாளர் மகிழ்ச்சி மையம் மற்றும் தேரா, அல் பர்ஷா, அல் தவார், அல் கிஃபாஃப் மற்றும் RTA தலைமையகம் ஆகியவற்றில் உள்ள ஸ்மார்ட் கியோஸ்க்குகள் மூலம் சேவைகளைப் பெறலாம். இவை அனைத்தும் 24 மணி நேரமும் செயல்படும் என்பது குறிப்பிடத்தக்கது.
இவை தவிர, எமிரேட் முழுவதும் உள்ள வாகனப் பரிசோதனை மையங்களும் திங்கட்கிழமை அன்று மூடப்பட்டிருக்கும் என்று அறிவிக்கப்பட்டுள்ளது.
பொதுப் போக்குவரத்தைப் பயன்படுத்தும் பயணிகளைப் பொறுத்தவரை, துபாய் மெட்ரோவின் சிவப்பு மற்றும் பச்சை வழித்தடங்களில் (Red and Green Lines) சேவைகள் காலை 5 மணி முதல் நள்ளிரவு வரை இயங்கும். அதேவேளையில், துபாய் டிராம் சேவைகள் காலை 6 மணி முதல் மறுநாள் அதிகாலை 1 மணி வரை செயல்படும் என்று அறிவிக்கப்பட்டுள்ளது.
மேலும், விடுமுறை காலத்தில் பேருந்து சேவைகளின் புதுப்பிக்கப்பட்ட நேர அட்டவணையை அறிய ‘S’hail’ செயலியைப் (app) பயன்படுத்துமாறு பேருந்து பயணிகளுக்கு அறிவுறுத்தப்பட்டுள்ளது. அல் குபைபா (Al Ghubaiba) பேருந்து நிலையத்திலிருந்து அபுதாபியை இணைக்கும் E100 பேருந்து வழித்தட சேவை, ஜூன் 13 முதல் ஜூன் 15 வரை நிறுத்தப்படும் என்றும் RTA உறுதிப்படுத்தியுள்ளது. எனவே, தலைநகருக்குச் செல்லும் பயணிகள் அதற்குப் பதிலாக இப்ன் பதூதா (Ibn Battuta) பேருந்து நிலையத்திலிருந்து E101 வழித்தடத்தைப் பயன்படுத்தலாம்.
அதுமட்டுமில்லாமல், விடுமுறை நாட்களில் கடல்வழிப் போக்குவரத்து சேவைகளும் தொடர்ந்து இயங்கும் என்பதையும் ஆணையம் தெளிவுபடுத்தியுள்ளது. இதற்கான புதுப்பிக்கப்பட்ட நேர விவரங்களை RTA-வின் அதிகாரப்பூர்வ தளங்கள் மூலம் அறிந்துகொள்ளலாம்.
ஆகவே, போக்குவரத்து நேர அட்டவணைகளை முன்கூட்டியே சரிபார்த்து, அதற்கேற்ப தங்கள் பயணங்களைத் திட்டமிடுமாறு குடியிருப்பாளர்கள் மற்றும் பார்வையாளர்களை அதிகாரிகள் கேட்டுக்கொண்டுள்ளனர்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
