ஷார்ஜாவின் கிழக்கு மற்றும் மத்தியப் பகுதிகளில் வாகனங்கள் பாதசாரிகள் மீது மோதும் விபத்துகள் மிகவும் பொதுவான மற்றும் தீவிரமான போக்குவரத்து விபத்துகளாக மாறியுள்ளதாக அதிகாரிகள் கூறுகின்றனர். இதனால், முறையற்ற இடங்களில் சாலையைக் கடப்பதைத் (jaywalking) தடுக்கவும், பாதசாரிகளின் பாதுகாப்பை மேம்படுத்தவும் ஷார்ஜா காவல்துறை நடவடிக்கைகளைத் தீவிரப்படுத்தியுள்ளது.
காவல்துறை புள்ளிவிவரங்களின்படி, குறிப்பிட்ட காலகட்டத்தில் இப்பகுதிகளில் பதிவான 60 போக்குவரத்து விபத்துகளில் 13 விபத்துகள் வாகனங்கள் பாதசாரிகள் மீது மோதியவை ஆகும். இதில் ஆறு விபத்துகள் கிழக்குப் பகுதியிலும், ஏழு விபத்துகள் மத்தியப் பகுதியிலும் நிகழ்ந்துள்ளன.
இது குறித்து ஷார்ஜா காவல்துறையின் போக்குவரத்து மற்றும் ரோந்துப் பிரிவு இயக்குனர் பிரிகேடியர் காலித் அல் காய் அவர்கள் பேசுகையில், பாதசாரிகளின் பாதுகாப்பே மிக முக்கிய முன்னுரிமை என்று வலியுறுத்தியுள்ளார்.
குறிப்பாக அதிவேகச் சாலைகளில் பாதுகாப்பற்ற இடங்களில் சாலையைக் கடப்பது உயிருக்கு ஆபத்தை விளைவிக்கும் என்று எச்சரித்த அவர், மக்கள் அதற்கென ஒதுக்கப்பட்ட பாதசாரி கடக்கும் இடங்கள் (pedestrian crossings) மற்றும் பாலங்கள் வழியாக மட்டுமே சாலையைக் கடக்குமாறு கேட்டுக்கொண்டார். மேலும், வாகன ஓட்டிகள் விழிப்புடன் இருக்கவும், நியமிக்கப்பட்ட கடக்கும் இடங்களில் பாதசாரிகளுக்கு முன்னுரிமை அளித்து வழிவிடவும் அவர் நினைவூட்டியுள்ளார்.
மேலும், விபத்துகளைக் குறைக்க, ஷார்ஜா காவல்துறை இப்பகுதிகளில் போக்குவரத்து ரோந்துப் பணிகளையும் பொது விழிப்புணர்வு பிரச்சாரங்களையும் அதிகரித்துள்ளது. அதேசமயம், சட்டவிரோதமாகச் சாலையைக் கடக்கும் பாதசாரிகள் மற்றும் ஒதுக்கப்பட்ட இடங்களில் பாதசாரிகளுக்காக வாகனத்தை நிறுத்தத் தவறும் ஓட்டுநர்கள் மீதும் அதிகாரிகள் நடவடிக்கை எடுத்து வருகின்றனர்.
கூடுதலாக, பாதசாரிகளின் நடமாட்டம் அதிகம் உள்ள பகுதிகளில் ‘ஸ்மார்ட்’ கண்காணிப்பு அமைப்புகள் நிறுவப்பட்டுள்ளதாக ஷார்ஜா காவல்துறை தெரிவித்துள்ளது. இதற்கிடையில், தற்போதுள்ள பாதுகாப்பு நடவடிக்கைகளை மறுஆய்வு செய்யவும், கூடுதல் பாதசாரி கடக்கும் இடங்கள் அல்லது பாலங்கள் தேவைப்படும் இடங்களைக் கண்டறியவும் காவல்துறை தொடர்புடைய அதிகாரிகளுடன் இணைந்து பணியாற்றி வருவதாக அதிகாரிகள் தெரிவித்துள்ளனர்.
இக்காலகட்டத்தில் கிழக்குப் பகுதியில் மொத்தம் 26 போக்குவரத்து விபத்துகள் பதிவாகின. இதில் ஆறு பாதசாரி விபத்துகளுடன், நிலையான பொருட்களின் மீது மோதியது, வாகனம் கவிழ்ந்தது மற்றும் பக்கவாட்டில் மோதிய விபத்துகளும் அடங்கும்.
மத்தியப் பகுதியில் 34 போக்குவரத்து விபத்துகள் பதிவாகின. ஏழு பாதசாரி விபத்துகள் தவிர, விலங்குகள் குறுக்கே வந்ததால் ஏற்பட்ட ஆறு விபத்துகள், வாகனத்தின் பின்புறம் மோதிய விபத்துகள் மற்றும் பல வாகனங்கள் சம்பந்தப்பட்ட விபத்துகளும் இதில் அடங்கும்.
மேலும், நடப்பு ஆண்டின் முதல் காலாண்டில் நிகழ்ந்த பல விபத்துகளுக்கு மூடுபனி மற்றும் குறைவான பார்வைத்திறன் போன்ற மோசமான வானிலை நிலைகள் காரணமாக இருந்ததாகக் காவல்துறை தெரிவித்துள்ளது.
ஆகவே, சாலைகளில் நியமிக்கப்படாத இடங்களில் சாலையைக் கடப்பதைத் தவிர்க்குமாறு பாதசாரிகளிடமும், வேக வரம்புகளைப் பின்பற்றுமாறும், குறிப்பாக குடியிருப்புப் பகுதிகள் மற்றும் பாதசாரி கடக்கும் இடங்களுக்கு அருகில் கூடுதல் எச்சரிக்கையுடன் இருக்குமாறும் வாகன ஓட்டிகளிடம் அதிகாரிகள் அறிவுறுத்தியுள்ளனர்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
