ஐக்கிய அரபு அமீரகம், ஜூலை 12, ஞாயிற்றுக்கிழமை அதிகாலையில், புதிய ஏவுகணை மற்றும் ட்ரோன் தாக்குதல்களை எதிர்கொள்ளும் வகையில் தனது வான் பாதுகாப்பு அமைப்புகள் செயல்படுவதாக அறிவித்துள்ளது.
காலை 6.37 மணிக்கு, நாடு முழுவதும் கேட்ட சப்தங்கள், தொடர்ந்து நடைபெற்று வரும் இடைமறிப்பு நடவடிக்கைகளால் ஏற்படுவதாக பாதுகாப்பு அமைச்சகம் (MoD) குடியிருப்பாளர்களை எச்சரித்ததுடன், பொதுமக்கள் அமைதியாக இருக்குமாறும், பாதுகாப்பு அறிவுறுத்தல்களைப் பின்பற்றுமாறும் கேட்டுக்கொண்டது.
அதே போல இடைமறிப்பு நடவடிக்கைகளால் கீழே விழுந்த எந்தவொரு சிதைவுகளையும் அல்லது துண்டுகளையும் அணுகவோ, தொடவோ, அல்லது புகைப்படம் எடுக்கவோ கூடாது என்றும், சம்பந்தப்பட்ட அதிகாரிகள் நிலைமையை மதிப்பிட அனுமதிக்க வேண்டும் என்றும் எச்சரிக்கப்பட்டுள்ளது.
அதுமட்டுமல்லாமல் ஏதேனும் சிதறிய துண்டுகளையோ அல்லது உடைந்த பாகத்தையோ கண்டால், பொதுமக்கள் உடனடியாக 999 என்ற எண்ணை அழைத்துத் தெரிவிக்க வேண்டும் என கேட்டுக்கொள்ளப்பட்டுள்ளது.
ஞாயிற்றுக்கிழமையன்று ஹார்முஸ் நீரிணை வழியாகச் சென்ற ஒரு கொள்கலன் கப்பலை இஸ்லாமியப் புரட்சிகரப் பாதுகாப்புப் படை தாக்கியதைத் தொடர்ந்து, ஈரான் மீது மற்றொரு சுற்றுத் தாக்குதல்களைத் தொடங்கியதாக அமெரிக்க இராணுவம் கூறிய பிறகு இந்தத் தாக்குதல்கள் நடந்துள்ளன.
கடந்த மே 4 ம் தேதிக்கு பின் அதாவது 69 நாட்கள் இடைவெளிக்குப் பிறகு, தாக்குதல் தொடர்பாக அறிவிக்கப்பட்ட முதல் நாடு தழுவிய அவசரகால எச்சரிக்கை இதுவாகும். இதற்கு முன் கடந்த மே 4 அன்று, வான்வழி அச்சுறுத்தல்களுக்குப் பதிலளிக்கும் வகையில் அதிகாரிகள் வான் பாதுகாப்புகளைச் செயல்படுத்தினர்; அப்போதும், நாடு முழுவதும் கேட்கும் உரத்த ஒலிகளுக்கு இடைமறிப்பு நடவடிக்கைகளே காரணம் என்று பாதுகாப்பு அமைச்சகம் (MoD) கூறியிருந்தது.
மேலும் கடந்த ஜூன் 26 அன்று பல குடியிருப்பாளர்களுக்கும் எச்சரிக்கை விடுக்கப்பட்டிருந்தபோதிலும், அந்த அறிவிப்பு ஒரு தொழில்நுட்பக் கோளாறால் தூண்டப்பட்டது என்றும், அது எந்தவொரு பாதுகாப்புச் சம்பவத்துடனும் தொடர்புடையது அல்ல என்றும் அதிகாரிகள் பின்னர் தெளிவுபடுத்தினர்.
இந்நிலையில் கடந்த சில நாட்களாக குவைத், பஹ்ரைன் மீது ஈரான் தாக்குதல் நடத்தி வந்த நிலையில் தற்பொழுது மீண்டும் அமீரகத்தின் மீது ஈரான் தாக்குதல் நடத்தியுள்ளது குறிப்பிடத்தக்கது.
