பாலைவனத்தில் அமைந்திருந்த ஒரு நகரத்தை உலகின் மிக முக்கிய நகரங்களில் ஒன்றாக மாற்றியது முதல், லட்சியமிக்க யோசனைகளை நிஜமாக்குவதன் மூலம் துபாய் தனது நற்பெயரை உருவாக்கியுள்ளது. இப்போது, அந்த வெற்றிக்கான சூத்திரத்திற்கு ஒரு தனிப் பெயர் சூட்டப்பட்டுள்ளது.
ஐக்கிய அரபு அமீரகத்தின் துணை அதிபரும் பிரதமரும் துபாயின் ஆட்சியாளருமான மாண்புமிகு ஷேக் முகமது பின் ரஷித் அல் மக்தூம் அவர்கள், “Dubai-It” என்ற புதிய முயற்சியைத் தொடங்கி வைத்துள்ளார். துபாயின் தனித்துவமான கலாச்சாரமான ‘விரைவான செயல்பாடு’, ‘சிறப்புத் திறன்’ (excellence) மற்றும் ‘முடிவுகளை மையமாகக் கொண்ட செயல்பாடு’ ஆகியவற்றை அரசு நிறுவனங்கள் மற்றும் வணிக அமைப்புகள் முழுவதும் நிலைநிறுத்துவதே இந்த முயற்சியின் நோக்கமாகும்.
இந்த முயற்சியை அறிவித்தபோது, தரத்தில் சமரசம் செய்யாமல் விரைவாகச் சிறந்த முடிவுகளை வழங்கும் திறனிலேயே துபாயின் வெற்றி எப்போதும் வேரூன்றியுள்ளது என்று ஷேக் முகமது கூறியுள்ளார்.
இது குறித்து ‘X’ தளத்தில் பதிவிட்டுள்ள ஷேக் முகமது, “வேகம் என்பது அவசரத்தைக் குறிப்பதல்ல; தரம் என்பது மெதுவான செயல்பாட்டைக் குறிப்பதல்ல; செயல்முறைப்படுத்தல் இல்லாவிட்டால் லட்சியத்திற்கு எந்த மதிப்பும் இல்லை,” என்று குறிப்பிட்டுள்ளார்.
மேலும், விரைவான சாதனை, துல்லியமான செயல்படுத்தல் மற்றும் குறுகிய காலத்தில் தெரியும் மற்றும் தாக்கத்தை ஏற்படுத்தக்கூடிய முடிவுகளை வழங்குதல் ஆகியவற்றை மையமாகக் கொண்ட ஒரு தத்துவமாகவும் அவர் “Dubai-It” முயற்சியை விவரித்துள்ளார்.
கடந்த சில தசாப்தங்களாக துபாயின் வளர்ச்சியை உந்தித்தள்ளிய கொள்கைகளை ஒரு நிறுவனக் கட்டமைப்பாக மாற்றுவதையும், அவற்றை வருங்கால சந்ததியினருக்குக் கொண்டு சேர்ப்பதையும், நிறுவனங்கள் முழுவதும் ஒரு நிலையான பணிமுறையாகப் பின்பற்றுவதை உறுதி செய்வதையும் இந்த முயற்சி நோக்கமாகக் கொண்டுள்ளது.
“எங்கள் குறிக்கோள் எப்போதும் இதுதான்: நாங்கள் செய்வதைச் சொல்கிறோம், சொல்வதைச் செய்கிறோம்,” என்று ஷேக் முகமது கூறினார்.
ஷேக் முகமதுவின் கூற்றுப்படி, “Dubai-It” என்பது வெறும் முழக்கம் மட்டுமல்ல. இது வாக்குறுதிகளை விடச் செயலுக்கும், திட்டங்களை விடச் செயல்படுத்தலுக்கும், நோக்கங்களை விட அளவிடக்கூடிய முடிவுகளுக்கும் முன்னுரிமை அளிக்கும் ஒரு மனநிலையைப் பிரதிபலிக்கிறது.
அந்த வகையில், போட்டித்தன்மை, செயல்திறன் மற்றும் சிறப்புத் திறன் ஆகிய கலாச்சாரங்களை வலுப்படுத்த இத்திட்டம் உதவும் என்று அதிகாரிகள் கூறுகின்றனர்.
துபாயின் சொந்த மாற்றத்தோடு ஒப்பிட்டுப் பேசிய ஷேக் முகமது, இந்த நகரமே அக்கோட்பாடு நடைமுறையில் இருப்பதற்கான மிகச் சிறந்த உதாரணம் என்றும் வலியுறுத்தியுள்ளார்..
“Dubai-It என்பது சாதனை நேரத்தில் சிறப்பான முடிவுகளை அடைவதைக் குறிக்கிறது,” என்று கூறிய அவர், பாலைவன நிலப்பரப்பிலிருந்து லட்சியத் திட்டங்கள் மற்றும் அவற்றைச் செயல்படுத்தும் திறனுக்காக உலகளவில் அங்கீகரிக்கப்பட்ட நகரமாக துபாய் எவ்வாறு உருவெடுத்தது என்பதையும் சுட்டிக்காட்டியுள்ளார்.
துபாய் தனது வளர்ச்சியின் அடுத்த கட்டத்தில் அடியெடுத்து வைக்கும் வேளையில், அதன் கடந்தகால வெற்றியை வடிவமைத்த பண்புகளான வேகம், துல்லியம், புத்தாக்கம் மற்றும் செயல்பாடு ஆகியவை அதன் எதிர்கால சாதனைகளிலும் மையமாகத் திகழ்வதை உறுதி செய்வதையே இந்த முன்னெடுப்பு நோக்கமாகக் கொண்டுள்ளது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
